Noticias sociedad
Un total de 458 centros escolares galegos desenvolven clubs de lectura, o que supón un aumento do 11% tras a incorporación de 47 novos centros. Por provincias, 171 dos centros integrados no programa son da Coruña (19 de nova incorporación este curso), 65 de Lugo (sete novos), 54 de Ourense (catro novos) e 168 de Pontevedra (17 novos). Cada un deles ten asignada unha contía de entre 500 e 1.230, en función do tipo de centro e do proposta presentada, para destinar fundamentalmente á adquisición de libros para as actividades do club, que pasarán posteriormente aos fondos da biblioteca escolar, así como para gastos derivados do funcionamento do club.
O Servizo Galego de Saúde realizou 424 transplantes durante o pasado ano, o que supón a maior cifra desde que en 1981 se comezaron a practicar este tipo de intervencións na comunidade e un 28% máis que no 2023, cando se rexistraron 331. Produciuse un incremento en todos os programas de transplante salvo no de páncreas onde se mantiveron os datos (catro). En concreto, realizáronse 208 transplantes renais (un 24% máis que no 2023 e cifra récord), 118 de fígado (+34%), 64 de pulmón (+31%, tamén máximo histórico) e 30 de corazón (+36%). Galicia rexistrou no 2024 a maior taxa de doantes de órganos por millón de habitantes (50,7) desde a creación da Organización Nacional de Transplantes no 1989.
O Servizo Galego de Saúde presentou ás organizacións sindicais a proposta para a regular a cobertura voluntaria por parte do persoal médico da asistencia sanitaria dos sábados pola mañá nos centros de atención primaria. No día de hoxe tivo lugar unha reunión do grupo de traballo acordado crear na Mesa Sectorial celebrada o pasado 11 de decembro, na que participan representantes da Administración e dos sindicatos, co fin de avanzar na elaboración dun proceso regrado e homoxéneo para a cobertura dos sábados en todas as áreas sanitarias. No encontro estiveron presentes representantes da Xerencia do Sergas, da Dirección Xeral de Asistencia Sanitaria e da de Recursos Humanos.
A Xunta estenderá a campaña de vacinación fronte á gripe e a covid ata o 31 de xaneiro. O obxectivo é permitir que a poboación diana que aínda non se vacinou teña a oportunidade de facelo antes da chegada do pico de contaxios. Tomando como base o labor de vixilancia epidemiolóxica realizado pola Consellería de Sanidade, o pico da gripe está previsto na semana do 20 ao 26 de xaneiro. Nestes momentos, o nivel da onda é baixo, con tendencia crecente, e a previsión é que continúe así durante a segunda e a terceira semana deste mes. As persoas pertencentes aos grupos de risco poden solicitar autocita a través da aplicación Sergas Móbil, no apartado de campañas de promoción da saúde. Os horarios de vacinación nos 14 hospitais públicos están dispoñibles na web do Sergas.
A Consellería de Sanidade publica o informe de actividade das infeccións respiratorias agudas correspondente á primeira semana do ano e conclúe que a intensidade da gripe continúa en nivel baixo aínda que con tendencia crecente. Segundo os datos de atención primaria, a taxa de consultas por gripe aumentou un 29 % con respecto da semana previa e fica en 35,5 consultas por 100.000 habitantes. O incremento obsérvase en todos os grupos de idade, agás no de 5 a 19 anos, no que diminúe. O grupo coa maior taxa de consultas foi o de 20 a 59 anos e, por áreas sanitarias, a taxa de consultas foi superior á da semana anterior en todas salvo na de Pontevedra e O Salnés.
As 70 farmacias das catro provincias que se suman a este convenio achegarán semanalmente á Consellería de Sanidade datos sobre a venda de test de antíxenos e dos cinco medicamentos antigripais máis consumidos, o que será de gran valor para mellorar o control da enfermidade, integrando información adicional que axudará a dar unha resposta máis áxil e eficaz. Destas 70 farmacias, 30 son da provincia da Coruña, 10 da de Lugo, outras 10 da de Ourense e 20 da de Pontevedra. Os rexistros das farmacias, combinados cos datos de asistencia sanitaria en atención primaria e nas urxencias hospitalarias permiten, a través dun modelo matemático, anticipar con 15 días a evolución da gripe e as infeccións respiratorias agudas.
Portos de Galicia constatou a recollida de máis de 10.000 quilos de lixo dos fondos mariños do litoral galego no pasado ano 2023, no marco dos proxectos Upcycling the Oceans e Mares Circulares. Así pois, ambas iniciativas, centradas na recollida non intencionada de lixo durante as tarefas extractivas dos profesionais do mar, fundamentalmente da pesca, permitiron extraer 10.700 quilos de residuos, cun volume total de 108 metros cúbicos.
Galicia vén de converterse na primeira comunidade autónoma en acadar no seu servizo público de saúde a autocertificación do Programa de optimización do uso de antibióticos en todas as áreas sanitarias no ámbito da atención primaria. O Servizo Galego de Saúde conseguiu acadar o obxectivo marcado para este ano, que era autocertificar no ámbito da atención primaria, dun xeito sincronizado, as sete áreas sanitarias. Para acadar a autocertificación é preciso cumprir 18 estándares.
A Coruña Sounds na súa edición 2025 contará co concerto, o 19 de xullo no Porto da Coruña, da banda Arde Bogotá. Coruña Sounds repite a fórmula de música en directo con grandes nomes e bandas tras o éxito acadado nas dúas edicións anteriores. Arde Bogotá presentará na Coruña un dos seus concertos exclusivos en España, cun concepto de show a partir dun road trip e unha viaxe persoal que ten lugar durante o inicio e o final dunha eclipse. Con este espectáculo dáse continuidade ao ciclo de concertos Coruña Sounds que levou á cidade nos últimos meses, co apoio de Turismo de Galicia, a artistas como Emilia, Camilo, Robe e Luis Miguel. Tamén co respaldo da Xunta se van celebrar en 2025, o concerto de Lenny Kravitz o 10 de abril; Chayanne o 18 de maio e Leiva o 12 de xullo.
A conselleira de Medio Ambiente e Cambio Climático, Ángeles Vázquez, puxo en valor que a proposta da UE para reducir a contaminación por microplásticos mediante a prevención das perdas de pellets contribuirá a rebaixar nun 6% os vertidos non intencionados deste material ao medio ambiente. Durante a súa intervención na reunión do Consello de ministros europeos de Medio Ambiente, a conselleira cualificou como 'moi positiva' a proposta de regulamento aprobada hoxe para reducir a contaminación por microplásticos provocada por vertidos non intencionados. Esta norma pretende reducir as perdas de granza no medio entre un 54% e un 74% con respecto ao valor inicial de referencia.
Tivo lugar a presentación da nova edición do Resurrection Fest, a número 19 deste evento. A organización espera unha asistencia de máis de 120.000 persoas desde o mércores e ata o sábado, coa participación de preto dun centenar de artistas nos catro escenarios do recinto. Inclúe entre os seus nomes algúns referentes internacionais como Alice Cooper, The Offspring, Avenged Sevenfold, Bring me the horizon, Megadeth ou Bruce Dickinson.
Do 25 ao 27 de setembro, a Universidade de Vigo celebrará o V Congreso Internacional da Auga, que nesta ocasión leva por título 'A auga como recurso sostible: ciencia, empresa e benestar'. A iniciativa forma parte das accións do Campus Auga, o proxecto de especialización do campus de Ourense. Ao igual que en anteriores edicións, o principal obxectivo deste evento será ofrecer un punto de encontro para reflexionar e intercambiar coñecementos sobre aspectos significativos relacionados cos recursos hídricos.
La Casa de la Cultura de Quiroga acogió una jornada organizada por O Courel destino y futuro sobre la situación del urbanismo en la zona de O Courel. Este encuentro, en el que se profundizó en temas clave como el suelo rústico y el planeamiento territorial, ha sido una oportunidad para debatir y encontrar soluciones que promuevan un desarrollo sostenible en nuestra región.
O Arcanxo Festival celebrará a súa primeira edición con dous días de música metal internacional na Freixa, no municipio de Ponteareas. Será os días 19 e 20 de xullo, cun cartel cheo de bandas de metal tan recoñecidas como a brasileira Ratos de Porão, a sueca Enforcer, a belga Evil Invaders e a española Angelus Apatrida. O festival está organizado pola firma ponteareá de roupa We Play Metal, así como por ITP Promotions e 138 Producións.
O Paraninfo da UDC acolleu hoxe a entrega dos galardóns da VI Edición dos Premios Isabel Zendal, o concurso que ten como obxectivo fomentar a práctica do escepticismo, entendido como o pensamento crítico e racional, unha ferramenta indispensable para a comprensión do mundo e a toma de decisións na vida diaria, especialmente entre a xuventude.
Estudantes dos colexios vigueses García Barbón e Otero Pedrayo visitaban nestes días a Facultade de Ciencias da Educación e do Deporte para participar nos encontros inspiradores que puñan peche á cuarta edición de Te lo cuentan las matemáticas, un proxecto do grupo de innovación docente MaReMa que busca espertar vocacións matemáticas entre o alumnado da primaria. Financiado pola Fundación Española para la Ciencia y la Tecnología (FECYT), o proxecto permitiu amosar a utilidade social e tecnolóxica das matemáticas a 800 estudantes de 16 colexios de Vigo e Pontevedra.
Máis de 1200 participantes (académicos/as e activistas de diferentes países) preto de 200 sesións, sete conversas plenarias e máis de 20 actividades divulgativas, artísticas e culturais. Estas son algunhas das cifras da ESEE-Degrowth 2024, evento no que se agrupan a 15 Conferencia da Sociedade Europea de Economía Ecolóxica e a 10 Conferencia Internacional de Decrecemento.
Este proxecto foi creado por José Edelstein, físico teórico e profesor e investigador da USC, xunto coas músicas arxentinas Daniela De Rito e Lorena Edelstein, para achegar ao público un conxunto de narracións sobre o cosmos, entretexidas con cancións que o celebran, demostrando os elementos comúns que existen entre a arte e a ciencia: creatividade, imaxinación, técnica, método, inspiración, estética, unha noción de beleza e un criterio de verdade.
La nueva junta la forman Pilar Falcón (presidenta), Ignacio Bazarra (vicepresidente), Amelia Serraller (Secretaría y Redes Sociales), Mari Carmen López Velasco, (Programación y Patrocinios); Eduardo Ferreira, (Relaciones Institucionales); Ángel Carreira, (Formación); Irene Fernández y Marta Corbal, (Medios de Comunicación); Manolo Seixas, (representante en Galicia) y Fernando Navarrete (Audiovisuales).
Un total de 34 mulleres que son exemplo de innovación no rural integran a feira de primavera coa que o Campus Terra da USC quere dar voz, a través de espazos expositivos e diversas mesas redondas, ás emprendedoras que loitan cada día contra o despoboamento. Trátase de historias inspiradoras sobre como afrontar os retos e aproveitar as oportunidades, explicou Elvira López Mosquera, delegada do reitor para o Campus Terra, no acto inaugural deste foro que se desenvolve ao longo do xoves 6, na Praza da Mosqueira de Lugo.
