viernes, 23 de octubre de 2026
A Xunta de Galicia renova un ano máis a colaboración co festival de música independente Facela Fest, que se celebrará na capital lucense os días 8, 9 e 10 de maio.
O delegado territorial, Javier Arias, participou hoxe na presentación dos concertos desta novena edición xunto cos organizadores, Celestino Muinelo e Suso Rielo, e membros doutras institucións implicadas.
Entre os grupos e artistas confirmados figuran The Undertones e Christina Rosenvinge, xunto con outros nomes nacionais e internacionais como VVV [Trippin'you], Margaritas Podridas, Stompin' Riffraffs, Marcelo Criminal, Black Ends, Kokoshka e Las Petunias.
Tamén haberá presenza de bandas de Lugo e doutros lugares de Galicia como Grande Amore, Moloch, Pladür, Jade 4 ou Los Revelators.
Arias felicitou aos promotores polo nivel das actuacións das que poderemos desfrutar en directo en Lugo no marco deste festival e valorou que sigan apostando por darlle espazo á música de calidade feita en Galicia.
Subliñou así mesmo o impulso que está a coller o Facela Fest dentro do circuíto de festivais de música galegos, que teñen un notable impacto económico e turístico nos lugares que os acollen.
A inauguración está prevista para o xoves 8 de maio no Club Clavicémbalo; mentres que os concertos do venres 9 e o sábado 10 serán no exterior do auditorio Gustavo Freire. As entradas poden adquirirse a través da páxina web do festival.
Foi inaugurada no Museo do Pobo Galego a exposición 'Transfronteiriza', da artista e cineasta tudense Diana Gonçalves, que permanecerá aberta ao público ata o 28 de marzo de 2027. A mostra parte do documental 'Mulleres da Raia', da mesma autora, e froito de tres anos de investigación. A través da linguaxe cinematográfica, de materiais documentais, arquivos históricos e elementos patrimoniais, a proposta constrúe unha experiencia arredor da memoria compartida entre Galicia e o norte de Portugal. En concreto, Transfronteiriza recupera a memoria das mulleres que viviron na fronteira entre ambos territorios a mediados do século XX, que desempeñaron un papel fundamental no comercio transfronteirizo e na supervivencia económica das familias.
Trátase dunha iniciativa que nace como evolución de Circo Presente Continuo e que se vai desenvolver por primeira vez fóra de Madrid. A Cidade da Cultura, o Teatro Principal e o Salón Teatro serán as súas sedes na capital galega, reunindo artistas, compañías, profesionais da programación, distribuidoras e institucións para compartir proxectos e favorecer novas oportunidades de colaboración e contratación. O programa inclúe oito espectáculos, seis mostras breves e catro traballos en proceso. Entre as propostas figuran Naufragio, de Labsurda; Serena, de Circ Bover; Matrimonio, de Kolektivo Konika; Siku, de Jessica Arpin; e Sen patrón, de Pistacatro, que ofreceu un adianto artístico durante a presentación.
