A Xunta fixo balance da situación provocada polo apagamento eléctrico iniciado onte pola mañá en toda España, informando dos danos persoais ocasionados e do estado dos servizos públicos galegos. Segundo afirmou o conselleiro de Presidencia, Xustiza e Deportes, Diego Calvo, a subministración eléctrica xa está restaurada practicamente en toda Galicia e, se ben existe a posibilidade de que puntos concretos do territorio galego sigan a ter problemas derivados do apagamento, estes están 'en vías de resolverse'. En canto ao control da coordinación da emerxencia, Calvo informou de que na videoconferencia realizada hoxe co Ministerio do Interior varias comunidades 'manifestaron o seu interese de regresar ao nivel 2 de emerxencia' e que Galicia foi unha delas posto que a situación avanza dun xeito positivo e 'agardamos que evolucione a mellor no que queda de día'.

O conselleiro do Mar, Alfonso Villares, defendeu unha reforma da Política Pesqueira Común (PPC) para que esta se adapte ás necesidades da cadea mar-industria galega. Esta reforma debe incluír unha rexionalización da normativa europea e, por tanto, ter en conta as propostas e participación proactiva das autoridades rexionais na futura toma de decisións que se leven a cabo en Bruxelas neste senso. Así o expuxo este martes na reunión mantida ao máis alto nivel polo Comisario de Pesca e Océanos, Costas Kadis, co ministro de Agricultura, Pesca e Alimentación, Luis Planas, os responsables das comunidades autónomas do ramo, e as entidades representantes do sector pesqueiro, acuícola e das mulleres.

O presidente da Xunta, Alfonso Rueda, informou de que o Executivo autonómico aprobou hoxe 'solicitar formalmente un informe ao Consello Consultivo de Galicia' sobre 'as posibilidades legais' do traspaso das competencias para xestionar os permisos de traballo das persoas doutros países. O obxectivo é avaliar a posibilidade de asumir esta función en tres áreas concretas: as autorizacións iniciais para que unha persoa estranxeira poida traballar na comunidade, os permisos para traballos de tempada e os de larga estancia por motivos de estudos ou formación.