domingo, 19 de abril de 2026
O produto dos Trens Turísticos que impulsa a Xunta de Galicia en colaboración con Renfe e o Instituto Ourensán de Desenvolvemento Económico (Inorde) vén de ser galardoado, concretamente coa súa proposta da Ruta dos Faros, co premio Tourism-Friendly na categoría de viaxes de curta distancia, convocado pola Unión Internacional de Ferrocarrís (UIC).
Os Premios UIC TopRail de Turismo distinguen aos mellores destinos turísticos en 2025, recoñecendo o liderado no desenvolvemento e creación de experiencias únicas para os viaxeiros e destacando o papel do tren como medio de transporte sostible e inclusivo.
Para Turismo de Galicia, este é un recoñecemento que pon en valor unha iniciativa turística consolidada e que cada ano segue a espertar o interese dos visitantes que poden percorrer Galicia en tren coñecendo os seus principais recursos turísticos en canto a cultura vitivinícola, paisaxe, patrimonio e historia. Este 2025 foron 13 rutas dos Trens Turísticos nas que se ofertaron 2.530 prazas.
O Roteiro dos Faros, que alcanzou un nivel de ocupación practicamente do 100%, percorre o norte de Galicia e visita Cabo Ortegal, o miradoiro de Vixía Herbeira, o Santuario de Santo André de Teixido e o Cabo Estaca de Bares. Os participantes tamén poden coñecer Viveiro e os cantís de Loiba. Este itinerario do Roteiro dos Faros desenvólvese nos meses de xuño a setembro.
En 2025, o programa de Trens Turísticos de Turismo de Galicia alcanzou se un 92,15% de ocupación nas prazas á venda. As rutas nas que practicamente esgotaron a totalidade das prazas foron as dos Queixos, Ribeira Sacra-Miño, Rías Baixas, Ribeira Sacra-Sil e Faros.
O FIV de Vilalba volverá reunir na localidade lucense unha programación destacada da escena independente e alternativa estatal, cun cartel no que figuran nomes como Carlos Ares, Alcalá Norte, La M.O.D.A. e Ángel Stanich, xunto a outras propostas moi presentes no panorama actual como Repion, Puño Dragón, Celia Becks, Futuro Alcalde, Grande Osso e Rapariga DJ. A boa resposta do público nas últimas semanas confirma, ademais, a gran acollida desta edición, coa previsión de que Vilalba volva encherse de ambiente festivalero a próxima fin de semana. A programación do FIV de Vilalba desenvolverase entre o Escenario Vibra Mahou, o Escenario #Fiver by Lactalis e a Zona DJ, consolidando un formato que combina os grandes concertos nocturnos coa actividade diúrna do sábado.
Galicia sitúase como a comunidade autónoma con menor porcentaxe de pacientes que agardan máis de 60 días por unha consulta co especialista. Así o referendan os datos publicados polo Ministerio de Sanidade sobre listas de espera no Sistema Nacional de Saúde a peche de 2025. Segundo os datos, en decembro de 2025 a comunidade galega situouse como a cuarta rexión española con mellores tempos medios de espera no ámbito das primeiras consultas. Neste eido, o Servizo Galego de Saúde rexistrou unha media de 63 días de espera, fronte aos 102 do Sistema Nacional de Saúde. Estas cifras reflicten que os galegos esperan 39 días menos para acceder a unha consulta co especialista que a media dos españois.
