miércoles, 5 de noviembre de 2025
No referido á nova lei educativa, puxo de relevo a reforma estatutaria, que debe estar rematada antes de abril de 2026 e para o que de xeito inmediato se abrirá o procedemento participativo. Será unha gran ocasión para decidir se queremos ser unha Universidade de Facultades, que parece ser a peza esencial da nosa actividade docente, ou de Departamentos, ou se na organización da investigación procede manter a dualidade de institutos e centros ou optar claramente por unha fórmula máis operativa, manifestou.
O novo réxime do profesorado asociado é outro obxectivo para o que Antonio López avanzou que a USC está en condicións de ter completamente regularizados todos os contratos, tanto na súa dedicación como na súa duración, a finais deste mes de setembro, sendo a primeira Universidade que completa este proceso. Mais para iso dixo confiar en que sen máis demora se axilice o proceso co Estado e a Comunidade Autónoma para imputar orzamentariamente ao Plan Integra parte das prazas creadas.
A respecto das titulacións, avanzou a necesidade de revisar a normativa autonómica, particularmente no que atinxe ao número mínimo de estudantes por titulación, e a necesaria posta ao día do mapa de titulacións, tanto na oferta máis tradicional como na implantación das novas modalidades de microcredenciais que están chamadas a xogar un papel central na formación de recualificación ou formación ao longo da vida.
Inicio do Campus da Saúde
Dando resposta ao plan aprobado polo Claustro e polo Consello de Goberno e incorporado no recente aprobado Plan Estratéxico, o reitor marcou como obxectivo absolutamente prioritario pechar o cadro financeiro plurianual para licitar sen máis demora a Fase I do proxecto da Cidade da Saúde, que se corresponde cos espazos destinados á Facultade de Farmacia. Para completar ese cadro, ademais dos fondos xa comprometidos do Plan Especial de Infraestruturas dotado pola Xunta, dende a USC propuxemos diversas fórmulas como achegas directas da propia CA ou operacións de crédito da Universidade, un recurso ao crédito que é posible -dixo- polo rigor e exemplaridade demostrados ao longo destes últimos anos na xestión dos recursos nos que temos amortizado máis de 17 millóns de euros ata reducir a débeda viva a 12 millóns.
O outro proxecto prioritario é o traslado da Facultade de Formación do Profesorado de Lugo, para o que existe xa achega financeira da Consellaría a cambio da cesión do inmoble actual. Tamén aquí o obxectivo é acelerar a licitación para así poder iniciar as obras, afirmou.
Apoio ao estudantado
Se ben o reitor se congratulaba do incremento sostido da cifra de novo estudantado na USC, cun 11 % no Campus de Santiago e un moi salientable 48% no de Lugo dende 2018, ao tempo advertía do risco de que estas cifras comecen a mermar se as administracións públicas non se implican en maior medida no apoio ao estudantado. Sinalaba como cuestión preferente aumentar as bolsas e axudas, e hai certo consenso en que o incremento do financiamento público do ensino superior ata o 1 % do PIB en 2030 que marca a LOSUE se destine a reforzar o sistema de bolsas.
Fixo ademais especial fincapé na vivenda. Somos conscientes de que o problema do aloxamento universitario, de forma xeral, pero moi especialmente en cidades cunha forte presión turística como esta na que nos atopamos, ten acadado unha dimensión que fai que a súa solución requira de medidas que van máis aló do sistema de bolsas e axudas, dixo, á vez que subliñou que a USC é unha das Universidades coa maior ratio de prazas de residencia por estudantes matriculados do sistema estatal de universidades. É precisa a colaboración das diferentes administracións, cada unha dentro do seu ámbito de competencias, para mellorar a oferta de solucións habitacionais para o noso estudantado, manifestou.
Antonio López finalizou o seu discurso cun recordo a toda a comunidade universitaria que en distintos lugares do mundo non pode iniciar a súa actividade académica, con especial mención a Palestina e Ucraína. É o momento de reclamar o alto o fogo, que cese o xenocidio e a guerra para que calquera persoa, en calquera parte do mundo, poida vivir e formarse en paz, rematou.
O benestar do estudantado
O presidente do Consello do Estudantado, Andrés Couso Viana, aproveitou o seu discurso para evidenciar as barreiras coas que se atopa o estudantado na Universidade e que focalizou na insuficiencia de bolsas e uns criterios que complican verdadeiramente acceder a elas a quen máis o necesita, no acceso á vivenda e no dereito á conciliación, que debería garantirse cunha oferta de recursos extras que permitan completar a formación a quen ten que traballar á vez que estudar.
Couso puxo ademais o foco na saúde mental do estudantado e reclamou non só aumentar os recursos nos gabinetes de atención psicopedagóxica senón tamén dotar o estudantado da suficiente estabilidade para que poidan vivir e estudar en condicións saudables, o que pasa, ao seu xuízo, por dar solución ás tres barreiras anteriormente citadas.
Humanización dos coidados intensivos
Este ano a lección maxistral correspondeulle ao pediatra e profesor da Facultade de Enfermaría Antonio Rodríguez Núñez, que versou sobre os coidados intensivos, sen dúbida unha das bandeiras do progreso científico grazas ao mellor coñecemento das enfermidades e os tratamentos de soporte vital, coa axuda da tecnoloxía de vixilancia dos parámetros vitais así como a capacitación especializada do persoal sanitario dedicado ao coidado directo dos pacientes de forma continuada.
Mais -advertiu- lamentablemente este desenvolvemento técnico tivo como efecto adverso unha certa deshumanización da persoa, que pasa a ser secundaria ante a enfermidade, cun éxito terapéutico baseado máis na recuperación de funcións vitais ou ás veces na prolongación fútil da vida, que na aplicación razoada das técnicas e tratamentos nun proceso de toma de decisións compartidas cos pacientes e as familias.
Humanizar é un requisito de ética clínica e calidade asistencial, afirmou. Por iso a humanización dos coidados intensivos, poñer o benestar do paciente no centro, é unha obriga do sistema sanitario e dos seus profesionais e debera ser un criterio esencial de calidade asistencial ademais dun obxectivo prioritario de todos os axentes implicados na sanidade. A capacitación neste eido, rematou, non é algo innato senón un conxunto de habilidades non técnicas que poden e deben aprenderse e adestrarse xa dende o grao e ao longo de toda a traxectoria profesional.
Memoria
A secretaria xeral da USC, Dulce María García Mella, deu lectura da Memoria do pasado curso académico 2023-2024, nun contexto de adaptación á LOSU, co inicio dos traballos de revisión dos Estatutos e a constitución da Comisión de Desenvolvemento Estatutario, ademais da adecuación das condicións de contratación do profesorado. A memoria recolle as actuacións máis salientables agrupadas en seis bloques: ensino e aprendizaxe, investigación e transferencia, internacionalización, extensión universitaria e compromiso social, organización e xestión de recursos e comunidade universitaria.
García Mella rematou a súa intervención apuntando desafíos de futuro importantes como o relevo xeracional, a intensificación do uso da intelixencia artificial ou a necesaria adaptación á Lei Orgánica do Sistema Universitario. Estou segura de que entre todas e entre todos conseguiremos afrontalos con éxito sabendo que nada é particularmente difícil cando se aborda paso a paso, sentenciou.
O cinema arxentino volve ser protagonista da programación da Filmoteca de Galicia, que este mes recibirá as cineastas María Aparicio e Lucía Seles con motivo das retrospectivas que lles dedica. Tamén visitará a sede da cinemateca da Xunta na Coruña o director do Buenos Aires Festival Internacional de Cine Independiente, Javier Porta Fouz, para presentar unha copia restaurada de Nueve reinas, ademais de coñecidos nomes do noso audiovisual nas novas entregas da sección Off Galicia, do ciclo Espello Video Cine e da sesión inaugural do 20º aniversario do programa educativo Cinema en Curso. A nova carteleira mensual inclúe, así mesmo, varias proxeccións do Cormorán Film Fest, as últimas de Centenario Maurice Pialat e as películas que cada ano selecciona a Asociación Amigos da Ópera coincidindo coa súa Temporada Lírica, entre outras citas.
O presidente da Xunta, Alfonso Rueda, informou de que o Consello da Xunta aprobou hoxe a sinatura do convenio do nivel acordado para 2025 entre a Consellería de Política Social e Igualdade e o Instituto de Maiores e Servizos Sociais (Imserso) destinado ao sistema de atención á dependencia das comunidades autónomas e que, no caso de Galicia, ascende a 105 millóns de euros sufragados entre o Estado e a Xunta, só tres máis que os asignados o exercicio pasado. Tal e como informou Rueda, Galicia recibirá algo máis de 52 millóns de euros, grazas a que a Xunta cumpre con éxito os obxectivos recollidos neste acordo: diminución da lista de agarda, mellora na calidade dos servizos, etc.
