Noticias politica
O director xeral de Relacións Exteriores e coa Unión Europea, Jesús Gamallo, participou na 11ª Conferencia sobre a Subsidiariedade do Comité Europeo das Rexións (CdR), organizada conxuntamente co Grupo Director sobre a Mellora da Lexislación e a Subsidiariedade Activa (BRASS-G), co título Lexislar mellor e subsidiariedade activa: claves para unha UE eficaz. Gamallo defendeu a prospectiva estratéxica como ferramenta diferenciada para lexislar mellor nas rexións. A súa principal diferenza é que profunda nas tendencias a longo prazo, nas incertezas e nos escenarios alternativos. Estes métodos, explicou o director xeral, permiten aos responsables da toma de decisión ir máis alá do horizonte político inmediato e tomar mellores decisións políticas a longo prazo.
O presidente da Xunta, Alfonso Rueda, reivindicou hoxe a necesidade de mellorar as conexións ferroviarias entre Galicia e Portugal e dar un impulso real á liña de alta velocidade que unirá ambos territorios. 'Ten que ser un obxectivo fundamental porque vai permitir interconectar persoas e mercadorías', indicou Rueda. Así o reclamou esta mañá tras asumir a presidencia rotatoria da Comunidade de traballo Galicia-Norte de Portugal, un organismo creado en 1991 para potenciar a colaboración na Eurorrexión. 'Temos unha relación que é un tesouro e temos que coidar', indicou sobre a cooperación entre ambas rexións en diferentes eidos desde hai anos.
O presidente da Xunta, Alfonso Rueda, anunciou hoxe que a Xunta lle trasladará de inmediato ao Goberno central o seu desacordo coa proposta recibida para empezar a negociar a transferencia á Comunidade das funcións, servizos e medios necesarios para asumir a xestión completa do litoral ao entender que limita a súa capacidade de acción e mantén inxerencias estatais sobre as súas competencias. 'O noso obxectivo é chegar a un acordo no menor tempo posible, logo dos meses de espera tras a sentenza do Constitucional', indicou.
O director xeral de Relacións Exteriores e coa Unión Europea, Jesús Gamallo, participou na sesión plenaria número 162 do Comité Europeo das Rexións (CdR), enmarcado na edición deste ano da Semana Europea das Rexións e das Cidades (#EURegionsWeek). De especial interese para Galicia foi a aprobación do ditame titulado Unha transición xusta para todas as rexións da UE, no que se reivindica un enfoque inclusivo e equitativo neste proceso cara a unha economía sostible para que ningún territorio quede atrás. O documento subliña a necesidade de apoio específico para as rexións máis dependentes dos sectores afectados pola transición xusta.
O presidente da Xunta, Alfonso Rueda, reunirá esta fin de semana a todo o seu equipo de Goberno na localidade lucense de Sober, onde levarán a cabo dúas xornadas de traballo nas que desenvolverán os próximos fitos da acción de goberno para os vindeiros meses, así como as liñas estratéxicas da lexislatura. As xornadas tamén servirán para apoiar a candidatura Paisaxe da auga: Ribeira Sacra de cara a acadar en 2026 o recoñecemento como Patrimonio Mundial. O Goberno galego, que puxo en marcha o proxecto no 2017, xa fixo entrega á embaixada de España ante a Unesco do primeiro expediente da candidatura.
O director xeral de Relacións Exteriores e coa Unión Europea, Jesús Gamallo, participou na sesión deste martes da Comisión de Cidadanía, Gobernanza e Asuntos Institucionais e Exteriores (CIVEX) do Comité Europeo das Rexións (CdR), onde, entre outras cuestións, se aprobou un ditame sobre o papel das rexións e das cidades na estratexia da UE con África. Galicia e outras rexións concordaron nos beneficios de cooperar con este continente, pero reclamaron a descentralización desta tarefa para mellorar a súa eficacia. En concreto, apostaron por instrumentos de financiamento inclusivos que apoien as autoridades locais africanas e por unha arquitectura institucional que fomente esta cooperación descentralizada.
O presidente da Xunta, Alfonso Rueda, reclamou hoxe a Pedro Sánchez avances na mellora das infraestruturas de transporte galegas, que se axilice a chegada de financiamento para os proxectos industriais viables e sostibles e que haxa progresos no traspaso de competencias á comunidade autónoma. Así o detallou en rolda de prensa tras unha reunión co Presidente de Goberno, da que destacou o seu ton cordial e institucional, mais lamentou que houbo 'moitas boas palabras, pero poucas concrecións'. No encontro, o titular do Executivo galego expuxo as demandas prioritarias da comunidade e recordou os compromisos pendentes da anterior xuntanza, celebrada en xullo de 2022.
O conselleiro de Educación, Ciencia, Universidades e FP, Román Rodríguez, anunciou que a Xunta impulsará a creación da primeira oficina de transferencia de coñecemento -testada como un piloto- centrada no sector biotecnolóxico e compartida por todos os axentes de I+D+i para converter Galicia nunha biorrexión de referencia. Fíxoo durante a clausura do acto de presentación do balance intermedio da Estratexia de Consolidación da Biotecnoloxía en Galicia 2021-2025, co que se busca achegar aos asistentes o traballo realizado neste eido para impulsar o papel da comunidade a nivel internacional.
A Comisión Europea (CE) avala a decisión da Xunta de impulsar a Lei de administración ambiental simplificada de Galicia como un instrumento normativo que reforce a seguridade xurídica tanto desde o punto de vista dos promotores como das administracións públicas e permita axilizar, sempre con plenas garantías medioambientais, a tramitación de novos proxectos de desenvolvemento enerxético e industrial que resulten claves para o futuro da comunidade. Así o anunciaron o presidente da Xunta, Alfonso Rueda, e a conselleira de Medio Ambiente e Cambio Climático, Ángeles Vázquez, logo de que o Consello tomase hoxe razón dos resultados da rolda de contactos que mantivo a semana pasada en Bruxelas a responsable autonómica.
O conselleiro de Sanidade, Antonio Gómez Caamaño, destacou que Galicia está á vangarda de España na detección temperá das enfermidades raras, grazas, entre outras medidas, ao Programa galego de cribado neonatal que, con seu continuo incremento, converteuse no máis completo de todo o Estado. O titular da carteira sanitaria do Executivo galego interveu no acto de clausura dunha xornada sobre a abordaxe das enfermidades raras en Galicia, na que se falou sobre os avances realizados e sobre os retos a afrontar. O Programa galego de cribado neonatal examinou en tres anos, dende o 2020 e ata o 2023, a máis de 463.000 neonatos, permitindo instaurar tratamento no prazo recomendado a 679 deles.
A fórmula do partido instrumental sería a preferida por Anova para concorrer ás eleccións ás Cortes.
A militancia de Anova-Irmandade Nacionalista pode votar na consulta interna sobre os acordos políticos para as eleccións do 26 de xuño a favor da súa preferencia por un partido instrumental sen que iso implique rachar o acordo cos socios de En Marea.
O portavoz do Grupo Popular afirmou que o PPdeG está traballando para ofertar un programa e un goberno estables para o futuro de Galicia encabezado por Feijóo. Respecto do novo secretario xeral, Miguel Tellado, indicou que se trata dunha persoa coa que estamos encantados de traballar e amosouse seguro de que vai ser capaz de cumprir coas funcións que se lle encomendaron.
Feijóo refírese aos ex-presidentes da Xunta como os activos principais dese galeguismo e dese europeísmo que forxan o noso autogoberno, durante a presentación do libro Fernando González Laxe discursos parlamentarios, o segundo volume da colección do Parlamento dedicada aos presidentes de Galicia.
"Hai que volver empezar dende o principio para presentar un proxecto útil, cun partido máis aberto, actitudes novas e con humildade desde o principio". Son as declaracións de Núñez Feijóo durante a presentación formal da súa candidatura á presidencia do PPdeG, na que confirmou: Hoxe empezamos a deseñar o partido do ano 2020.
Antón Rosón, Tomás Pérez Vidal, Victorino Núñez, José María García Leira, Dolores Villarino e Pilar Rojo. A medalla que hoxe se lles concede é unha distinción axeitada e oportuna, dixo o presidente da Xunta; que subliñou que grazas a eles, o Parlamento non foi só a clave de bóveda do templo político autonómico, senón sobre todo a gran referencia social do país.
En Marea presenta a súa presenza no Congreso e no Senado ao servizo da cidadanía galega, polo que dá conta das súas accións nun acto aberto no que tamén recolle opinións e críticas co fin de coñecer o que fan mal, no que poden mellorar e recoller entre os cidadáns que novas propostas poden presentar.
No comité asesor da mesa de contratación da base de drons de Rozas atópase unha persoa relacionada cunha das empresas adxudicatarias. Alternativa Galega de Esquerda rexistrou unha proposición non de lei que esixe a paralización do proceso por non cumprir coa normativa e a legalidade en contratación pública.
O BNG, nunha reunión estratéxica, trasladoulle a Anova (a formación liderada por Xosé Manuel Beiras) a súa vontade de sumar forzas para conformar unha candidatura nacionalista que podería ser clave na derrota do PPdeG nas eleccións autonómicas de 2016. O BNG non apoia alianzas estatais.
O señor Besteiro está sufrindo as consecuencias duns niveis de esixencia a outras forzas políticas, ou mesmo dentro da súa forza política, que quizais non foron razoables e que agora lle abocan a tomar esta decisión, manifestou o portavoz do Grupo Popular, Pedro Puy, respecto da situación do secretario xeral dos socialistas galegos.
