viernes, 7 de agosto de 2026
O presidente do Goberno galego, Alberto Núñez Feijóo, referiuse aos ex-presidentes da Xunta como os activos principais dese galeguismo e dese europeísmo que forxan o noso autogoberno.
Durante o acto de presentación do libro Fernando González Laxe discursos parlamentarios, o segundo volume da colección do Parlamento dedicada aos presidentes de Galicia, afirmou que o paso do tempo, e sobre todo a integridade das persoas, fan que os ex-presidentes formen parte dun patrimonio común que desdebuxa as fronteiras partidarias. Eles son os grandes artífices do que somos, asegurou, afirmando que cada un na súa etapa demostrou que a política é útil, que non é outra cousa que a ferramenta que temos os homes para definir xuntos o noso destino, para cambialo ou continualo.
Sobre este punto, aseverou que Galicia definiu o seu, e o resultado está no Parlamento; neste acto no que expresamos a convivencia, a tolerancia e a unidade que o noso pobo practica a cotío, dixo.
Feijóo lembrou que desde ese xa afastado 1987, a historia acelerouse para producir cambios que ningún escritor de ficción puido imaxinar. Desaparecen imperios e nacións; xorden países novos e caducan ideoloxías que pretendían resolver para sempre os problemas da humanidade; desátanse crises e asoman diferentes ameazas. Pero a democracia, os parlamentos, o poder da palabra, seguen en pé, aseverou, facendo fincapé en que grazas á democracia, ao Parlamento e á palabra, Galicia segue en pé e son precisamente os que pisan a liberdade os que esmorecen.
Ao longo do acto, o titular da Xunta subliñou que Europa é unha idea esencial para entender a personalidade de Fernando González Laxe e que curiosamente, o europeísmo tamén condiciona decisivamente as traxectorias de Xerardo Fernández Albor, Manuel Fraga e Emilio Pérez Touriño. As súas ideoloxías converxeron no europeísmo. Tanto o reformismo duns, como a socialdemocracia doutros, tiñan o común denominador de Europa, abundou.
Nesta liña, asegurou que hai unha teima recorrente nestes discursos parlamentarios que hoxe se presentan: Europa. Nesa Galicia de 1987 Fernando González Laxe loita por europeizar a nosa mentalidade, disipar as dúbidas que a integración suscitaba nalgúns sectores, e responder dialecticamente ao euroescepticismo político. E destacou ademais a influencia intelectual que González Laxe segue exercendo a través de actividades docentes, investigadoras e divulgativas, especialmente valiosas aseverou- no eido rural.
Como admirador do seu traballo, o titular da Xunta resaltou a súa constante preocupación por converter a Galicia unida nunha Galicia artellada. Velaí o gran reto de quen goberna e dos que reflexionan, recalcou, afirmando que a unidade do noso pobo é unha constante que se fortalece co autogoberno.
O artellamento é un desafío constante, derivado dos cambios demográficos, tecnolóxicos e culturais. Saber artellar o cambio, artellar a diversidade, é a gran proba dos nosos tempos, recoñeceu, insistindo en que por fortuna contamos co exemplo dos que forxaron a Galicia que hoxe desfrutamos.
A loita contra os incendios forestais suma un novo aliado tecnolóxico ao servizo de toda a sociedade. A aplicación móbil ALume, deseñada para facilitar que calquera persoa poida dar a alarma sobre un foco de lume de forma inmediata e precisa, xa se atopa plenamente operativa e dispoñible para a súa descarga de balde nas plataformas Android e iOS. O obxectivo principal desta ferramenta é potenciar a detección temperá dos incendios forestais. Nunha emerxencia no monte, os primeiros minutos son decisivos para evitar que un foco inicial se converta nun gran incendio; por iso, ALume nace para acurtar os tempos de aviso e facilitar ao servizo de extinción datos exactos antes de despregar os medios sobre o terreo. Cabe sinalar que a aplicación leva xa 7.000 descargas e 200 notificacións que axudaron ao operativo.
Un dos grandes atractivos desta undécima edición será a estrea de dez novos espectáculos, todos eles impulsados por compañías galegas, un dato que evidencia o dinamismo creativo do sector dos monicreques na Comunidade. A programación abrirase coa nova versión de A festa dos títeres, presentada por Viravolta, Vai de Roda e Títeres Alakrán, para continuar coa estrea de Treco-lerias, de Trécola Producións, e A rosa de papel, adaptación ao teatro de monicreques do texto de Valle-Inclán realizada por Alakrán.
