lunes, 2 de noviembre de 2026
Principais novidades da campaña
- Poboación diana e grupos de idade: A campaña estende a vacina antigripal reforzada (de alta carga) a todas as persoas de 65 ou máis anos, un tramo que o pasado ano se limitaba aos maiores de 70. En total, a poboación diana para a gripe sitúase en 926.000 persoas de 60 ou máis anos, mentres que a inmunización fronte á COVID diríxese arredor de 549.000 maiores de 70 anos.
- Vacinación escolar: A partir do 13 de outubro, o programa estenderase aos centros de saúde e a 75 colexios seleccionados nas sete áreas sanitarias galegas (12 na Coruña e Cee, 4 en Ferrol, 14 en Santiago e Barbanza, 9 en Pontevedra e O Salnés, 12 en Lugo, A Mariña e Monforte, 11 en Vigo, e 13 en Ourense, Verín e O Barco). Esta ampliación permite acadar unha poboación diana de 26.536 rapaces de entre 3 e 11 anos. O alumnado de entre 2 e 11 anos ten como opción preferente a administración da vacina intranasal, que evita a picada.
- Outros colectivos: A planificación tamén inclúe aos profesionais sanitarios, as mulleres embarazadas e as persoas con condicións de risco, organizándose a través dos centros de saúde, residencias e atención domiciliaria para persoas inmobilizadas.
Calendario e obxectivos
A campaña de vacinación estase desenvolvendo de xeito progresivo ata o 31 de decembro:
- 28 de setembro: Inicio nas residencias de maiores e centros de discapacidade.
- 13 de outubro: Comezo da vacinación infantil nos centros de saúde e nos 75 colexios participantes, así como aos profesionais sanitarios.
- 19 de outubro: Extensión ás persoas de 70 ou máis anos.
- 2 de novembro: Incorporación das mulleres embarazadas.
Os obxectivos de cobertura establecidos para esta edición aspiran a acadar o 60 % nos nenos de 6 meses a 11 anos, mulleres embarazadas e traballadores sanitarios, e o 75 % na poboación de 60 ou máis anos.
Na campaña anterior, Galicia rexistrou taxas de cobertura superiores á media estatal, salientando o 72,36 % de vacinación en maiores de 65 anos fronte ao 58,47 % do conxunto de España.
Galicia ocupa un lugar destacado nos Premios Nacionais de Investigación 2026, con cinco científicos galardoados. Tivo lugar o acto de entrega destes premios, celebrado no Palacio de Congresos de Europa, en Vitoria-Gasteiz. Os investigadores galegos que recibiron esta distinción son Ángel Carracedo, natural de Santa Comba, catedrático de Medicina na USC e director da Fundación Pública Galega de Medicina Xenómica; a compostelana Carmen Álvarez Lorenzo, catedrática da USC e directora do Instituto de Materiais da USC (iMATUS); e Laura Castro Santos, de Betanzos, catedrática da Escola Politécnica de Enxeñaría de Ferrol, pertencente á UDC.
O XXXVI Festival de Jazz de Lugo ofrecerá do 4 ao 14 de novembro un total de 22 actuacións que combinarán grandes figuras internacionais cunha ampla presenza de músicos galegos en catro escenarios. Conforme ao programa, o Auditorio Fuxan os Ventos acollerá a apertura o mércores 4 co trío do saxofonista e clarinetista cubano Paquito DRivera. Neste mesmo escenario actuarán Abe Rábade, o día 8, e Kenny Barron Trio, o 11. No Círculo das Artes sucederanse James Carter Organ Trio, o 5 de novembro; Jogo de Damas, o día 6; Takuya Kuroda Quintet, o 7; Patricia Brennan Septet, o día 12; Erik Truffaz & Antonio Lizana, o día 13, e Clarence Bekker Band, o 14 de novembro.
