domingo, 8 de noviembre de 2026
A Xunta logra que o Goberno central rectifique a súa postura inicial sobre o traspaso á Comunidade das funcións, servizos e medios necesarios para asumir a xestión completa do litoral e incluirá as demandas galegas nunha nova proposta.
Logo dunha reunión celebrada hoxe de xeito telemático, a secretaria xeral Técnica da Consellería de Medio Ambiente e Cambio Climático, Carmen Bouso, e a directora xeral de Asuntos Constitucionais e Desenvolvemento Lexislativo, Isabel Concheiro, puxeron en valor que o director xeral de Cooperación Autonómica e Local do Ministerio de Política Territorial e Memoria Democrática, Rafael Brief, admitise as consideracións propostas pola Administración autonómica ao borrador de acordo remitido polo Executivo central o pasado mes de outubro sobre esta cuestión.
Nesa liña, fixeron fincapé en que o Goberno central retira a exixencia dun informe vinculante do Estado cada vez que a Xunta pretenda outorgar unha concesión para obras ou instalacións non desmontables no dominio público marítimo-terrestre (DPMT), requisito que suporía unha clara inxerencia estatal sobre as competencias autonómicas. Nese senso, Carmen Bouso e Isabel Concheiro incidiron en que esta cuestión beneficiará ao resto das comunidades autónomas do litoral.
A maiores, o representante estatal comprometeuse a enviar en breve un novo borrador adaptado ao escenario aberto tras a aprobación da Lei de ordenación e xestión integrada do litoral de Galicia (Loxilga) e a sentenza do Tribunal Constitucional que avalou a súa lexitimidade de cara a ultimar o traspaso efectivo das funcións, servizos e medios de xestión do litoral.
As responsables autonómicas insistiron en que a Comisión Mixta de Transferencias se celebre o antes posible así como na urxencia de concretar e cuantificar este traspaso porque é un paso fundamental para poder seguir co desenvolvemento da lei galega. De feito, en canto reciba o traspaso formal dos medios necesarios para asumir directamente todas as súas competencias neste eido, a Xunta ten o compromiso de comezar a traballar de inmediato na emisión dos primeiros informes e títulos relacionados coa xestión do litoral.
Comisión interdepartamental e Foro do litoral
De feito, a Xunta xa vén traballando nesta materia. Así, logo de constituír o pasado mes de outubro a Comisión interdepartamental de coordinación, que permitirá traballar de xeito transversal na xestión do litoral, a conselleira de Medio Ambiente e Cambio Climático, Ángeles Vázquez, mantivo unha serie de contactos con axentes e organizacións vencelladas coa costa para avanzar na creación do Foro do litoral. Neste senso, cómpre subliñar que, segundo recolle a propia lei, será o máximo órgano colexiado de participación, consulta e asesoramento en materia de ordenación do litoral.
Galicia converteuse coa Lei de ordenación e xestión integrada do litoral na primeira comunidade española en regular a través dunha normativa propia e integral a franxa costeira en toda a súa extensión. A Xunta está a dar os pasos necesarios para o desenvolvemento dunha norma que permitirá xestionar os 2.500 quilómetros de costa da comunidade e 1,6 millóns de hectáreas terrestres e marítimas.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
