Actualidad de Sociedad

A Consellería de Sanidade vén de presentar aos profesionais de todas a categorías que participaron nos grupos de mellora o borrador do novo modelo de Atención Primaria para os 25 vindeiros anos, que recolle un total de 175 accións a desenvolver a curto, medio e longo prazo, definidas en seis liñas estratéxicas e 45 obxectivos concretos. Do total das accións a desenvolver, 75 defínense a curto; 53 a medio e 47 a longo prazo. Trátase dun ambicioso documento, froito dun traballo multidisciplinar e participativo no que colaboraron profesionais sanitarios, colexios profesionais, asociacións de pacientes e cidadanía, e no que a Consellería de Sanidade e o Sergas avogaron por adoptar decisións compartidas.

A Cidade da Cultura de Galicia convida aos amantes do entroido a disfrazarse de roqueiras e roqueiros e gozar dun baile especial coa música en directo da banda infantil A Gramola Gominola, unha festa para toda a familia que terá lugar o luns 4 de marzo ás 17.30 horas no Museo Centro Gaiás. A estética do rock’n’roll, coas súas cazadoras de coiro, pantalóns axustados, chatolas ou topetes, convértese desta volta no tema do baile que a Cidade da Cultura organiza polo entroido desde fai catro anos e que, en edicións anteriores, se ten dedicado ás xentes do mar, á cultura chinesa ou aos diferentes xeitos de celebrar estas festas ao longo do mundo.

A Asociación Galega de Cooperativas Agroalimentarias - AGACA- organiza no mercado de Abastos de Santiago de Compostela a exposición "Espazos Efémeros de Emprendemento" no marco do proxecto Interreg PocTep LACES. Cun formato de tenda 'pop up' desenvolverase durante seis fins de semana de febreiro a xullo, en xornadas de venres e sábado. A exposición “Espazos Efímeros de Emprendemento” comeza o venres 22 de febreiro en horario de 9.15 a 15.00 horas. O obxectivo desta actividade é ofrecer aos proxectos e empresas da economía social que se atopan en fase de creación ou consolidación unha experiencia real de venda e conseguir unha importante aprendizaxe que lles axude a perfeccionar o seu modelo de negocio.

O Parque Nacional Marítimo Terrestre das Illas Atlánticas de Galicia contará co seu primeiro Plan Reitor de Uso e Xestión (PRUX), un completo documento no que se recollen e regulan os usos permitidos neste espazo natural durante a vindeira década co fin de garantir unha maior protección e conservación dos seus valores. Despois de acadar o visto bo do Consello da Xunta a finais de 2018, coa publicación hoxe no Diario Oficial de Galicia do decreto de aprobación do plan cómprese o último trámite para a súa entrada en vigor e dáse así un paso imprescindible na candidatura do parque nacional a ser declarado Patrimonio da Humanidade pola Unesco.

O conselleiro do Medio Rural, José González, anunciou no Parlamento galego a próxima elaboración dunha nova lei de prevención e extinción de incendios forestais, dada a gran aposta que fai a Xunta nesta materia. Fíxoo durante a súa comparecencia, a petición propia, para dar conta das liñas estratéxicas do seu departamento. Así mesmo, o titular de Medio Rural aproveitou a comparecencia para facer balance dos lumes rexistrados o pasado ano, que foron 1.426, afectando 2.608 hectáreas de superficie. O conselleiro defendeu a importancia da recente modificación da estrutura da consellería, coa creación dunha dirección xeral específica de Defensa do Monte, que xestiona xa todo o relacionado coa prevención e a extinción.

O audiovisual galego presentouse en Berlín diante da industria cinematográfica internacional, nun encontro celebrado no marco da 31ª edición do European Film Market (EFM), que se desenvolve do 7 ao 15 de febreiro en paralelo á Berlinale. Para a celebración deste evento especial, a organización volveu a escoller o Academie Lounge de Berlín, local situado moi próximo ás sedes do mercado, que reuniu a 200 profesionais coa finalidade de intensificar as relacións entre os representantes do audiovisual galego desprazados e a industria internacional convidada. Este encontro facilitoulles aos profesionais a posibilidade de ampliar a súa axenda de contactos e detectar potenciais clientes ou colaboradores.

O Servizo Galego de Saúde (Sergas) realizou un total de 209.718 intervencións cirúrxicas durante o pasado ano 2018 (205.277 en 2017). Delas 110.359, o 53% foron ambulatorias (107.710 en 2017) e 99.359 con ingreso (97.567 en 2017). Isto supón que máis da metade das intervencións cirúrxicas realizadas en 2018, non precisaron de ingreso hospitalario dos pacientes. A actividade ambulatoria considérase unha práctica beneficiosa para o paciente ademais de que, complementariamente, conleva unha mellor utilización dos recursos, aumentando os indicadores de resolución.

A Xunta de Galicia realizará de xeito inminente a convocatoria de novas oposicións para cubrir un total de 847 prazas de emprego público na Administración galega. Estas 15 convocatorias serán publicadas no prazo máximo dun mes no Diario Oficial de Galicia (DOG), e desde ese momento abrirase un prazo para que as persoas interesadas poidan apuntarse. O director xeral da Función Pública, José María Barreiro, anunciou hoxe a posta en marcha duns procesos para o acceso á Xunta de Galicia “sen precedentes nas últimas décadas”. Neste sentido, recalcou que a totalidade dos procesos que se convocan serán de acceso libre.

Nas vindeiras semanas comezará a tramitación da Lei de impulso demográfico, que fará de Galicia a primeira Comunidade Autónoma que elevará a rango de lei as súas políticas neste ámbito. A demografía é un dos principais retos que ten por diante o Executivo autonómico e que para afrontalo cómpre a implicación do conxunto da sociedade. Esta lei pioneira dará continuidade ao traballo do Observatorio Galego de Dinamización Demográfica, foro de participación no que están representados grupos políticos, organizacións sindicais e empresariais, universidades, administracións local e central, entidades sociais, así como profesionais e expertos nesta materia.

O director xeral de Mobilidade, Ignacio Maestro, interveu hoxe na Comisión 6ª do Parlamento de Galicia, onde avanzou que a Xunta porá en funcionamento na primavera un distintivo obrigatorio para facilitar a identificación dos vehículos VTC. Ignacio Maestro reiterou que o Ministerio de Fomento debe establecer un marco regulador claro que garanta a competencia leal entre os sectores do taxi e das VTC e os dereitos dos usuarios.