Noticias tecnologia
Os centros educativos públicos galegos sitúanse á cabeza do Estado na disposición de servizos dixitais provistos pola Administración pública como entornos virtuais de aprendizaxe, aulas virtuais e servizos na nube. Así se recolle na estatística "Ensino non universitario. Sociedade da información e a comunicación nos centros educativos. Curso 2018-2019", que vén de publicar o Ministerio de Educación e Formación Profesional e que reflicte a boa situación da dixitalización nos centros públicos galegos no contexto nacional. O 96% dos centros de ensino públicos de Galicia dispoñen de aulas virtuais, grazas aos proxectos EDIXGAL e Webs dinámicas, fronte o 41,3% da media estatal. Ademais, o 99% dos centros públicos dispoñen de servizos na nube e o 93,3% dos centros públicos dispoñen de páxina web, fronte ao 86,9% a nivel nacional.
O Centro Tecnolóxico do Mar - Fundación Cetmar presentará o próximo venres os avances acadados no marco do proxecto europeo MATES, para o impulso da economía azul, e que apuntan a que o uso de combustibles alternativos e de novas fontes de enerxía renovable serán claves para o futuro do sector da construción naval, especialmente no desenvolvemento de tecnoloxías baseadas en sensores e redes intelixentes, e o uso de big data. Os progresos logrados polos investigadores daranse a coñecer durante a celebración do seminario virtual Fomento de la Economía Azul en el Atlántico: Estrategia de Formación y Capacitación a través da plataforma online Webex.
A Consellería de Sanidade ven de pór en marcha esta mañá a plataforma tecnolóxica de seguimento coa que rastrexará e monitorizará os contactos das persoas infectadas por Covid-19. Dotado cun equipo inicial de 20 operadores, o departamento sanitario da Xunta estima que superará os 50 profesionais nas vindeiras dúas semanas. O sistema tecnolóxico de rastrexo empregado en Galicia para identificar posibles novos casos de infeccións por coronavirus, contará cun protocolo único, e encargarase de identificar e contactar con cada unha das persoas que tiveran contacto cun caso positivo por Covid-19. Tras unha consulta médica, presencial ou telefónica, na que o facultativo diagnostique ao paciente como caso sospeitoso de padecer COVID-19, se lle solicitará a proba PCR.
Estamos desenvolvendo un proxecto pioneiro en España que marcará un punto de inflexión na capacidade diagnóstica da sanidade pública galega fronte ao Covid-19, que nos permitirá garantir áreas libres de virus circulante, e nos dotará, por tanto, dunha nova arma para seguir avanzando na loita contra este virus . Con estas palabras resumiu o xerente da Área Sanitaria de Vigo, Julio García Comesaña, a iniciativa que se está levando a cabo no Complexo Hospitalario vigués, nun encontro cos medios por videoconferencia. O xerente -que estivo acompañado polo xefe do servizo de Microbioloxía, Benito Regueiro-, informou dos detalles do sistema para o procesamento agrupado de mostras PCR na detección de coronavirusSARS-CoV2.
Ser capaces de prever a través de modelos matemáticos adecuados os recursos indispensables para loitar de modo eficiente contra a COVID-19, a curto e medio prazo, é a finalidade do proxecto que acaba de financiar a Fundação para a Ciência e Tecnologia de Portugal (FCT) e no que toman parte investigadores da USC, UVigo e Universidade de Aveiro. O proxecto aspira tamén a preparar as persoas infectadas para a recuperación no domicilio e a identificar problemas de saúde mental. O estudo permitirá prever, por exemplo, o número de Unidades de Coidados Intensivos necesarias na loita contra a pandemia. O equipo de científicos pretende optimizar, deste xeito, o impacto de medidas de prevención e tratamento na redución da mortalidade por COVID-19.
O reitor Antonio López e o conselleiro de Sanidade, Jesús Vázquez Almuiña, asinaron este luns, nun acto celebrado por videoconferencia, un convenio de colaboración entre a USC, a Consellaría de Sanidade, o Servizo Galego de Saúde e a Fundación Pública Galega de Medicina Xenómica, para a obtención de datos de xenotipado, actividades científicas e de investigación entre outras, no ámbito da Medicina Xenómica. Para este convenio, a Consellaría de Sanidade destinará un importe total de 669.962 euros. Esta cantidade asegura a cobertura financeira do programa ata 2022. Con este convenio preténdese materializar e regular a colaboración entre a Fundación Pública Galega de Medicina Xenómica e a Universidade de Santiago de Compostela, que conta cun nodo do Centro Nacional de Xenotipado (CeGen-USC).
Esta semana a Consellería de Educación, Universidade e Formación Profesional e a Amtega comezaron o reparto dun novo lote de 1.750 equipos con conexión de balde a internet entre as familias con menos recursos que teñen escolarizados aos seus fillos en centros públicos. Con este novo envío -que se engade aos 1.000 kits informáticos xa distribuídos polos centros escolares nos días pasados- elévase a 2.750 o número total de equipos para asegurar a conectividade ao alumnado que presenta maiores dificultades no acceso ao ensino en liña. A medida vai dirixida ao alumnado de Secundaria, Bacharelato e Formación Profesional, que recibirá os equipos en préstamo.
A Xunta de Galicia vén de solicitarlle ao Goberno do Estado traballar nun marco común estatal que estableza os criterios básicos de privacidade e interoperabilidade que deben garantir as diferentes aplicacións das CCAA sobre o uso da tecnoloxía e os datos para combater superar a crise do COVID-19. Así llo trasladou esta mañá a directora da Axencia para a Modernización Tecnolóxica de Galicia, (Amtega), Mar Pereira, á Secretaria de Estado de Dixitalización e Intelixencia Artificial, Carme Artigas, durante a xuntanza interterritorial convocada por este departamento para abordar as iniciativas de dixitalización relacionadas co Covid19.
O Comité pretende aproveitar as capacidades da industria galega para a fabricación do equipamento que máis se está necesitando nos centros hospitalarios, nos centros de atención a maiores e persoas con discapacidade, e noutros lugares de traballo: EPIs, luvas, mascarillas, produtos desinfectantes ou pezas para respiradores. As propostas estanse canalizando a través da plataforma Marketplace que está xestionando xa 55 propostas viables. Destacan os EPIS doados por Ceaga, as batas médicas xestionadas polo clúster téxtil Cointega, os mandís impermeables que fabrica a industria do plástico, pantallas protectoras, respiradores que están fabricando Bendix e Cinfa, ou o pedido de mascarillas no que colabora Gabadi.
Unha das facetas máis complexas da loita contra o COVID-19 é comprender como se comporta o virus e como pode evolucionar. Con este obxectivo, o grupo de investigación MODESTYA da USC desenvolveu un modelo preditivo do Coronavirus, que está dispoñible nunha
aplicación web interactiva. A ferramenta permite predicir a evolución do virus nun horizonte temporal de tres días, baseándose no seu comportamento nos quince días anteriores. Este modelo de predición de casos futuros serve para coñecer a situación de España, pero tamén do resto de países ou rexións do mundo e por comunidade autónomas dentro do Estado. A base de datos empregada para alimentar esta ferramenta usa os casos diarios confirmados e falecidos por rexión, extraídos da evolución da pandemia en todo o mundo.
A Universidade de Vigo, xunto con empresas e clústeres industriais, está a desenvolver un sistema que permitirá integrar, por primeira vez, drons autónomos nas plantas de produción de automóbiles. O proxecto, denominado AFID, Autonomous Flying Inspection Device, arrancou en 2023 e estenderase ata decembro de 2025 e foi unha das iniciativas seleccionadas na convocatoria de Ayudas a la I+D+i concedidas pola Agencia Estatal de Investigación, mobilizando unha inversión total de 1.753.700 con fondos europeos.
A fibrose hepática é unha enfermidade crónica que se manifesta en fases avanzadas de fígado graxo, atópase na antesala da cirrose e non ten tratamento, ocupando por iso o primeiro posto entre as causas de transplante hepático. Agora, persoal do Centro Singular de Investigación en Medicina Molecular e Enfermidades Crónicas da USC dan un novo salto cualitativo neste campo.
O alumnado galego de 2º de bacharelato interesado na física e no mundo da investigación ten unha cita o venres 1 de marzo na USC. Un ano máis, o Instituto Galego de Física de Altas Enerxías, centro mixto da USC e a Xunta, organiza a Masterclass Física de Partículas coas mans. A xornada pretende achegar o día a día da investigación nesta disciplina, outorgar visibilidade ao traballo punteiro que se desenvolve dende Santiago de Compostela e espertar vocacións científicas entre o estudantado.
O 16 de febreiro o campus de Ourense acollerá a sétima edición da feira científica e divulgativa eXXperimenta en Feminino. A iniciativa une un amplo colectivo de persoal investigador da Facultade de Ciencias, a Escola Superior de Enxeñaría Informática, a Escola de Enxeñaría Aeronáutica e do Espazo e a Escola Universitaria de Enfermaría co obxectivo de visibilizar o papel da muller no eido CTEM e atraer vocacións científicas a el.
A construción do edificio que albergará o plató virtual Coruña Estudo Inmersivo (CEI) na Cidade das TIC xa está en marcha. O reitor da Universidade da Coruña, Ricardo Cao; e o exreitor da UDC, Julio Abalde, mantiveron unha reunión esta mañá na sede da Deputación da Coruña cos representantes do Clúster Audiovisual Galego e o presidente da Deputación, Valentín González Formoso, para coordinar o avance do proxecto.
As abondosas chuvias dos últimos meses puxeron en evidencia o impacto que os aportes de auga doce teñen nos ecosistemas mariños e, consecuentemente, na produción marisqueira. Para achegar un pouco máis luz sobre este proceso, un grupo de investigadores do Centro de Investigación Mariña da Universidade de Vigo (CIM), realizaron un estudo pioneiro que replica as condicións do hábitat mariño no mesocosmos de bancos marisqueiros intermareais.
Os neutrinos son partículas que atravesan o noso corpo trillóns de veces por segundo. Trátase dunha especie de pantasmas do mundo subatómico, cunha masa moi pequena e sen carga eléctrica, por iso apenas interaccionan co resto de partículas elementais e a súa identidade, tamén denominada sabor, vai mudando cando viaxan polo espazo. Agora, o Instituto Galego de Física de Altas Enerxías participa no deseño dun detector que interceptará feixes de neutrinos, os máis potentes creados ata o de agora.
O Balneario Termal de Laias, en Ourense, acolleu este xoves o lanzamento do proxecto Aquapred, de Sistema de control e prevención de contaminantes en augas mineromedicinais mediante intelixencia artificial. Liderada polo Departamento de Física Aplicada da Universidade de Vigo e coa participación de entidades de España, Portugal e Francia, a iniciativa conta con financiamento do programa Interreg-Sudoe 2021-2027.
A redución das emisións contaminantes no sector marítimo sitúase como unha das prioridades globais para combater o cambio climático. O novo regulamento europeo para a descarbonización do sector, que entrará en vigor en 2025, reforza a iniciativa FuelEU Maritime cuxo paquete de medidas Fit for 55 busca reducir en polo menos un 55 % as emisións de gases de efecto invernadoiro dos combustibles utilizados polo sector do transporte marítimo para 2030 e conseguir a neutralidade climática en 2050.
Moitas terapias utilizadas para combater o cáncer, ademais de producir numerosos efectos secundarios, non conseguen a remisión completa do tumor, en parte debido á presenza de células nai de cancro, que son difíciles de eliminar. Estas células poden autorrenovarse e xogan un papel crucial na recidiva do tumor e nos procesos de metástase, por iso existe un grande interese en desenvolver terapias dirixidas a este subconxunto de células tumorais.
