domingo, 8 de noviembre de 2026
Aquapred, explican os seus responsables, é un proxecto multiterritorial, multidisciplinario e interdisciplinario de física, medicina, farmacia, química, bioloxía e informática enfocado á monitorización e control da auga termal/mineromedicinal dos balnearios e a predición de contaminantes, baseándose na dixitalización dos datos en tempo real dos parámetros fundamentais da auga mineromedicinal e a análise contínua de ditos datos por un sistema de intelixencia artificial. O sistema, detallan, permitirá realizar un control preventivo automático sobre os elementos de tratamento da auga que non afecte ás súas propiedades medicinais e desenvolver un modelo de deep learning que permita predicir a posibilidade de aparición de contaminantes en ditas augas (como a lexionela ou a e. coli).
Segundo explican os promotores da iniciativa neste proxecto trátase de aplicar tecnoloxías punteiras ao control e xestión das augas mineromedicinais nos balnearios termais do espazo Sudoe (sudoeste europeo), co triplo obxectivo de minimizar a posibilidade de presencia de contaminantes maximizando as propiedades medicinais das augas, incrementar a base científica sobre o comportamento das augas mineromedicinais e xerar un produto exportable a todos os balnearios do mundo.
1,8 millóns de orzamento
Na presentación celebrada este xoves participaron José Luis Legido, investigador principal do proxecto e profesor emérito da Universidade de Vigo; Francisco Javier Rodríguez Rajo, vicerreitor do campus de Ourense; Javier Soto, xerente do Grupo Caldaria, e Belén Gómez, xefa de área de Turismo Termal da Xunta de Galicia, que puxeron en valor as características desta iniciativa. Cofinanciado con fondos Feder, Aquapred conta cun orzamento total de 1.871.530,38 euros e ten como beneficiarios, ademais da UVigo, as universidades de A Coruña e Complutense de Madrid e os balenarios El Raposo e Hervideros, en España; o Centro de Valorização e Transferência de Tecnologia da Água (AquaValor) e o Instituto Politécnico de Brangança, en Portugal; e o Instituto de Termalismo da Universidade de Burdeos, a Universidade de Pau e o clúster termal Aqui O Thermes, en Francia. Conta tamén coa participación, como asociados do proxecto, do grupo Caldaria (Balneario de Laias) e Iberik (Balneario de Augas Santas) por parte de España; e da Empresa Municipal de Equipamentos de Chaves (Termas de Chaves) e a Comunidad Intermunicipal de Viseu Dão Lafões, por parte de Portugal. A isto súmase o apoio da Axencia de Turismo de Galicia (a través del Área de Turismo Termal), asociada ao proxecto. A actividade do proxecto arranca agora e prolongarase ata finais de 2026.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
