martes, 3 de noviembre de 2026
Tamén neste mes de novembro dá comezo un novo ciclo dedicado ao cinema nipón a través da colaboración coa Fundación Japón, que neste caso se centra no realizador Keisuke Kinoshita baixo o subtítulo Unha ollada desde a emoción, en referencia á empatía cara ás persoas vulnerables que transmitiu a través da súa obra. Recoñecido como un dos nomes máis destacados da chamada segunda idade de ouro do cine xaponés, porén a súa filmografía non recibiu a consideración internacional que si ten no seu país.
Na Sala José Sellier poderán verse ata o 22 de decembro oito das súas obras máis relevantes, comezando o 18 de novembro cun dos seus títulos máis coñecidos, La balada de Narayama, estreada en 1958 e que 25 anos máis tarde tivo unha nova versión da man de Shohei Imamura.
Ademais, os días 19 e 20 deste mes o público da Filmoteca de Galicia terá a oportunidade de se volver atopar co cineasta estadounidense James Benning, un dos máis prestixiosos nomes do panorama experimental e famoso polos seus longos planos paisaxísticos e a súa concepción estruturalista. Esta será a terceira ocasión na que o norteamericano visite a cinemateca galega, desta volta grazas á colaboración co Festival Internacional de Cine de Xixón e coa Filmoteca Española. Benning presentará na Coruña as súas últimas películas: Eight Bridges, estreada na última edición do Festival de Cine de Berlín, e Little Boy, arredor das que manterá cadanseu coloquio cos espectadores que se acheguen a velas á Sala José Sellier.
Colaboración con Amigos de la Ópera
A Filmoteca volve acoller dúas colaboracións xa habituais na súa programación de outono. A primeira delas, coa Asociación Amigos de la Ópera de A Coruña, inclúe as proxeccións de El káiser de la Atlántida, de Sebastián Alfie, o día 5; Dogville, de Lars von Trier, o día 12, e La cinta blanca, de Michael Haneke, o día 26. A segunda, co festival coruñés Cormorán Film Fest, que ten unha das súas sedes na Sala José Sellier, onde programará oito sesións nestas dúas primeiras semanas do mes.
A carteleira de novembro complétase con novas entregas da sección Fóra de Serie, que trae á Coruña as películas Las corrientes, de Milagros Mumenthaler; Un poeta, de Simón Mesa Soto; a versión integral de La risa y la navaja, de Pedro Pinho; The Devils, de Ken Russell, e Una película de miedo, de Sergio Oksman. Así mesmo, retómase Filmoteca Jr. co clásico de Buster Keaton El maquinista de la general, mentres que unha nova entrega de Off Galicia presentará unha escolma de curtas das distintas edicións do festival Norte Cine Diverso.
Xa na última semana do mes, o documental Feelings Are Facts: The Life of Yvonne Rainer servirá de punto de partida para o desenvolvemento en decembro dun ciclo dedicado á cineasta e coreógrafa norteamericana Yvonne Rainer, mentres que as dúas sesións do programa Os límites do meu corpo son o horizonte, comisariado pola artista Isabel María, pecharán a programación de novembro os días 27 e 28.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur. De feito, destacan os altos rexistros acadados entre os días 9 e 15.
A Xunta de Galicia puxo en marcha a campaña de inmunización fronte á gripe e a COVID, que este ano incorpora como principais novidades a extensión da vacina antigripal de alta carga ás persoas de 65 a 69 anos e a ampliación do proxecto piloto de vacinación nos colexios a 75 centros educativos. O inicio oficial tivo lugar nun acto nas residencias de maiores e centros de discapacidade, o colectivo polo que arranca tradicionalmente a campaña debido á vulnerabilidade deste grupo fronte ás infeccións respiratorias.
