Actualidad de Pesca

A produción do sector do mar en Galicia subiu preto dun 50% desde 2011 ao superar os 5.500 millóns de euros fronte aos 3.700 millóns de euros de 2011 e ten relación con máis do 90% das ramas de actividade da economía. Destaca o gran crecemento da industria transformadora cunha produción de 4.300 millóns de euros, máis do dobre que na edición de 2011. As relacións comerciais con outros países supoñen unha achega importante ao valor global deste sector en Galicia, que fan que o volume económico xeral engadindo os produtos comercializados desde a comunidade rolde os 9.000 millóns de euros, incluíndo as importacións, o que supón a maior cifra da historia.

O presidente da Xunta, Alfonso Rueda, urxiu a construír unha posición sólida a nivel nacional contra o veto á pesca de fondo e compromete o apoio de Galicia aos recursos xudiciais. O titular do Executivo autonómico, acompañado pola conselleira do Mar, Rosa Quintana, mantivo unha xuntanza cos expertos e xuristas da Fundación MarInnLeg, do Instituto de Estudos Europeos Salvador de Madariaga da Universidade da Coruña e con distintos representantes da frota afectada.

A conselleira do Mar, Rosa Quintana, anunciou que a Xunta vai analizar todas as vías legais que ten á súa disposición para recorrer a decisión da Comisión Europea de vetar a pesca de fondo en preto dun cento de áreas en augas comunitarias. A representante do Executivo galego explicou durante un acto na Coruña que nos vindeiros días convocará aos representantes do sector e a expertos xuristas da Fundación MarInnLeg e do Instituto de Estudos Europeos Salvador de Madariaga de Universidade da Coruña (UDC) para avaliar as distintas posibilidades e elixir a máis efectiva na defensa dos intereses da frota galega.

A conselleira do Mar, Rosa Quintana, salientou a aposta de Galicia pola cogobernanza co sector como unha das chaves para superar os retos aos que se enfronta o complexo mar-industria e manter a súa posición de referente europeo, entre eles a revisión da Política Pesqueira Común (PPC) e o desenvolvemento da economía azul. A titular de Mar salientou que Galicia é a principal rexión pesqueira española e europea e que o seu modelo de xestión se basea na cooperación.

Estas demandas de Galicia foron trasladadas esta semana polo Goberno autonómico ao ministro de Agricultura, Pesca e Alimentación, Luis Planas, a través dunha carta na que se fai fincapé no malestar da cadea mar-industria de Galicia pola súa exclusión dos Proxectos Estratéxicos para a Recuperación e Transformación Económica do ámbito agroalimentario. A misiva tamén expón a inquedanza xerada por representantes do Goberno central ao afirmar de xeito erróneo que algunhas destas empresas están amparadas pola Política Agraria Común.

A conselleira do Mar, Rosa Quintana, mantivo un encontro cos integrantes do Consello Galego de Pesca no que tamén participou a directora xeral de Asuntos Marítimos e Pesca (DG MARE) da Comisión Europea, Charlina Vitcheva, para analizar a situación do sector do mar de Galicia e os retos aos que se enfronta na actualidade. Nesa xuntanza os representantes dos distintos elos da cadea mar-industria e a Administración galega trasladaron a necesidade de adoptar medidas de xestión baseadas en estudos sólidos para evitar casos como a proposta de prohibir a pesca de fondo en preto dun cento de áreas europeas. Ese veto inclúe o palangre de fondo malia ser unha dar artes máis selectivas e sustentables que existen.

A conselleira do Mar, Rosa Quintana, reivindicou a necesidade de que a Unión Europea conte cunha Política Pesqueira Común (PPC) na que haxa un equilibrio real -tal como establece un dos seus principios- entre os aspectos medioambientais e os socioeconómicos. Así o pediu durante a súa intervención na clausura da IX Conferencia internacional ARVI sobre o futuro da pesca A nova PPC e o Fempa no futuro da pesca, ao tempo que defendeu a transcendencia de revisar esta política e introducir cambios para adaptala á realidade das distintas ramas de actividade vencelladas co mar.

O proxecto Radar on Raia, coordinado polo Cetmar e do que forman parte socios galegos como o Intecmar e tamén nacionais como Portos do Estado, púxose en marcha no 2019 co fin de actualizar e estender fóra da fronteira de Galicia a tecnoloxía de radares de alta frecuencia do Observatorio Costeiro de Galicia, operativo desde 2011, e que forma parte do Observatorio RAIA. O obxectivo é convertelo nunha infraestrutura de observación transfronteiriza que permita mellorar o coñecemento da dinámica oceánica dun nivel local a rexional no Noroeste da Península Ibérica, mellorando a monitorización das correntes e da ondada, e desenvolvendo diferentes ferramentas para medir e predicir o estado do mar.

Tivo lugar o Consello Consultivo de Política Pesqueira para Asuntos Comunitarios no que se realizou un debate previo ao próximo Consello de Ministros de Pesca da UE, onde se abordará a comunicación da Comisión Europea en relación coas orientacións para a fixación das posibilidades de pesca para 2023. Nel Galicia defendeu a necesidade de que o próximo exercicio se incrementen as posibilidades de pesca das principais especies que captura a frota galega en augas comunitarias despois de varios anos de recortes. A propia Comisión Europea recoñece os avances rexistrados no estado das poboacións de peixes en augas comunitarias, especialmente no Atlántico Noreste onde a maioría das especies se atopan en niveis de rendemento máximo sustentable.

A conselleira do Mar, Rosa Quintana, explicou hoxe no Parlamento que a Xunta está a traballar nas medidas que é posible aplicar desde Galicia para apoiar á frota pesqueira e urxiu ao Goberno central a adoptar medidas de xeito inmediato para facer fronte á suba dos carburantes, á folga do transporte e ás consecuencias da guerra en Ucraína. A titular de Mar lembrou que nos últimos días mantivo reunións coas entidades representativas da frota pesqueira e da industria transformadora para analizar a evolución da súa actividade nas que se abordaron medidas de carácter autonómico como a bonificación do 100% das taxas dos portos galegos durante un mínimo de dous meses.