viernes, 30 de octubre de 2026
Nese encontro tendeu a man ao sector e lembrou que se trata dun asunto que non só prexudica a Galicia senón tamén a outras comunidades, polo que o recurso estatal está máis que xustificado.
Alfonso Rueda incidiu en que nesta xuntanza se analizaron todas as vías legais dispoñibles para frear este erro histórico e o golpe mortal que este veto suporía para a frota galega pois afectaría a uns 200 barcos de capital galego de xeito directo e a arredor dun milleiro de xeito indirecto. Por iso, comprometeu todo o apoio da Xunta tanto ao posible recurso do Estado como ás medidas legais que adopten as empresas armadoras pola súa conta.
Nesta liña, o presidente da Xunta lembrou que mañá se celebra unha reunión en Madrid co Ministerio de Agricultura, Pesca e Alimentación e co sector para analizar as posibles medidas a adoptar ante unha norma que se aprobou sen consultar ao sector e en base a datos parciais e desactualizados, poñendo en perigo artes tan selectivas como o palangre.
Entre as iniciativas que levará a cabo a Xunta, o presidente anunciou que se porá en contacto con Pedro Sánchez para trasladarlle a importancia destas artes de pesca para a actividade e o emprego en Galicia. Ademais, solicitará unha reunión co comisario de Medio Ambiente, Océanos e Pesca, Virginijus Sinkevicius, e o Goberno galego buscará aliados noutras autonomías e rexións europeas afectadas.
Algúns dos aspectos que se destacaron durante a reunión foi que a frota galega afectada realiza unha pesca totalmente sustentable que non é incompatible co coidado do medio ambiente. Ademais, lembraron distintos representantes do sector, non hai informes biolóxicos e socioeconómicos que avalen o veto, feito que amosa a falta de diálogo e de transparencia coa que actuou a Comisión Europea. De feito, incumpriu o seu compromiso de revisar a norma atendendo a novos datos e informes científicos.
Alfonso Rueda tamén salientou durante a súa intervención que o Goberno galego fará todo o posible para que a Comisión Europea rectifique e anule este regulamento que, tras saír publicado onte no Diario Oficial da Unión Europea, entrará en vigor a comezos de outubro deste ano.
Esta reivindicación parécenos completamente xusta e ademais participamos na aportación de documentación para intentar que non se tomara esta decisión, polo tanto agora temos que actuar con todo convencemento e con todos os medios para intentar revertela, manifestou.
O XXXVI Festival de Jazz de Lugo ofrecerá do 4 ao 14 de novembro un total de 22 actuacións que combinarán grandes figuras internacionais cunha ampla presenza de músicos galegos en catro escenarios. Conforme ao programa, o Auditorio Fuxan os Ventos acollerá a apertura o mércores 4 co trío do saxofonista e clarinetista cubano Paquito DRivera. Neste mesmo escenario actuarán Abe Rábade, o día 8, e Kenny Barron Trio, o 11. No Círculo das Artes sucederanse James Carter Organ Trio, o 5 de novembro; Jogo de Damas, o día 6; Takuya Kuroda Quintet, o 7; Patricia Brennan Septet, o día 12; Erik Truffaz & Antonio Lizana, o día 13, e Clarence Bekker Band, o 14 de novembro.
O informe da Dirección Xeral de Saúde Pública da Consellería de Sanidade sobre a actividade das infeccións respiratorias agudas referido á semana que rematou o 25 de outubro reflicte que a actividade gripal na comunidade mantén o seu nivel basal con tendencia crecente, constatando un incremento na dispensación de antigripais nas farmacias galegas. En concreto, a taxa de dispensación de antigripais nas farmacias aumentou un 38,9 % na última semana, mentres que a de probas de antíxenos se reduciu nun 17,9 %, tal e como informan as oficinas de farmacia integradas na rede sentinela impulsada pola Xunta, co obxectivo de anticipar a evolución dos virus respiratorios na comunidade.
