miércoles, 4 de noviembre de 2026
A Consellería do Mar, a través de Portos de Galicia, e ENCE pecharon un acordo polo cal se confirma a aposta por manter durante os vindeiros dez anos o porto de Ribadeo como opción loxística complementaria cara ás necesidades de transporte de ENCE. Mediante este acordo, ENCE comprométese a manter a súa actividade no porto de Mirasol como importante opción loxística no só para os movementos que seguirán sendo necesarios durante o desenvolvemento da infraestrutura ferroviaria prevista, tamén para as mercadorías adicionais e a pasta de papel derivada de ampliacións de capacidade da fábrica de Navia.
En total, o acordo contempla o transporte de entre 1 e 1,5 millóns de toneladas de pasta de celulosa que seguirán saíndo polo porto de Mirasol ata o ano 2020, mantendo así a súa actividade como centro xerador dun importante tráfico de mercadorías.
Durante a reunión mantida na Consellería do Mar, ENCE agradeceu o interese demostrado por Portos de Galicia para acadar o acordo polo que se mantén parte do tráfico de pasta de celulosa desde o porto de Mirasol, e que confirma -como a compañía de xestión forestal sostible vén asegurando- que Ribadeo seguirá sendo unha opción na súa planificación loxística, sen que esta alternativa afecte ao contrato firmado con FEVE.
Portos de Galicia vai acometer a curto prazo actuacións de mellora que tamén supoñen un importante esforzo inversor como son a dragaxe da canle de navegación e a mellora da liña de atraque do peirao, nun investimento que suporá uns 2,6 millóns de euros ou o estudo do nó loxístico de Ribadeo, con todos os axentes implicados na cadea loxística de transporte do tráfico de pasta de papel, que permita optimizar as operacións.
Segundo manifestou ENCE, o acordo coa Consellería do Mar, a través de Portos de Galicia, e o proxecto en desenvolvemento con FEVE son dúas medidas complementarias que garanten a medio e longo prazo a sostenibilidade das súas operacións desde o punto de vista económico, social e ambiental.
O Grupo ENCE está convencido de que o seu beneficio socioeconómico, aumentado agora coa ampliación da fábrica asturiana de Navia, seguirá sendo importante nesta zona da comunidade galega coa que a compañía ten un claro compromiso social, económico e ambiental.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur. De feito, destacan os altos rexistros acadados entre os días 9 e 15.
A Xunta de Galicia puxo en marcha a campaña de inmunización fronte á gripe e a COVID, que este ano incorpora como principais novidades a extensión da vacina antigripal de alta carga ás persoas de 65 a 69 anos e a ampliación do proxecto piloto de vacinación nos colexios a 75 centros educativos. O inicio oficial tivo lugar nun acto nas residencias de maiores e centros de discapacidade, o colectivo polo que arranca tradicionalmente a campaña debido á vulnerabilidade deste grupo fronte ás infeccións respiratorias.
