sábado, 24 de octubre de 2026
A directora xeral de Promoción da Igualdade, María Quintiana, presentou esta mañá no museo Centro Gaiás a exposición Historias LGBTI da Galicia Orgullosa e que se poderá visitar no hall de Tirantes ao longo do mes de agosto. Esta exposición forma parte da iniciativa global presentada o 28 de xuño polo Día internacional do Orgullo LGBTI e que se converterá nos próximos meses nun arquivo inédito de relatos de onte, hoxe e mañá que ten como obxectivo de tecer o relato máis amplo e diverso da Galicia Orgullosa.
María Quintiana amosou a súa satisfacción porque esta exposición estea no gran epicentro cultural de Galicia, o museo polo que pasan tantas persoas. Así, ademais de agradecer a todo o traballo para facelo posible, tamén destacou esta colaboración coa Cidade da Cultura como un paso máis adiante na visibilización das persoas LGBTI. Do mesmo xeito, avanzou que o obxectivo é que esta exposición poda seguir percorrendo distintos lugares de Galicia para presentar esta iniciativa.
Historias LGBTI da Galicia Orgullosa é un proxecto cunha visión a longo prazo para facer crecer a rede de relatos e lembranzas que axuden a construír un relato máis diverso e real da historia galega. Neste sentido, estase traballando nun espazo dixital colaborativo aberto á cidadanía que parte dunha selección de imaxes históricas e actuais para que calquera persoa poida contribuír a tecer o relato.
Neste sentido, durante a visita de hoxe, a directora xeral estivo acompaña pola investigadora e especialista en memoria LGBTI, Daniela Fernández, asesora científica do proxecto, quen explicou ao equipo técnico do Gaiás todo o traballo de recollida e os diferentes fitos e historias que se amosan nesta exposición. Ademais, esta iniciativa este traballo foi posible tamén grazas á colaboración do Consello da Cultura Galega a través de diversas fotografías do seu Centro de Documentación en Igualdade e Feminismos, Fondo especial MOFG e LGBTIQ+, así como do arquivo familiar de Maruja Roca, cunha das fotografías incluídas no libro O feitizo de Maruja Roca, editado pola Central Folque, coa edición fotográfica de Eutropio Rodríguez e os textos de Nieves Neira.
A exposición, que xa estivo durante o mes de xullo no edificio da Pirámide de San Caetano, recolle imaxes históricas de casos coñecidos, como o de Elisa e Marcela, e doutras experiencias vitais con menos eco como a de Maruja Roca, Manolito Soler ou Dalia Flores. Tamén se recollen momentos históricos do colectivo LGBTI galego, como a primeira celebración en Galicia no ano 1980 do Día Internacional do Orgullo Gai, o nacemento dos primeiros grupos de liberalización homosexual ou a posta en marcha das denominadas Comisións de Lesbianas da Asociación Galega da Muller (AGM).
O poder da simboloxía: encaixe e a cor rosa
O proxecto inspírase no encaixe de Camariñas, como símbolo de tradición e comunidade en Galicia. Así, igual que cada fío do encaixe constrúe unha rede complexa e bela, cada historia das persoas LGBTI contribúe a tecer unha memoria compartida, diversa e afectiva. Por outra banda, a cor rosa, que vertebra a proposta, foi resignificado polo movemento LGBTI como símbolo orgullo, memoria e resistencia e agora convértese na cor dunha Galicia Orgullosa.
Foi inaugurada no Museo do Pobo Galego a exposición 'Transfronteiriza', da artista e cineasta tudense Diana Gonçalves, que permanecerá aberta ao público ata o 28 de marzo de 2027. A mostra parte do documental 'Mulleres da Raia', da mesma autora, e froito de tres anos de investigación. A través da linguaxe cinematográfica, de materiais documentais, arquivos históricos e elementos patrimoniais, a proposta constrúe unha experiencia arredor da memoria compartida entre Galicia e o norte de Portugal. En concreto, Transfronteiriza recupera a memoria das mulleres que viviron na fronteira entre ambos territorios a mediados do século XX, que desempeñaron un papel fundamental no comercio transfronteirizo e na supervivencia económica das familias.
Trátase dunha iniciativa que nace como evolución de Circo Presente Continuo e que se vai desenvolver por primeira vez fóra de Madrid. A Cidade da Cultura, o Teatro Principal e o Salón Teatro serán as súas sedes na capital galega, reunindo artistas, compañías, profesionais da programación, distribuidoras e institucións para compartir proxectos e favorecer novas oportunidades de colaboración e contratación. O programa inclúe oito espectáculos, seis mostras breves e catro traballos en proceso. Entre as propostas figuran Naufragio, de Labsurda; Serena, de Circ Bover; Matrimonio, de Kolektivo Konika; Siku, de Jessica Arpin; e Sen patrón, de Pistacatro, que ofreceu un adianto artístico durante a presentación.
