Actualidad de Pesca

Tivo lugar o Consello Consultivo de Política Pesqueira para Asuntos Comunitarios no que se realizou un debate previo ao próximo Consello de Ministros de Pesca da UE, onde se abordará a comunicación da Comisión Europea en relación coas orientacións para a fixación das posibilidades de pesca para 2023. Nel Galicia defendeu a necesidade de que o próximo exercicio se incrementen as posibilidades de pesca das principais especies que captura a frota galega en augas comunitarias despois de varios anos de recortes. A propia Comisión Europea recoñece os avances rexistrados no estado das poboacións de peixes en augas comunitarias, especialmente no Atlántico Noreste onde a maioría das especies se atopan en niveis de rendemento máximo sustentable.

A conselleira do Mar, Rosa Quintana, explicou hoxe no Parlamento que a Xunta está a traballar nas medidas que é posible aplicar desde Galicia para apoiar á frota pesqueira e urxiu ao Goberno central a adoptar medidas de xeito inmediato para facer fronte á suba dos carburantes, á folga do transporte e ás consecuencias da guerra en Ucraína. A titular de Mar lembrou que nos últimos días mantivo reunións coas entidades representativas da frota pesqueira e da industria transformadora para analizar a evolución da súa actividade nas que se abordaron medidas de carácter autonómico como a bonificación do 100% das taxas dos portos galegos durante un mínimo de dous meses.

O director xeral de Relacións Exteriores e coa UE, Jesús Gamallo, foi invitado a participar na sexta reunión do Grupo de Contacto posto en marcha en 2020 entre o Comité Europeo das Rexións (CdR) e as rexións e municipios británicos. Entre os seus obxectivos, este grupo trata de afianzar a cooperación a nivel subnacional entre a UE e Reino Unido para compensar os contactos perdidos polo Brexit. No encontro abordouse de modo específico as dificultades de aplicación do Acordo de Comercio e Cooperación UE-Reino Unido que entrou en vigor a principios do pasado ano.

A conselleira do Mar, Rosa Quintana, mantivo hoxe unha xuntanza con representantes das principais entidades asociativas da frota galega para abordar a situación do sector ante a escalada nos prezos dos combustibles. Nela a titular de Mar expuxo a necesidade de actuar con celeridade e de adoptar medidas que teñan un efecto inmediato no sector, polo que demandou a convocatoria urxente dunha Conferencia Sectorial de Pesca por parte do Ministerio de Agricultura, Pesca e Alimentación para que o Executivo do Estado e as comunidades autónomas poidan avaliar distintas medidas a adoptar para afrontar o encarecemento do gasóleo, agravado nas últimas semanas pola guerra en Ucraína.

A conselleira do Mar, Rosa Quintana, puxo en valor o potencial e o peso da cadea mar-industria na economía de Galicia e defendeu a necesidade de que se adopten medidas específicas para os sectores máis afectados polo encarecemento dos carburantes, entre eles a pesca. Esta foi unha das demandas de Galicia expostas na Conferencia de Presidentes celebrada a pasada fin de semana e na que a comunidade galega tamén solicitou baixar os impostos que gravan os carburantes, a electricidade e o gas dentro dos parámetros que permite a Unión Europea para aliviar a situación da industria, da frota e da cidadanía.

A conselleira do Mar mantivo un encontro co representante permanente da Unión Europea na Organización Mundial de Comercio, Joao Aguiar, no que lle trasladou a preocupación de Galicia ante o impacto que poden ter no sector pesqueiro as distintas propostas da OMC e da Comisión Europea para eliminar ou reducir as bonificacións aos combustibles da frota, e entregoulle un informe que di que isto provocaría que boa parte da frota galega deixase de ser rendible.

A directora xeral de Pesca, Acuicultura e Innovación Tecnolóxica, Mercedes Rodríguez, expuxo na Comisión 8ª de Pesca e Marisqueo do Parlamento de Galicia que as estimacións realizadas pola Consellería do Mar sobre os recortes nos totais admisibles de capturas (TAC) e cotas no Cantábrico Noroeste e en augas de Francia aprobados no Consello de Ministros de Pesca da Unión Europea desta semana teñen un posible impacto na economía galega de máis de 16 millóns de euros, incluindo o impacto nas actividades vencelladas co sector marítimo-pesqueiro galego, que ten incidencia dalgún xeito en 64 das 81 ramas de actividade económica da comunidade.

A conselleira do Mar, Rosa Quintana, trasladou hoxe á directora xeral de Asuntos Marítimos e Pesca (DG MARE), Charlina Vitcheva, e a representantes doutros departamentos da Comisión Europea que a posible eliminación das bonificacións aos combustibles na pesca provocaría que a frota galega deixase de ser rendible. Así o reflicte o informe de Galicia que a titular de Mar lles entregou nas xuntanzas mantidas hoxe en Bruxelas e no que se dá conta do posible impacto no sector pesqueiro das distintas propostas da Organización Mundial de Comercio (OMC) e da Comisión Europea para eliminar ou reducir as bonificacións aos combustibles da frota.

A xornada Todas as oportunidades do mar: avanzando na economía azul enmárcase nas actividades promovidas pola Conferencia sobre o futuro de Europa e celebrouse de xeito presencial no Museo do Mar de Galicia, en Vigo, pero tamén puido seguirse online. A finalidade deste encontro é difundir as liñas de traballo xeradas no marco da economía azul en Galicia e promover o debate sobre elas, destacar as boas prácticas que contribúen a xerar un modelo de desenvolvemento sustentable en termos ambientais, sociais e económicos en relación co mar e implicar á sociedade civil e empresarial na configuración do futuro proxecto europeo.

O Executivo galego aprobou este ano 55 proxectos presentados polas confrarías de pescadores para modernizar os portos, lonxas e lugares de desembarque cun orzamento total de máis de 2,5 millóns de euros e que, con eles, a Xunta leva investidos desde 2016 máis de 10 millóns de euros en achegas para máis de 330 actuacións deste tipo. A Administración galega vai publicar esta mesma semana unha nova convocatoria de axudas para proxectos de modernización das infraestruturas dos portos pesqueiros, lonxas ou establecementos autorizados para a primeira venda dos produtos pesqueiros e dos lugares de desembarque que contará cun orzamento de 800.000 euros a repartir entre 2021 e 2022.