domingo, 9 de agosto de 2026
A conselleira do Mar, Rosa Quintana, reivindicou hoxe o papel de Galicia como unha das rexións europeas que máis apostaron pola economía azul nos últimos anos -polo que é un modelo a seguir para outros países- e defendeu a necesidade de continuar incidindo neste eido, o que contribuirá a impulsar a recuperación económica nas zonas costeiras trala pandemia pola covid-19. Con ese obxectivo, a comunidade traballa xa no deseño dunha estratexia galega para a economía azul que inclúa aos sectores relacionados co medio mariño e lle permita seguir sendo punteira.
A titular de Mar explicou durante a clausura da xornada Todas as oportunidades do mar: avanzando na economía azul que a comunidade galega é un exemplo de boas prácticas neste ámbito e que debe seguir avanzando e aproveitando as oportunidades que ofrece o mar. Neste sentido, a representante do Executivo galego lembrou que 64 das 81 ramas de actividade da economía galega teñen que ver coa mar, co océano e coa costa entre as que se inclúen a pesca, a acuicultura, o transporte marítimo, o naval, o turismo ou a actividade portuaria, entre outras.
Por iso, Rosa Quintana salientou no evento -organizado conxuntamente pola Vicepresidencia Primeira e Consellería de Presidencia, Xustiza e Turismo, a Consellería do Mar e a Secretaría de Estado para a Unión Europea do Ministerio de Asuntos Exteriores, Unión Europea e Cooperación no marco das actividades da Conferencia sobre o futuro de Europa- a transcendencia da crecemento azul como motor de futuro. Para logralo, incidiu, é fundamental cumprir coas directrices europeas de desenvolver unha economía azul responsable e sustentable, na liña das boas prácticas promovidas polo sector marítimo-pesqueiro galego, e apostou por reforzar a estratexia galega neste eido.
Queremos sustentala nas actividades marítimo-pesqueiras tradicionais e que teña como elementos clave a coordinación e a compatibilidade con outras actividades así como o equilibrio en termos ambientais, sociais e económicos, remarcou Rosa Quintana. Nesta liña, a conselleira do Mar puxo en valor o traballo realizado polos dous casos de éxito analizados durante a xornada: o plan de crecemento azul impulsado pola Autoridade Portuaria de Vigo desde 2016 e as estratexias de desenvolvemento local participativo postas en marcha polos oito grupos de acción local do sector pesqueiro (GALP) de Galicia.
A representante da Xunta recordou que o porto de Vigo aposta pola creación de emprego e riqueza vencellada co mar de xeito sustentable, respectuoso co medio ambiente e responsable co futuro das persoas así como coas súas condicións de traballo. En canto aos GALP, salientou o seu papel na dinamización das zonas costeiras. Desde 2016 puxéronse en marcha arredor de 500 proxectos co obxectivo de aumentar o emprego, diversificar a actividade no litoral de Galicia, protexer o patrimonio marítimo-pesqueiro e contribuír ao benestar social.
Por iso, Rosa Quintana subliñou a importancia de xornadas coma esta para que outras rexións europeas coñezan o bo traballo que se está a facer en Galicia e que poidan replicar accións e proxectos semellantes. O intercambio de experiencias e coñecementos, incidiu a conselleira, é fundamental para avanzar no desenvolvemento da economía azul e para facer fronte aos retos e desafíos que se presentan no futuro.
O evento
A xornada Todas as oportunidades do mar: avanzando na economía azul enmárcase nas actividades promovidas pola Conferencia sobre o futuro de Europa e celebrouse de xeito presencial no Museo do Mar de Galicia, en Vigo, pero tamén puido seguirse online. A finalidade deste encontro é difundir as liñas de traballo xeradas no marco da economía azul en Galicia e promover o debate sobre elas, destacar as boas prácticas que contribúen a xerar un modelo de desenvolvemento sustentable en termos ambientais, sociais e económicos en relación co mar e implicar á sociedade civil e empresarial na configuración do futuro proxecto europeo.
O evento foi inaugurado polo director xeral de Relacións Exteriores e coa UE da Xunta, Jesús Gamallo, e polo conselleiro técnico da Dirección Xeral de Coordinación do Mercado Interior e Outras Políticas do Estado do Ministerio de Asuntos Exteriores, UE e Cooperación, José María Escudero. Trala inauguración abordouse como primeiro bloque temático O crecemento azul como motor de futuro: o exemplo da Autoridade Portuaria de Vigo, coa exposición de varios proxectos como exemplos de boas prácticas neste eido.
O segundo bloque temático da xornada, titulado As estratexias de desenvolvemento local participativo nun futuro de diversificación da economía marítimo-pesqueira, foi presentado pola directora xeral de Desenvolvemento Pesqueiro da Consellería do Mar, Susana Rodríguez, que deu paso á exposición de catro exemplos de proxectos desenvolvidos ao abeiro dos GALP de Galicia: o proxecto Tanza, o Plan de produción de aceite de microalgas, o Hotel Bela Fisterra e a iniciativa Pescaturismo Praia Sanxenxo.
A loita contra os incendios forestais suma un novo aliado tecnolóxico ao servizo de toda a sociedade. A aplicación móbil ALume, deseñada para facilitar que calquera persoa poida dar a alarma sobre un foco de lume de forma inmediata e precisa, xa se atopa plenamente operativa e dispoñible para a súa descarga de balde nas plataformas Android e iOS. O obxectivo principal desta ferramenta é potenciar a detección temperá dos incendios forestais. Nunha emerxencia no monte, os primeiros minutos son decisivos para evitar que un foco inicial se converta nun gran incendio; por iso, ALume nace para acurtar os tempos de aviso e facilitar ao servizo de extinción datos exactos antes de despregar os medios sobre o terreo. Cabe sinalar que a aplicación leva xa 7.000 descargas e 200 notificacións que axudaron ao operativo.
Un dos grandes atractivos desta undécima edición será a estrea de dez novos espectáculos, todos eles impulsados por compañías galegas, un dato que evidencia o dinamismo creativo do sector dos monicreques na Comunidade. A programación abrirase coa nova versión de A festa dos títeres, presentada por Viravolta, Vai de Roda e Títeres Alakrán, para continuar coa estrea de Treco-lerias, de Trécola Producións, e A rosa de papel, adaptación ao teatro de monicreques do texto de Valle-Inclán realizada por Alakrán.
