Noticias cultura
A 20ª Mostra Internacional de Cinema Etnográfico do Museo do Pobo Galego abre a vindeira semana en Santiago de Compostela o calendario anual de festivais audiovisuais que veñen recibindo o apoio da Xunta a través da liña específica de subvencións para estes eventos profesionais. A programación estenderase do 12 ao 16 de marzo con 13 filmes a concurso, máis de 40 proxeccións fóra do certame e diversas actividades paralelas para todos os públicos entre as que destaca a sesión inaugural protagonizada polo documental O carro e o home, recentemente dixitalizado pola Filmoteca de Galicia.
Vénse de abrir o prazo de inscrición para a V Residencia literaria da Cidade da Cultura, que inicia unha nova etapa baixo a dirección da escritora e xestora cultural, Eva Mejuto. Esta nova convocatoria amplía a súa oferta para acoller, ademais de proxectos de narrativa, propostas teatrais e de poesía inéditos de autoras e autores emerxentes e escritos en galego. Ofrécense un total de 10 prazas, sete delas reservadas para persoas nacidas en 1989 e anos posteriores, que queiran perfeccionar as súas obras co acompañamento de autoras e autores de primeiro nivel nas letras galegas e españolas.
Foi inaugurada na Biblioteca e Arquivo de Galicia a exposición 'Mulleres artistas: aprendendo o oficio' enmarcada na programación con motivo do Día da Muller, que se celebra o vindeiro 8 de marzo. Trátase dunha mostra coa que se convida a reflexionar sobre o acceso da muller á educación artística e que se poderá visitar na Cidade da Cultura ata finais deste ano. A mostra artéllase a partir de documentos históricos orixinais de entre 1785 e 1962, procedentes de dúas institucións fondamente enraizadas na cidade de Santiago de Compostela: a Real Sociedade Económica de Amigos do País e da Escola de Artes e Oficios.
A Filmoteca de Galicia conmemora o Día da Muller durante todo marzo cunha nova edición do programa Olladas de Muller, coa proxección de 11 filmes e curtametraxes de autoría feminina, e con dúas actividades do ciclo Close-up, que ofrece un encontro con Jonás Trueba e Itsaso Arana e unha mesa de debate arredor da programación con perspectiva integradora. Neste mes, a cinemateca acolle un especial sobre o cineasta nipón Shinji Sōmai e dálle continuidade á retrospectiva sobre o director e produtor catalán Pere Portabella. Do 5 ao 8 de marzo regresa á sala José Sellier da Coruña o ciclo gratuíto Olladas de Muller, coa visita de tres directoras galegas para presentar as súas últimas películas: Prefiro condenarme, de Margarita Ledo Andión (mércores 5); Filmei paxaros voando, de Zeltia Outeiriño (xoves 6), e As Neves, de Sonia Méndez (venres 7).
O concurso escolar sobre o Día das Letras Galegas convocado pola Consellería de Cultura, Lingua e Xuventude e a de Educación, Ciencia, Universidades e Formación Profesional, e dirixido aos centros de ensino público, xa ten gañadores. Así, nesta edición a comisión avaliadora decidiu que os mellores traballos, coas cantareiras e a poesía popular oral como protagonistas, corresponden ao colexio Celso Emilio Ferreiro, do municipio coruñés de Cerceda, na categoría de Infantil e Primaria, e ao Instituto Castelao, de Vigo, na categoría de Secundaria. A iniciativa convidaba aos estudantes a elaborar unha exposición centrada na obra, a época e a situación sociolingüística da etapa histórica na que viviron as mulleres que protagonizan a efeméride en 2025.
A Biblioteca de Lugo organiza un 'escape room' para escolares de sexto curso de Educación Primaria de Lugo arredor da figura de Castelao, que se desenvolverá na Biblioteca Pública entre o 10 de marzo e o 21 de abril. Esta iniciativa combinará xogo e literatura para implicar aos rapaces e rapazas na celebración do Ano Castelao, resolvendo misterios e retos baseados nos seus textos, ilustracións e ideais. 'Pescudando en Castelao. O tesouro das cousas' propón un xogo de pistas que cada grupo de alumnos deberá resolver no prazo dunha hora. Os participantes, 'detectives literarios', deberán adentrarse na Biblioteca para descifrar unha serie de enigmas baseados na vida e obra de Castelao. A meta é descubrir unha mensaxe oculta que o autor deixou nos seus escritos e debuxos, e só superando todos os pasos poderán desbloquear a mensaxe final.
O festival internacional de animación Imaxinaria regresa por terceiro ano consecutivo á Coruña para amosarlle ao público galego unha selección das máis destacadas curtametraxes europeas neste ámbito. O certame desenvolverase do 12 ao 16 de marzo arredor dunha sección competitiva e varias paralelas, como a que se lle dedica este ano á animadora británica Joanna Quinn. Na sede coruñesa de Afundación poderán verse as 43 películas a concurso da Sección Oficial, das que 38 proceden de diferentes países europeos e, na súa meirande parte, terán aquí a súa estrea española ou galega. Entre as fitas seleccionadas, figura Sobre el rostro, da galega Uxía Larrosa Villanueva.
A Cidade da Cultura promove a estrea este venres de Mala vida e pior morte do rei Ricardo III, unha peza teatral que confronta con humor o cruel retrato da traxedia de Shakespeare protagonizada polo monarca inglés. O espectáculo, que esgotou entradas para esta fin de semana, compón o volume XII das Clásicas desfeitas, o ciclo impulsado polo Centro Dramático Galego e a Cidade da Cultura que revisa obras fundamentais da literatura desde unha óptica contemporánea. O actor e dramaturgo Evaristo Calvo, co-fundador do dúo cómico Mofa e Befa, pon a coroa nesta nova creación escénica para encarnar un Ricardo III que defende non ter sido nin tan malvado nin tan asasino como o quixeron facer ver Shakespeare e algúns historiadores da época.
Tivo lugar hoxe a presentación danova edición do podcast literario Entreliñas, o programa en formato radiofónico impulsado pola Consellería de Cultura, Lingua e Xuventude para dar a coñecer a actualidade literaria galega e a actividade das bibliotecas públicas. Trátase dunha fórmula atraente para achegarnos ao mundo do libro dunha maneira diferente cun formato que se adapta aos tempos de hoxe', e polo que xa teñen pasado autores e autoras como Marilar Aleixandre, Ismael Ramos, Estíbaliz Espinosa, María Solar, Ledicia Costas ou Dores Tembrás. Nesta edición dáse continuidade con nomes como a escritora Fina Casalderrey, que opta ao premio internacional Memorial Astrid Lindgren. Os oito capítulos que se emitirán a partir de abril tamén porán o foco nos grandes acontecementos de 2025.
O Centro Galego de Arte Contemporánea ofrece a mostra 'Resignificacións', que se poderá ver ata o mes de setembro. Trátase dunha exposición comisariada por Alicia Murría que traza un percorrido pola produción artística de Concha Jerez, galardoada co Premio Nacional de Artes Plásticas en 2015, entre outros galardóns, e José Iges, recoñecido compositor, intérprete, teórico da arte sonora e, ademais, destacado creador de radioarte. Aberta ata o 7 de setembro, Resignificacións é unha confluencia de linguaxes onde conviven imaxes fixas e en movemento, sons, fotografías, obxectos reutilizados, entrevistas, obras ideadas para radio, videoperformance ou documentos, Jerez e Igés compoñen unha especie de paisaxes visuais e sonoras que analizan o mundo que nos rodea.
'Era unha débeda que tiñamos desde a Universidade', asegurou este martes o reitor Antonio López na Facultade de Filoloxía, na presentación da Cátedra Institucional Castelao, creada na USC, para promover a difusión e proxección cara ao futuro da vida e da obra de Alfonso Daniel Rodríguez Castelao e a lingua e a cultura galegas. O reitor asegurou que permitirá 'abrir as portas' do coñecemento arredor de Castelao e da súa época e levalo desde o ámbito académico á sociedade, converténdose nunha ferramenta 'fabulosa' para facer 'que a cultura chegue á cidadanía'.
A Cátedra Internacionl José Saramago e o grupo de investigación BiFeGa da UVigo acaban de lanzar unha nova proposta cultural para este outono, trátase do ciclo de cinema Mulheres (d)e Abril. As realizadoras e a revoluçao, unha reflexión crítica sobre a visión das realizadoras portuguesas en torno a tres momentos clave da historia de Portugal: o período colonial, o proceso político que culminou na Revolução dos Cravos, e a loita pola emancipación da muller e o movemento feminista.
Despois da estancia en Portugal co gallo do Festival da Plataforma Transfronteiriza do Teatro Amador, retomamos as actividades da XVII Mostra de Teatro Amador Terras do Orcellón' con novas forzas. O venres, día primeiro de novembro chega o grupo Disfunción Continua da Estrada (Pontevedra) coa comedia ENTRAÑAS NEGRAS para que botemos unhas risas coa historia de tres irmáns, Isaura, Hortensia e Aurora, que están a velar o cadáver do defunto marido de Isaura no pazo familiar, onde semella que os reloxos quedaron parados noutro tempo.
'Bravú XXX', documental producido por Nós Televisión para conmemorar o 30º aniversario dese movemento musical, poderá verse no vindeiro mes de novembro en 25 pequenos e medianos concellos da Coruña, co apoio da Deputación. O filme incluído na programación do ciclo Outono das Artes, que organiza o departamento provincial de Cultura, chegará a auditorios, edificios de usos múltiples, casas de cultura, bibliotecas, centros sociais, culturais e de ensino.
O son en todas as súas posibles representacións: o son que se escoita, o son que se mira, se presenta, se intúe e se lembra. O son como material e o son como significante. Este o eixo central e vertebrador da exposición Ollo á orella, 8 obras sonoras e unha partitura colectiva, que recolle creacións de dez artistas que teñen en común o seu paso pola Facultade de Belas Artes de Pontevedra. A exposición, que se pode visitar a partir do venres na Fundación Laxeiro, está comisariada polo profesor Ignacio Barcia
O profesor da Facultade de Filoloxía Joel Varela Rodríguez acaba de publicar en USC Editora o volume Más allá del Códice Calixtino. Otros textos en torno a Santiago el Mayor hasta el siglo XII, no que se recollen catro textos xacobeos inéditos anteriores á famosa guía medieval para as peregrinacións a Compostela. No libro recóllense ademais textos ou fragmentos de textos xa coñecidos e moi relevantes para o coñecemento do culto xacobeo, dende as súas orixes máis antigas ata o ano 1200, algúns deles revisados.
A AGAPI vén de facer públicos os proxectos seleccionados para a III Edición do AGAPI IMPULSA COPROS, un programa gratuíto de asesoría personalizada para mellorar e orientar no seu financiamento proxectos de coprodución para cinema e televisión. O comité desta III Edición, formado por profesionais de recoñecido prestixio dentro do ámbito da produción executiva, estivo composto por Raúl García de Meteórica Cine, Pilar Abades de Illa Bufarda e Javi Lopa de Undodez.
O xoves, día 17 de outubro, ás 19.30 horas en NORMAL, o Espazo de Intervención Cultural da Universidade da Coruña, terá lugar a inauguración da exposición Fío do Norte, comisariada por Juan Luis Toboso en diálogo con Filipa Ramos. O evento contará,ás 20:00 horas, co concerto de Carme López, que engadirá unha experiencia sonora única á inauguración.
A Intelixencia Artificial e os seus retos de futuro é a temática central da vindeira sesión dos Encontros de Lúa Chea que terá lugar este mércores 16, ás 19.00 horas, na cafetaría da Escola Politécnica Superior de Enxeñaría (EPSE) do Campus de Lugo. Este programa de debate sobre cuestións de actualidade organizado polo colectivo universitario Proxéctate en Galego e incluído dentro da programación do Outono Cultural, contará nesta ocasión coas intervencións de Roberto Iglesias Rodríguez e Juan Antonio Corrales Ramón.
'Cando se fala hoxe en día de atopar a túa voz, penso que se fai referencia a unha certa maneira de ollar o próximo, de ollar o mundo', sinala o cineasta Álvaro Gago, quen situou no próximo, na contorna persoal, o punto de partida das curtametraxes que desenvolven co seu asesoramento nove estudantes de Belas Artes e Comunicación Audiovisual. O director de Matria é o responsable de impartir o obradoiro 'Cine rachado e consciente na praza do teu pobo'.
