Noticias cultura
A Cidade da Cultura promove a estrea este venres de Mala vida e pior morte do rei Ricardo III, unha peza teatral que confronta con humor o cruel retrato da traxedia de Shakespeare protagonizada polo monarca inglés. O espectáculo, que esgotou entradas para esta fin de semana, compón o volume XII das Clásicas desfeitas, o ciclo impulsado polo Centro Dramático Galego e a Cidade da Cultura que revisa obras fundamentais da literatura desde unha óptica contemporánea. O actor e dramaturgo Evaristo Calvo, co-fundador do dúo cómico Mofa e Befa, pon a coroa nesta nova creación escénica para encarnar un Ricardo III que defende non ter sido nin tan malvado nin tan asasino como o quixeron facer ver Shakespeare e algúns historiadores da época.
Tivo lugar hoxe a presentación danova edición do podcast literario Entreliñas, o programa en formato radiofónico impulsado pola Consellería de Cultura, Lingua e Xuventude para dar a coñecer a actualidade literaria galega e a actividade das bibliotecas públicas. Trátase dunha fórmula atraente para achegarnos ao mundo do libro dunha maneira diferente cun formato que se adapta aos tempos de hoxe', e polo que xa teñen pasado autores e autoras como Marilar Aleixandre, Ismael Ramos, Estíbaliz Espinosa, María Solar, Ledicia Costas ou Dores Tembrás. Nesta edición dáse continuidade con nomes como a escritora Fina Casalderrey, que opta ao premio internacional Memorial Astrid Lindgren. Os oito capítulos que se emitirán a partir de abril tamén porán o foco nos grandes acontecementos de 2025.
O Centro Galego de Arte Contemporánea ofrece a mostra 'Resignificacións', que se poderá ver ata o mes de setembro. Trátase dunha exposición comisariada por Alicia Murría que traza un percorrido pola produción artística de Concha Jerez, galardoada co Premio Nacional de Artes Plásticas en 2015, entre outros galardóns, e José Iges, recoñecido compositor, intérprete, teórico da arte sonora e, ademais, destacado creador de radioarte. Aberta ata o 7 de setembro, Resignificacións é unha confluencia de linguaxes onde conviven imaxes fixas e en movemento, sons, fotografías, obxectos reutilizados, entrevistas, obras ideadas para radio, videoperformance ou documentos, Jerez e Igés compoñen unha especie de paisaxes visuais e sonoras que analizan o mundo que nos rodea.
A Academia Galega do Audiovisual deu a coñecer as candidaturas finalistas dos seus XXIII Premios Mestre Mateo, así como os detalles da cerimonia de entrega que terá lugar no Concello de Lalín o vindeiro 15 de marzo. A actual edición dos galardóns bateu o récord de candidaturas inscritas, tanto nos apartados de produción, cun total de 199 obras, como de profesionais, con 536 participantes. A categoría de longametraxes mantivo a cifra do ano pasado, con 10 filmes, en tanto que as de programa de televisión, curtametraxe en imaxe real e curtametraxe de animación superaron a marca de aspirantes de toda a historia dos premios.
Do 11 ao 15 de febreiro, o XXIX Festival Internacional de Teatro Universitario da USC abre en Compostela unha fiestra ás creacións teatrais desenvolvidas por compañías das contornas galega, estatal e europea. Ademais da Aula de Teatro da USC, nesta edición participan as escolas de teatro das Universidades de Castela A Mancha, de Xaén, de Vilnius Gediminas de Lituania e de Beira Interior de Portugal. Esta é unha actividade xa incluída na programación da Primavera Cultural da USC. Todas as representacións desta cita anual organizada desde a Aula de Teatro da USC desenvolveranse no Salón Teatro de Santiago de Compostela ás 20.30 horas e a entrada é de balde previo paso pola billeteira, que abrirá cada día ás 19.00 horas.
No marco da conmemoración do 60 aniversario do nacemento do graffiti contemporáneo, a Consellería de Cultura, Lingua e Xuventude trae ao Gaiás a Cornbread, artista estadounidense considerado o primeiro grafiteiro contemporáneo e un dos pioneiros deste movemento que transformou a expresión artística e a cultura urbana a nivel mundial. Darryl A. McCray, coñecido internacionalmente por Cornbread, o nome co que enchía as paredes da súa Filadelfia natal nos anos 60, compartirá a súa historia nunha conferencia este mércores 5 de febreiro ás 17,00 horas no Auditorio 1 do Edificio CINC da Cidade da Cultura. Con este evento, o artista inicia unha xira que o levará por centros culturais de toda Europa.
A Filmoteca de Galicia inicia a súa programación en febreiro cunha completa retrospectiva sobre o produtor, guionista e director Pere Portabella, protagonista da nova carteleira mensual na que tamén destacan as visitas de cineastas como Mar Coll, Oskar Alegria e Raúl Alaejos. Durante as vindeiras semanas, a cinemateca exhibirá todas as películas dirixidas polo cineasta catalán, do que no mes de marzo se ofrecerá tamén un amplo percorrido polos seus traballos como produtor. Recentemente distinguido coa Medalla de Ouro ao Mérito nas Belas Artes, este ciclo preséntase como un anticipo da celebración oficial do Centenario Portabella, que veñen de anunciar o Ministerio de Cultura e a Generalitat de Cataluña para o seu desenvolvemento conxunto nos anos 2026 e 2027.
Nas vitrinas da mostra inclúense desde postais de Nadal que Xosé Vizoso enviaba ás súas amizades ata un busto de Vidal Bolaño que realizou para a carballeira de Santa Minia en Brión, pasando polo mosaico do Bosque do Banquete de Conxo, pezas de cerámica, libros ilustrados, un tarot que realizou xunto con Manuel Aneiros ou carteis de decenas de celebracións populares. Ao longo da exposición, e a través dos distintos carteis de festas populares que realizou, pódese observar a evolución do seu estilo. Cores alegres e trazos aparentemente sinxelos caracterizan a obra deste autor, que acubilla a esencia da cultura galega. A mostra tamén acolle un vídeo realizado pola Asociación Galega de Profesionais da Ilustración.
A Cidade da Cultura acaba de ser elixida como insignia da cultura galega en 2024 polo Observatorio da Cultura da Fundación Contemporánea, un prestixioso informe elaborado coas valoracións de máis de 400 expertos e profesionais de toda España que mantén a Galicia, repetindo o posto do 2023, como a sexta comunidade pola calidade e innovación da súa oferta. Trátase dun recoñecemento que foi entregado hoxe en Málaga á directora xerente da Fundación Cidade da Cultura, Ana Isabel Vázquez. Así, a programación que a Xunta de Galicia desenvolve no Gaiás volve encabezar a listaxe do mellor da cultura galega, ao igual que o fixera en 2023 e 2020, encadeando este equipamento seis anos consecutivos ocupando as tres primeiras posicións do ranking galego.
Foi presentado no Arquivo Histórico Provincial de Ourense un libro que recompila os 100 primeiros números da publicación Fronda, coa que a entidade difunde o seu labor e a importancia dos seus fondos desde o ano 2006. O volume, 100 números de Fronda recolle os exemplares da única publicación deste tipo que existe na actualidade en Galicia e cuxa cronoloxía abrangue material que vai desde a Idade Media á época Contemporánea. Ademais, destaca a colaboración durante estes anos de persoas vencelladas ao ámbito universitario e centros de investigación como o Instituto Padre Sarmiento.
A Universidade de Santiago de Compostela mantén unha liña de colaboración activa co festival de curtas Curtocircuíto que lle permite acoller nas súas instalacións diversas actividades abertas ao público en xeral e todas gratuítas, ademais de fornecer o festival de 25 estudantes voluntarios e voluntarias que terán a oportunidade de coñecer como funciona desde dentro un certame destas características e dar aloxamento nunha das súas residencias universitarias á fotógrafa Rocío Madrid.
Achegar a música clásica á comunidade universitaria e á cidadanía próxima aos tres campus da Universidade constitúe, como sinala a vicerreitora de Extensión Universitaria, Susana Reboreda, o obxectivo de A Clásica na UVigo: Ciclo de Cámara nos Campus, que nas próximas semanas levará a Pontevedra, Ourense e Vigo o Dúo Fuchs, integrado polo violinista Mauro José Mariño e a violinista e violista Jennifer Gómez.
Desde especialistas en historia da arte ou literatura, a expertos en manga e anime, o cómic e a animación xaponesas, pasando por académicas e académicos especializados en arquitectura, turismo ou política internacional. Un total de 72 investigadores participan en Pontevedra no XVI Congreso nacional e VII Congreso internacional da Asociación de Estudios Japoneses en España, que se desenvolve por primeira vez en Galicia da man do grupo de investigación dx5.
O 25 de setembro, ás 19:30 horas, no Teatro Rosalía de Castro da Coruña, a Asociación de Escritoras e Escritores en Lingua Galega celebra a vixencia da figura de Luísa Villalta cun recital poético-musical, vinte anos despois do seu pasamento, na secuencia das homenaxes que tiveron lugar en 2004 e 2014. O acto, conducido por Cesáreo Sánchez Iglesias e Beatriz Maceda, contará coas interpretacións musicais de Florian Vlashi e César Morán.
Dentro da Semana de Cine de Lugo, este luns na Deputación Provcincial, vaise presentar o libro 'BAÑOS FILMS, 70 ANOS DE CINE EN GALICIA', de Manuel Curiel Fernández. O libro percorre a historia das tres xeneracións da familia Baños, dedicados á distribución de cine en Galicia os últimos setenta anos, e vencellados á Semana de Cine de Lugo desde o seu nacemento en 1979. Na presentación intervirá Manuel Curiel, membros da familia Baños, e representantas das institucións que apoian a Semana de Cine.
O Orfeón Lucense, xunto coa Catedral, o Bispado de Lugo e a familia Castiñeira, convoca o 'Premio José Castiñeira de Humanidades'. Concederase a persoas ou institucións que se distingan polo seu labor humanístico, nas artes ou nas letras, a prol da convivencia social e na mellora das relacións humanas, seguindo o exemplo de José Castiñeira. O premio, que se convocará anualmente, non ten dotación económica e consistirá nunha placa que deixe constancia do nomeamento.
O Consello Directivo da Asociación de Escritoras e Escritores en Lingua Galega (AELG) ratificou a decisión de que Xosé Manuel Beiras reciba a Homenaxe O Escritor na súa Terra-Letra E en 2025, na cidade de Santiago de Compostela, destacando, dentro da súa extensa traxectoria vital, a súa faceta como ensaísta e tradutor, así como a súa xenerosa colaboración coa AELG, sendo parte do Consello Directivo da Asociación entre 1982 e 1986.
O Galician Freaky Film Festival presentou esta mañá o programa completo da súa oitava edición, que está dispoñible na web do evento. O certame internacional de cine freak e fantástico conságrase como o maior festival de cine de Vigo e un dos poucos eventos adicados ao sétimo arte que existen hoxe en día na cidade. A presentación tivo lugar na que será a sede do frikismo entre o 20 e o 28 de setembro, a Plaza Elíptica.
O Premio Rebulir de Cultura Galega nace no ano 2012 como un recoñecemento a persoas e colectivos que contribúan á difusión e posta en valor da cultura autóctona nas súas diferentes manifestacións. Un dos aspectos que defende este galardón é a proxección do nome de Galicia alén das súas fronteiras, facendo fincapé no establecemento de vínculos interculturais e de raíz.
Comeza no Ateneo de Ourense o próximo 18 de setembro, mércores, un ciclo de conferencias sobre a figura de Prisciliano e a súa importancia na historia europea, española e galega. A conferencia correrá a cargo de D. VICTORINO PÉREZ PRIETO, doutor en Teoloxía pola Universidade Pontificia de Salamanca e doutor en Filosofía pola Universidade de Santiago de Compostela, profesor universitario xubilado, nas Universidades da Coruña, Santiago, Bogotá e, ultimamente, na Universidade de Lasalle (Madrid).
