jueves, 1 de mayo de 2025
A Academia Galega do Audiovisual deu a coñecer as candidaturas finalistas dos seus XXIII Premios Mestre Mateo, así como os detalles da cerimonia de entrega que terá lugar no Concello de Lalín o vindeiro 15 de marzo e que conta co apoio da Xunta de Galicia para a súa organización como o gran evento anual para a visibilidade e o recoñecemento do sector.
O director da Axencia Galega das Industrias Culturais, Jacobo Sutil, participou hoxe no Pazo Provincial de Pontevedra no acto de presentación desta gala xunto con Álvaro Pérez Becerra, presidente da Academia, e representantes do resto das institucións e entidades colaboradoras, ademais da actriz Susana Sampedro e o sonidista David Machado, encargados de facer lectura dos proxectos e profesionais finalistas que concorren ás 25 categorías convocadas nos premios.
Segundo se informou, a actual edición dos galardóns bateu o récord de candidaturas inscritas, tanto nos apartados de produción, cun total de 199 obras, como de profesionais, con 536 participantes. A categoría de longametraxes mantivo a cifra do ano pasado, con 10 filmes, en tanto que as de programa de televisión, curtametraxe en imaxe real e curtametraxe de animación superaron a marca de aspirantes de toda a historia dos premios.
Auxe da produción en galego
Máis da metade das producións inscritas teñen a súa versión orixinal en galego, en concreto un 68,6%, o que supón un incremento de máis de tres puntos con respecto aos datos da pasada edición. Neste sentido, o representante da Consellería de Cultura, Lingua e Xuventude destacou o labor do audiovisual na promoción do noso idioma propio, xa que as cifras achegadas equivalen a constatar que 2 de cada 3 proxectos presentados o fan en galego.
Jacobo Sutil tamén subliñou o papel de incentivo e de posta en valor do sector audiovisual que implican os Mestre Mateo, así como a comprobación da crecente participación feminina en todos os ámbitos da profesión. Fixo referencia, así mesmo, á importancia económica dun sector que cifrou en máis de 440 M de facturación e 2500 empregos directos na nosa Comunidade e defendeu a contribución das subvencións ao audiovisual que cada ano convoca a Xunta de Galicia para o avance do sector. Neste punto, avanzou a publicación o vindeiro 14 de febreiro no Diario Oficial de Galicia da nova convocatoria de axudas á produción e coprodución por valor de 3M.
Descentralización cultural
A Academia Galega do Audiovisual anunciou que a gala deste ano sae por vez primeira do circuíto das grandes cidades galegas para ter lugar na capital da comarca do Deza, no espazo Lalín Arena. A dirección artística correrá a cargo da coreógrafa e bailarina Marta Alonso, con guión de Carlota Mosquera e Manolo Cortés, e estará conducida sobre o escenario pola actriz e presentadora Teté Delgado. Durante o acto, tamén foi presentado o cartel desta 23ª edición dos premios, que se desenvolve baixo o lema O audiovisual en movemento.
En canto aos títulos e profesionais finalistas desta 23ª edición, destacan na listaxe deste ano a serie Rapa e as longametraxes As Neves, Honeymoon e + Cuñados, producidas con subvención da Xunta de Galicia, que suman 40 das candidaturas.
A Filmoteca de Galicia inicia en maio unha retrospectiva arredor do actor italiano Marcelo Mastroianni como parte dunha carteleira na que tamén sobresaen as visitas de dous destacados nomes do actual panorama cinematográfico estatal: Alauda Ruiz de Azúa e Albert Serra. A oferta mensual da cinemateca da Xunta arranca este venres 2 con Corazón Salvaje, que se exhibe na recta final da homenaxe que se lle está a dedicar ao director David Lynch tralo seu recente pasamento. A nova programación inclúe tamén un repaso ás tres longametraxes do cineasta galego Raúl Veiga e a habitual colaboración co festival Play-Doc de Tui, que desta volta pon o foco en dúas figuras do cinema independente norteamericano: Monte Hellman e Elaine May.
Ou Yeah! é unha nova iniciativa arraigada no territorio, comprometida coa súa xente e deseñada para proxectar Ourense ao mundo. A súa esencia é a transformación: do local ao global, do tradicional ao contemporáneo, do escenario ao prato, do concerto ao encontro. Deste xeito, o festival, que ten como columna vertebral o rock, entendido nun sentido amplo, plural e actual, conxuga música, gastronomía, identidade e impacto territorial. Ou Yeah! espallarase pola provincia de Ourense entre os meses de xullo e outubro de 2025. O primeiro concerto terá lugar na capital da provincia, na explanada de Expouerense, o sábado 12 de xullo, da man de bandas de referencia internacionais, nacionais e galegas como The Waterboys, Morgan, Escuchando Elefantes e Tesouro.
