Noticias cultura
O programa de intercambio cultural Camiño Escena Norte presentou en Santander as principais novidades da súa sétima edición, que terá lugar do 12 de setembro ao 26 de outubro coa participación de 18 compañías de teatro, circo, danza e artes do movemento de Galicia, Asturias, Cantabria, País Vasco, Navarra e, como nova incorporación en 2025, A Rioxa. Nesta iniciativa poderán verse os espectáculos procedentes das outras cinco comunidades autónomas, mentres que as compañías Chévere, Paula Quintas Cía. e Pérez & Fernández foron seleccionadas para xirar polo resto dos territorios en representación das nosas artes escénicas.
Inaugúrase este xoves 26 de xuño na Cidade da Cultura a exposición inmersiva 'Castelao. Mirar por Galicia', o primeiro proxecto galego de arte dixital que recupera a figura dunha personaxe histórica emblemática da nosa cultura con intelixencia artificial e cun amplo abano de tecnoloxías dixitais que inclúen hologramas, videomapping ou realidade virtual. Trátase dun proxecto realizado pola Fundación Castelao en colaboración coa Xunta de Galicia, e encadrado na programación da conmemoración deste 2025 como Ano Castelao, que propón unha visión anovadora da vida e universo artístico de Castelao, recreando a súa imaxe e a súa voz, de xeito hiperrealista, e partindo dunha ampla base de documentación histórica e arquivos visuais conservados en diferentes institucións.
O Consello da Xunta aprobou o decreto que declara Ben de Interese Cultural a Ofrenda do Antigo Reino de Galicia ao considerar acreditado o seu valor sobranceiro como patrimonio inmaterial do pobo galego, o que supón a aplicación do réxime de tutela da Lei de Patrimonio cultural e, polo tanto, o maior nivel de protección. Esta declaración chega tras recibir os informes favorables dos catro órganos aos que se lle solicitou: o Consello da Cultura Galega, o Museo do Pobo galego, o Instituto de Estudos Galegos Padre Sarmiento e a Facultade de Humanidades da Universidade de Santiago de Compostela. Ademais, no proceso de exposición pública para o seu recoñecemento non rexistrou ningunha alegación.
O presidente da Xunta, Alfonso Rueda, anunciou hoxe o nome dos cinco galardoados coas Medallas Castelao 2025, despois de que o Consello aprobase esta mañá concedérllelas ao grupo Luar na Lubre, ao escritor Víctor Freixanes, ao empresario Emilio Pérez Nieto, á médico de familia Rosa Rodríguez Álvarez e á Asociación Galega de Afectados de Esclerose Lateral Amiotrófica (Agaela). 'Trátase dun dos recoñecementos máis importantes que outorga a nosa comunidade', subliñou. Rueda salientou que unha das medallas vai para o grupo Luar na Lubre, unha das bandas de música de raíz 'máis internacional de Galicia' e que neste 2025 celebra o seu 40 aniversario.
A Filmoteca de Galicia recibiu esta mañá na súa sede da Coruña o alumnado dos tres colexios galegos participantes no programa Cinema en curso para a estrea das películas que realizaron co acompañamento dos cineastas Alejandro T. Tarraf, Fon Cortizo e Ángel Santos no marco desta iniciativa pedagóxica internacional. Nesta nova edición de Cinema en curso participaron 44 estudantes e sete docentes de sexto de Primaria dos colexios A Reigosa de Ponte Caldelas, A Rúa de Cangas e Tenorio de Cerdedo-Cotobade. A Filmoteca encárgase da coordinación na nosa Comunidade deste proxecto internacional impulsado pola asociación A Bao A Qu, cuxa metodoloxía fundaméntase no vínculo entre ver e facer cinema.
'Boris Savelev. Viewfinder, unha forma de mirar' é a retrospectiva máis ampla realizada ata hoxe sobre o fotógrafo de orixe ucraína. Abrangue desde as primeiras imaxes en branco e negro que tomou nos anos 70 na Unión Soviética, os seus traballos con película en cor como freelance para publicacións rusas e estranxeiras, ata a adopción, a mediados dos anos 90, da fotografía dixital. Poderá visitarse ata o mes de novembro no Museo Centro Gaiás da Cidade da Cultura. Entre as máis de cen fotografías que compoñen o proxecto expositivo atopamos instantáneas inéditas tomadas nos últimos tres anos entre Cambados, Lugo, Vigo e Santiago.
Carlos Núñez presenta nas Ermidas a súa xira 'Lugares Máxicos 2025' da man dos Concertos do Xacobeo da Xunta de Galicia. O artista actuará no Adro do Santuario do concello do Bolo o xoves, 17 de xullo, contra ás 20.00 horas. As Ermidas acollerá, así, esta nova xira de Carlos Núñez que se presenta coma un percorrido musical polos espazos singulares da comunidade. Carlos Núñez está considerado internacionalmente como un músico extraordinario. O seu carisma, a súa enerxía, o seu espírito pioneiro fixérono moi popular, transcendendo os límites habituais dos seus instrumentos: a gaita e as frautas. Agora, no marco dos Concertos do Xacobeo da Xunta de Galicia, ofrece un novo e singular directo, nun marco patrimonial que arroupará como ningún outro ou seus máxicos sons.
De acceso gratuíto, a meirande parte destas propostas están programadas en espazos ao aire libre e dirixidas ao público familiar. De acordo coas cifras de asistencia rexistradas en anos anteriores, pódese estimar que esta 13ª edición de Cultura no Camiño sume máis de 38.000 espectadores nos 88 concellos participantes. A programación arrancará o vindeiro domingo día 15 en Barreiros (Lugo), onde Cris de Caldas ofrecerá o monólogo Doña Emilia e Señora Carmen a partir de diferentes relatos de Emilia Pardo Bazán; Paderne (A Coruña) co espectáculo de narración oral O medo é libre, de Ángeles Goás, e Vilagarcía de Arousa (Pontevedra) coas montaxes A historia de Brancaflor, a cargo de Fran Rei, e O último que apague a luz, de A Vela Circo.
O título da mostra, que poderá visitarse no Museo de Belas Artes ata o 14 de decembro, xorde das dúas grandes obras que Isaac realizou en distintas épocas sobre o relato mitolóxico da nave do barqueiro do inframundo. O tema, que insinúa a viaxe do pobo galego cara ao seu destino, evoca aquí o propio percorrido creativo do artista. Así, a exposición artéllase en cinco seccións coas que se pretende amosar esa traxectoria, desde os seus inicios pictóricos e a transición da pintura á cerámica, pasando polos seus grandes proxectos como Cerámicas do Castro, o seu labor no Laboratorio de Formas xunto con con Luís Seoane ou o seu papel nos deseños de Sargadelos. A exposición completarase con actividades paralelas cun ciclo temático de conferencias, un curso a cargo do profesor e crítico Alberto Cartón e visitas guiadas para centros escolares, asociacións culturais e público en xeral. Unha programación destinada a difundir o legado de Isaac Díaz Pardo.
As curtametraxes volven formar parte do Ciclo de Cinema Mestre Mateo, que levará os oito filmes curtos de ficción e animación finalistas e gañadores da última edición dos Premios Mestre Mateo a 24 concellos das catro provincias localizados fóra da contorna das grandes cidades e que non contan cunha oferta de salas comerciais estables. O programa, dividido en dúas sesións, inclúe os filmes finalistas nas categorías de Mellor Curtametraxe de Animación e Mellor Curtametraxe de Imaxe Real da última edición dos devanditos galardóns. No bloque de ficción poderán verse Pura, de Carmen Méndez; Véxote, de Óscar Pardo; Nai, de Tito Refoxo; e Platónico, Platónica, de Xacio Baño. Na categoría de animación exhibiranse Eu vou comigo, dirixida por Chelo Loureiro; Sinapse, de Carlos Cuesta; Avetimología, de Xosé Zapata; e Noites de prata, de Soraya Antelo.
O vindeiro luns, día 21 de abril, arrinca a Mostra de Teatro Universitario de Galicia, que dende hai un cuarto de século organiza a Aula de Teatro da Universidade de Santiago. Nesta ocasión subirán aos escenarios do Salón Teatro e da Sala Roberto Vidal Bolaño seis compañías de Santiago e Lugo e unha do Campus de Ourense da Universidade de Vigo.
Unha mostra expositiva e a plantación dun érbedo no xardín de Fonseca escenificarán este meso 'ingreso simbólico, con honores' de Rosalía de Castro no claustro da USC, nunha iniciativa da cátedra homónima dedicada á autora galega e 'mestra literaria'. Estas propostas exploran as inquedanzas da escritora e a súa 'participación das ideas xeradas dende a Universidade, incluídas as científicas e, máis especificamente, as botánicas', explica a profesora María do Cebreiro Rábade Villar.
O Espazo de Intervención Cultural da UDC, NORMAL, inaugura o xoves a exposición SOBRE TODO, da artista Enar de Dios Rodríguez, que poderá visitarse ata o 10 de xullo. SOBRE TODO é un proxecto artístico que toma como protagonista o espazo aéreo para configurar unha reflexión política e poética sobre como este está a se converter nun territorio suxeito a ocupación, lexislación e explotación.
A UDC celebra, entre o 9 de abril e o 14 de maio, a 30ª edición do seu Festival Internacional de Teatro Universitario da Coruña (FITEUC), unha cita consolidada no panorama cultural universitario que converterá, un ano máis, os espazos escénicos da cidade da Coruña nun punto de encontro para compañías universitarias de teatro e danza. O Teatro Rosalía, o Centro Ágora e o Fórum Metropolitano serán os espazos escollidos nos que se desenvolverá a programación.
Escrita por Quevedo desde o seu retiro en Villanueva de los Infantes o 20 de agosto de 1633, a obra dedícalla a don Fadrique de Toledo, un destacado militar que sufría a inimizade do conde-duque de Olivares, a quen critica duramente desde unha perspectiva neoestoica influída por Séneca. A copia manuscrita desta obra atópase na sede parisiense dos Archives nationales de France.
A 23 edición do Encontro Universitario de Danza (EUD) xuntará os días 8 e 9 de abril no Teatro Principal os mellores traballos das compañías das tres universidades públicas galegas. Á Compañía de Danza da USC, nada ao abeiro do Espazo de Danza baixo a dirección de Juan Carlos Zahera, únese a Aula de Danza do Campus de Ourense da Universidade de Vigo e a Aula de Danza da Universidade de Coruña. A entrada é libre e gratuíta para todas as representacións.
A Deputación da Coruña, en colaboración coa Real Academia Galega de Belas Artes, vén de editar un libro dedicado á figura de Isaac Díaz Pardo, unha das personalidades máis destacadas da cultura galega do século XX. A publicación coincide coa conmemoración do Día das Artes Galegas 2025, que este ano está dedicado ao artista, intelectual e empresario. Díaz Pardo, que foi bolseiro da Deputación da Coruña nos seus anos de formación, destacou ao longo da súa traxectoria pola súa contribución á recuperación e modernización das artes plásticas e a industria cultural en Galicia.
Entre os días 2 e 11 de abril, regresa o Festival de Teatro Universitario á cidade de Lugo, na que será a súa trixésimo primeira edición. Abrirá o festival a compañía de teatro USC-Lugo, dirixida por An González, coa peza Voilá, o 2 de abril, ás 20.30 horas, no Auditorio Gustavo Freire. A entrada a todas as funcións desta actividade, incluída dentro da programación da Primavera Cultural da USC, será de balde.
Unha primavera máis volve a Mostra Internacional de Teatro Universitario de Ourense (Miteu). Pero nesta ocasión faino dun xeito especial, para celebrar a súa 30 edición, tres décadas apostando polo teatro universitario. Este ano a súa programación desenvolverase do 23 de abril ao 10 de maio e nela a Universidade de Vigo volverá a ter un papel destacado, non só como unha das entidades que financia senón tamén coa participación no certame das súas catro aulas de teatro universitario e dos grupos de danza, música tradicional e coro do campus de Ourense.
A historia alternativa, aquela que puido ter sido e non foi, protagoniza esta semana un encontro internacional que reúne no campus de Vigo especialistas de España e Portugal. Tras tres edicións celebrándose no país veciño, a Conferencia Internacional de Historia Mundial WhatIf'24/25 recala dende hoxe por primeira vez en España organizada conxuntamente pola Universidade de Vigo e a Casa Común de Reitoría da Universidade de Porto.
