Noticias tecnologia
Máis dun millón de likes en stories, vídeos e publicacións, máis de 800.000 reproducións dos clips de vídeo que foron subindo ás súas redes, máis de 300 stories cunha media de alcance superior ás 270.000 persoas entre os catro instagrammers, máis de 3.000 comentarios,
son algunhas das cifras que suma a iniciativa Instagrammers no Camiño, que tivo continuidade nas redes sociais despois de que os catro protagonistas remataran a súa experiencia, que os levou entre o 8 e o 11 de xullo polo Camiño Portugués.
A Axenda Dixital Galicia 2020 logrou os seus obxectivos dunha maior dixitalización da sociedade, un maior impacto socio económico e a creación de oportunidades. Neste sentido, en todo o período 2015-2020 a interacción das persoas de Galicia coa Administración por medios electrónicos foi superior á media de España e da Unión Europea. As xestións en liña representan xa o 78 % das interaccións coas administracións en Galicia. Rexistrouse tamén un incremento significativo no uso das Tecnoloxías da Información e as Comunicacións (TIC), sobre todo nos grupos de maior idade. A evolución das persoas que declara ter usado internet nos últimos 3 meses foi tamén superior á media estatal e europea.
Unvex, o maior evento de vehículos non tripulados que se celebra en España, dará cita aos principais expertos nacionais e internacionais e empresas do sector os días 7, 8 e 9 de xullo na Cidade da Cultura de Galicia en Santiago de Compostela, na Escola Naval de Marín e no Centro de Investigación Aeroportada de Rozas (CIAR) en Castro de Rei (Lugo). Unvex ten confirmadas preto de 70 empresas expositoras que amosarán as súas novidades tecnolóxicas nos máis de 2500 metros cadrados de exhibición, entre os que destacan compañías tractoras do sector aeroespacial así como pequenas e medianas empresas e operadoras.
O ámbito de descubrimento de fármacos no que traballan a Fundación Kærtor e a Plataforma de cribado de fármacos e farmacoxenómica Innopharma da USC forma parte, na actualidade, da candidatura galega da Xunta de Galicia, xunto a Grupo Zendal e a Corporación Hijos de Rivera, aos fondos europeos Next Generation. Iniciativas como I2D2 (Incubation Innovation in Drug Discovery) ou Cancro Innova son dous dos exemplos máis significativos do éxito deste modelo de colaboración en innovación aberta para conectar a investigación coa súa aplicación.
A Axencia para a Modernización Tecnolóxica de Galicia (Amtega) vén de publicar o Plan de Acción en Software Libre 2021, que recolle diferentes actuacións co obxectivo de fomentar e promover o uso e reutilización de software libre na administración pública, o impulso dunha oferta de solucións libres e de calidade para as nosas empresas, e incrementar o uso e coñecemento do software libre por parte da sociedade. Como xa vén sendo habitual, unha parte moi importante destas actuacións desenvolveranse en colaboración dos principais axentes do ecosistema de software libre galego. Así asináronse convenios coa Asociación Galega de Empresas de Software Libre (AGASOL); coas Asociacións Galegas de Usuarios de Software Libre (AGUSL); e co Consorcio para o desenvolvemento de aplicacións Informáticas de Xestión Universitaria de Galicia (CIXUG), integrado polas tres universidades galegas.
O vicepresidente económico e conselleiro de Economía, Empresa e Innovación, Francisco Conde, mantivo en Madrid unha reunión de traballo co director xeral do Instituto Nacional de Técnica Aeroespacial (Inta), José María Salom, para avanzar no deseño da Estratexia do Polo Aeroespacial de Galicia 2021-2025. Na cita, na que tamén estivo presente a directora da Axencia Galega de Innovación (Gain), Patricia Argerey, destacouse a importancia de contar coa colaboración do organismo público dependente do Ministerio de Defensa para posicionar Galicia, a través das instalacións situadas en Castro de Rei (Lugo), como un referente no sector e impulsar así o seu crecemento económico.
A Estratexia Galega de Intelixencia Artificial 2021-2030 mobilizará máis de 330 millóns de euros e xerará un impacto na creación de riqueza duns 472 millóns. Este programa aliñará as necesidades económicas de Galicia coas capacidades de investigación e innovación e coas necesidades do sector público e privado. Isto implica, explicou o presidente da Xunta, que promoverá o uso da intelixencia artificial en sectores clave da economía galega, mellorará a prestación de servizos como a sanidade ou a política social, potenciará o patrimonio cultural e o turismo, e apoiará ás pemes galegas nos seus procesos de transformación dixital.
Tivo lugar esta mañá o acto de presentación da sexta edición de Unvex, a maior feira de drons que se celebra en España. A iniciativa levarase a cabo do 7 ao 9 de xullo na Cidade da Cultura co obxectivo de reunir aos profesionais do sector para abordar o crecemento da industria e analizar os principais desafíos para os próximos anos, poñendo especial atención no uso dos vehículos non tripulados nos servizos públicos que presta a Administración. Unvex 2021 supón un grande escaparate para os avances que se van producindo na industria galega, como por exemplo a iniciativa pioneira en Europa do Polo Aeroespacial de Galicia.
O Polo xerou unha comunidade de innovación na que participan unha gran variedade de pemes e centros de coñecemento con capacidades para establecer redes nacionais e internacionais e potencial para captar fondos que permitan a realización de proxectos colaborativos en áreas clave, dotando aos seus membros e ao propio ecosistema galego dun posicionamento estratéxico internacional. Esta colaboración mellorou as capacidades e a competitividade das pemes e centros de coñecemento que formaron parte do Polo Aeroespacial de Galicia, propiciando a xeración de 47 novos proxectos de I+D+i derivados da súa participación na iniciativa.
Un Museo Centro Gaiás convertido en contorna virtual en 360º acolle a Maker Faire Galicia, que repite este ano cun formato enteiramente en liña no que argalleiros de sete países diferentes España, A Arxentina, O Xapón, México, EE.UU., Portugal e O Brasil presentarán os seus proxectos. Despois do éxito da pasada edición, na que se convertía nunha das primeiras Maker Faire do mundo en dar o salto dixital, o evento volve apostar por un formato totalmente de balde, 100% virtual, e máis global ca nunca, con preto de 4.000 inscritos, cifras que cuadriplican as da última edición.
O proxecto Gaia da Axencia Espacial Europea, que se centra en cartografíar a Vía Láctea, entra nunha nova fase logo que a ESA confirmase hoxe mércores a finalización das observacións científicas da nave espacial Gaia, lanzada o 19 de decembro de 2013. Dende entón e ata a actualidade, a sonda Gaia acumulou máis de 3 billóns de observacións duns 2000 millóns de estrelas e outros obxectos, construíndo o mapa máis grande e preciso da Vía Láctea.
Un equipo de investigadores do Centro Singular de Investigación en Tecnoloxías Intelixentes da Universidade de Santiago de Compostela (CiTIUS) acaba de facerse co terceiro posto na competición internacional IEEE FLAME Technical Challenge 2024. Este certame, promovido e organizado pola prestixiosa sociedade científica IEEE Computational Intelligence Society, busca ideas innovadoras que exploren novas estratexias para combinar modelos de linguaxe de gran tamaño (como os utilizados en ferramentas de IA xerativa ou LLMs, polas súas siglas en inglés) con técnicas avanzadas de intelixencia computacional.
Os investigadores do grupo de Enxeñaría Supramolecular (SUPREN) do CICA, Iago Neira, Marcos García e Carlos Peinador, participaron nun estudo liderado polo profesor Alberto Credi, da Universidade de Bolonia (Italia), que acaba de ser publicado na revista científica Chem. Este proxecto é o resultado dunha colaboración entre os Departamentos de Química Industrial Toso Montanari, Química Ciamician e Ciencia e Tecnoloxía Agraria e dos Alimentos de Alma Mater, A Universidade da Coruña e o Instituto Isof-Cnr en Bolonia.
Foi a inquedanza do alumnado do grao e do mestrado de Enxeñaría Biomédica o que puxo a rodar a idea e, co apoio da Escola de Enxeñería Industrial, o Sergas e o Consejo Estatal de Estudiantes de Ingeniería Biomédica e Ingeniería de la Salud, as I Jornadas de Ingeniería Biomédica son xa unha realidade. Esta cita coa innovación e a tecnoloxía ao servizo da saúde será entre o 10 e o 14 de febreiro na Escola de Enxeñería Industrial, coincidindo coa celebración das Jornadas sobre Tecnologías y Soluciones para la Automatización Industrial.
O Proxecto Nós, impulsado pola Universidade de Santiago de Compostela e a Xunta de Galicia e desde 2023 financiado a través de fondos PERTE-Next Generation, está a levar a cabo unha recollida de datos de voz en galego a través da plataforma Common Voice e as persoas responsables queren facer un chamamento ao estudantado para que contribúa co proxecto a cambio de créditos optativos.
O Centro de Investigación e Tecnoloxía Matemática de Galicia (CITMAga), impulsado polas tres universidades galegas, está a traballar na procura dun tratamento personalizado para os pacientes que presentan vertixe persistente. O proxecto coordínao Alberto Pérez Muñuzuri, xunto a Ismael Arán Tapia, ambos os dous da Facultade de Física da Universidade de Santiago.
A Domus acolleu a XV edición da Reunión de Mozos Investigador@s no Estranxeiro (IYI Meeting), xornada organizada pola Universidade da Coruña e o Centro de Investigación en Nanomateriais e Biomedicina da Universidade de Vigo (CINBIO), que serviu como punto de encontro para o persoal científico que está a desenvolver a súa carreira investigadora en países de todo o mundo.
Un equipo de investigación do Centro de Investigación en Tecnoloxías da Información e as Comunicacións da Universidade da Coruña logrou un importante avance no estudo da evolución dos sistemas planetarios. Utilizando os datos da misión espacial Gaia e avanzadas técnicas de IA, identificaron trazas de metais nas atmosferas de ananas brancas, estrelas mortas tras quedarse sen hidróxeno que fusionar.
O CITIC da Universidade da Coruña acolleu unha nova sesión do ciclo formativo HumanIA, titulada: 'Intelixencia artificial e transformación do emprego tradicional: retos e oportunidades' e impartida por Virginia Carcedo Illera. Virginia Carcedo, destacada experta en inclusión social e transformación laboral, centrou a súa intervención en como as tecnoloxías de intelixencia artificial xenerativa están a transformar as posibilidades de integración laboral e social para persoas con discapacidade.
Persoal do Centro de Investigación e Tecnoloxía Matemática de Galicia (CITMAga) impulsado polas tres universidades galegas, está a participar no proxecto europeo CytoMARK, que busca o desenvolvemento dun test de diagnóstico personalizado e non invasivo de cancro de endometrio. Obter un proceso de cribado rigoroso e rápido evitaría que as pacientes se someteran ás actuais probas médicas.
