domingo, 8 de noviembre de 2026
A directora da Axencia Galega de Innovación (Gain), Patricia Argerey, participou esta mañá en Madrid nunha mesa redonda sobre a proposta de Plan Estratéxico Aeroespacial Nacional, no marco do congreso World ATM Congress, a principal conferencia a nivel mundial sobre xestión do tráfico aéreo, e Expodrónica, a feira de drons máis importante no sur de Europa, que se están a celebrar conxuntamente estes días no recinto feiral de Ifema.
Argerey presentou na súa intervención as principais liñas da Estratexia do Polo Aeroespacial de Galicia para o período 2021-2025 e informou de que Galicia aspira a articular o proxecto estratéxico para a recuperación e transformación económica (Perte) Aeroespacial no ámbito dos vehículos non tripulados, no caso de que o Goberno finalmente o poña en marcha.
Neste contexto, o Polo Aeroespacial de Galicia preséntase como unha iniciativa estratéxica con grande capacidade transformadora e importantes resultados acadados na fase anterior 2015-2020: 164 millóns de euros de investimento público-privado mobilizado; colaboración con empresas tractoras como Indra, Babcock e Boeing e a implicación do ecosistema rexional; máis de 900 profesionais; 60 solucións tecnolóxicas e produtos xa no mercado de 655 desenvoltas; e a creación de cinco novas empresas en Galicia.
Argerey coincidiu co resto de relatores na necesidade de coordinarse, aproveitar as sinerxías entre as distintas iniciativas e non solaparse para que os fondos europeos Next Generation funcionen como un elemento de tracción e España poida gañar en dimensión e potencial, así como acadar un bo posicionamento neste segmento a nivel global.
Polo Aeroespacial 2021-2025
A directora da Axencia Galega de Innovación informou de que o Polo Aeroespacial de Galicia comeza agora unha nova etapa na que o Goberno galego aspira a mobilizar máis de 500 millóns de euros, dos que xa ten comprometidos 70 millóns de fondos públicos. O obxectivo é consolidar a pegada industrial ao redor do sector aeroespacial coa creación de 24 novas empresas, a proxección internacional a través da comercialización de novos produtos e tecnoloxías innovadoras e a xeración de emprego cualificado.
Así, definíronse sete programas que inclúen 30 actuacións, entre elas a licitación lanzada o pasado mes de xullo para seleccionar socios estratéxicos e tecnolóxicos para esta nova etapa. Ademais, o Centro para el Desarrollo Tecnológico Industrial (CDTI) en colaboración coa Xunta de Galicia sacou outra licitación para dotar ao Centro de Investigación Aeroportada de Rozas (CIAR) dun entorno de simulación avanzado de xestión do tráfico aéreo que o converta nun espazo de experimentación nunha contorna segura para promover avances na regulación.
Patricia Argerey apuntou hoxe que a planificación estratéxica da nova etapa do Polo está aliñada co Plan de Recuperación para Europa e co Plan de Recuperación, Transformación e Resiliencia español para aproveitar os fondos Next Generation, na medida en que estes están destinados a apoiar proxectos transformadores e creadores de riqueza a longo prazo e poderían contribuír a acelerar o desenvolvemento de Galicia neste sector.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
