Actualidad de Sociedad

O Morriña Festival terá lugar o 26 e 27 de xullo e contará coas actuacións xa o mesmo venres de Louis Tomlinson, Editors, Nicki Nicole, Iván Ferreiro, Dani Fernández, Juan Magán, Sen Senra, Dorian, Marlena e Enol. O sábado 27 de xullo será a quenda de Aitana, Lola Índigo, La La Love You, Yandel, Iñigo Quintero, Dei V, Pedro Capó, Malmö 040, Dollar Selmouni, Yeico x Troni, Garabatto, Tashi e Toni Seijas. Trátase dun festival promovido por seus Bring the Noise, xa consolidado no noso panorama musical, e considerado o festival urbano máis grande de España, e que chega á súa terceira edición avalado polas boas cifras do ano pasado con máis de 15.000 espectadores cada un dos días.

O Gozo Festival, unha das grandes citas musicais e turísticas do ano en Galicia, logrou reunir na súa segunda edición máis de 60.000 persoas entre as dúas citas celebradas no Monte do Gozo, en Santiago de Compostela este ano. O público asistiu desde 18 países diferentes de lugares como Irlanda, México, Finlandia ou Xapón. Promovido por Live Nation e Sweet Noctura co apoio de Turismo de Galicia, o Gozo Festival ofreceu concertos de 19 artistas e máis de 17 horas de música nas dúas citas que se celebraron no Monte do Gozo. O 6 de xullo foi a quenda de Ed Sheeran, que chegaba por primeira vez a Galicia, nunha xornada na que tamén se puido gozar de artistas como os colombianos Bomba Estéreo, a chilena-mexicana Mon Laferte, os alemáns Milky Chance, a italiana Angelina Mango ou as galegas Fillas de Cassandra.

Un total de 54.151 persoas veñen de presentar solicitude para cursar algunha modalidade de Formación Profesional en Galicia o vindeiro curso, o que representa un incremento do 5,24% (2.697 solicitudes máis) con respecto ao curso 2023-24. Estas cifras supoñen acadar de novo un máximo histórico que confirma o interese que espertan estas ensinanzas entre os cidadáns en Galicia , con 2.697 solicitudes máis. Os datos recabados pola Consellería de Educación, Ciencia, Universidades e FP, logo da primeira adxudicación de prazas que dá dereito a matrícula, constatan unha suba xeneralizada en todas as modalidades, tanto ciclos ordinarios como FP Dual Intensiva, FP Básica, FP a distancia ou másteres e especializacións.

A nosa comunidade ten avanzado de forma notable na loita contra o quecemento global, con 139 medidas desenvolvidas e un investimento executado de 1.140 millóns de euros. Así, Galicia é a comunidade española con maior redución das emisións contaminantes (-60%) respecto a 1990, ano que se toma como referencia a nivel mundial para as políticas climáticas. Ademais é a rexión con maior capacidade de absorción de dióxido de carbono do país, unha de cada cinco toneladas capturadas en España. A maiores, as emisións netas de gases de efecto invernadoiro baixaron en Galicia un 19,5% nos últimos catro anos, o triplo que a media española e que a europea.

Os produtos do mar de Galicia seguen percorrendo, un ano máis, a nosa comunidade grazas á campaña GALICIA SABE AMAR, respaldada pola Xunta de Galicia e polas empresas galegas do sector, e adaptándose ás demandas dos consumidores, para poñer en valor a calidade de peixes e mariscos galegos (frescos, conxelados, en conserva ou en calquera outra presentación) e o traballo dos profesionais. Este labor vese complementado coa participación en feiras de alimentación nacionais e internacionais para promover as exportacións dos produtos do mar galegos, que seguen batendo récords.

O Atlantic Fest terá lugar o 19 e 21 de xullo e contará coas actuacións xa o mesmo venres dos artistas Carlos Ares, The Parrots, Alcalá Norte, Rocío Saiz, Gazella e Grande Osso. O sábado 20 están previstas as actuacións dos Planetas, Crystal Fighters, Sílvia Pérez Cruz, Carlos Sadness, Derby Motoreta's Burrito Kachimba, Depedro, Cariño, Luis Fercán, Florent e Eu e Dani Dicostas. O domingo, último día do festival, actuarán Mika, Sidonie, Elefantes, Andrés Suárez, As Dianas, Grande Osso e Rocío Saiz. A pasada edición do Atlantic Fest obtivo unhas cifras de 30.000 asistentes, 300 postos de traballo creados de forma directa, e máis de 100 empresas involucradas na organización e realización do festival.

O Diario Oficial de Galicia (DOG) publica na súa edición de hoxe a orde pola que se aproba o Plan de Inspección dos servizos sanitarios para o período 2024-2027. Deste xeito, a Subdirección Xeral de Inspección de Servizos Sanitarios garantirá os dereitos dos pacientes e usuarios atendidos no sistema sanitario galego, incidindo nos criterios de eficiencia, calidade e seguridade asistencial. Entre outras medidas, a Subdirección Xeral de Inspección de Servizos Sanitarios velará polo control e supervisión das prestacións e actividades sanitarias, ademais de realizar unha avaliación constante dos centros, servizos e establecementos sanitarios da nosa comunidade.

29 cargos municipais do PP de Lugo, encabezados pola Presidenta Provincial, Elena Candia e o Voceiro Provincial, Antonio Ameijide, visitaron as instalacións de Aspnais para coñecer directamente a realidade desta Asociación. Vinte deles eran Alcaldes ou tenentes de Alcalde, e nove voceiros representantes do PP nas respectivas Corporacións. Participaron os alcaldes de Abadín, Baralla, Begonte, Castro de Rei, Cospeito, Guntín, O Incio, Monterroso, As Nogais, Pastoriza, Portomarín, Riotorto, O Vicedo, O Corgo, Outeiro de Rei, Paramo, Pastoriza; Alcaldesa de Rábade, Tenente de alcaldesa de Paradela e tenente de Alcalde de Palas de Rei.

A Eurocidade Chaves-Verín acolleu a xornada de presentación do proxecto TRANSFIRESAÚDE, coordinado pola Axencia Galega de Coñecemento en Saúde (ACIS) e destinado a fortalecer o ecosistema de investigación e innovación sanitaria na Eurorrexión Galicia-Norte de Portugal. Este proxecto europeo ten como finalidade desenvolver solucións conxuntas e innovadoras, principalmente no ámbito da intelixencia artificial, abordando os retos vencellados ao envellecemento activo e saudable e á medicina personalizada, especialmente no ámbito da atención primaria de saúde.

A Xunta salienta que os sistemas de control da calidade do aire constatan que Galicia cumpre cos valores establecidos pola Organización Mundial da Saúde (OMS), o que, ademais, supón unha “boa base” para afrontar os novos obxectivos establecidos pola Unión Europea e a OMS para o ano 2030 neste eido. De feito, a Xunta realizou xa unha análise para coñecer a repercusión na calidade do aire de Galicia dos novos parámetros de cara a 2030. Nesa liña, analizáronse os datos recollidos pola Rede de Estacións no período 2018-2022 en base aos parámetros da nova directiva. A maiores, fíxose unha proxección das emisións na Comunidade en 2030, coa que se realizou unha simulación do estado da calidade do aire á que tamén se lle aplicaron os novos valores límite.