domingo, 1 de noviembre de 2026
Unha das principais novidades introducidas pola Consellería de Educación, Ciencia, Universidades e FP para o vindeiro curso é o recoñecemento de créditos ECTS universitarios para o alumnado que participe neste programa educativo. En concreto, os estudantes que superen o STEMBach e se matriculen nunha das universidades públicas galegas verán recoñecido o seu mérito cun máximo de 6 créditos ECTS de libre configuración ao longo da súa traxectoria universitaria. A participación no Programa Mentoring STEMbach de cada universidade será un requisito para obter estes créditos.
Outra das melloras no programa consiste no recoñecemento dos mellores proxectos de investigación realizados por estudantes en colaboración coas universidades. Ademais, créase a Rede STEMbach, unha estrutura de apoio e reforzo aos axentes implicados no programa. O alumnado desta rede terá preferencia para participar en determinadas accións específicas das universidades e poderá ver o seu traballo promocionado en feiras e publicacións científicas recoñecidas.
Os docentes do STEMBach tamén se beneficiarán desta nova fase do programa, cun acceso facilitado ás instalacións e equipamentos do Centro de Innovación Educativa e Dixital para o desenvolvemento de proxectos. Ademais, disporán de contidos específicos para a ensinanza das materias STEM e dun repositorio común de charlas e recursos relacionados.
A Xunta organizará encontros entre profesorado e alumnado do STEMBach para compartir experiencias e boas prácticas, ao tempo que se fará un acompañamento constante desde a Consellería a través dun espazo virtual común.
Un programa consolidado
Desde a súa implantación no curso 2018/2019, o STEMBach consolidouse como unha aposta clave da Xunta de Galicia pola educación científica e tecnolóxica. No curso 2024/2025, un total de 53 centros ofrecerán este Bacharelato de excelencia, no que xa titularon máis de 1.000 estudantes. Destaca a participación de docentes de renome como Ángel Carracedo, xenetista e catedrático de Medicina Legal da USC.
O programa ten unha duración de dous cursos académicos e está aberto ao alumnado de calquera modalidade de Bacharelato. Enmárcase na Estratexia Educación Dixital, Edudixital 2030 e ten como obxectivo promover o desenvolvemento de competencias STEM a través de contidos curriculares relacionados co pensamento computacional e as tecnoloxías inmersivas, como a realidade virtual, a realidade aumentada e a intelixencia artificial. Ademais, o programa procura fomentar o interese do alumnado pola investigación científica e tecnolóxica, facilitando a súa adaptación á ensinanza universitaria.
O XXXVI Festival de Jazz de Lugo ofrecerá do 4 ao 14 de novembro un total de 22 actuacións que combinarán grandes figuras internacionais cunha ampla presenza de músicos galegos en catro escenarios. Conforme ao programa, o Auditorio Fuxan os Ventos acollerá a apertura o mércores 4 co trío do saxofonista e clarinetista cubano Paquito DRivera. Neste mesmo escenario actuarán Abe Rábade, o día 8, e Kenny Barron Trio, o 11. No Círculo das Artes sucederanse James Carter Organ Trio, o 5 de novembro; Jogo de Damas, o día 6; Takuya Kuroda Quintet, o 7; Patricia Brennan Septet, o día 12; Erik Truffaz & Antonio Lizana, o día 13, e Clarence Bekker Band, o 14 de novembro.
O informe da Dirección Xeral de Saúde Pública da Consellería de Sanidade sobre a actividade das infeccións respiratorias agudas referido á semana que rematou o 25 de outubro reflicte que a actividade gripal na comunidade mantén o seu nivel basal con tendencia crecente, constatando un incremento na dispensación de antigripais nas farmacias galegas. En concreto, a taxa de dispensación de antigripais nas farmacias aumentou un 38,9 % na última semana, mentres que a de probas de antíxenos se reduciu nun 17,9 %, tal e como informan as oficinas de farmacia integradas na rede sentinela impulsada pola Xunta, co obxectivo de anticipar a evolución dos virus respiratorios na comunidade.
