Actualidad de Economía

O director xeral de Relacións Exteriores e coa UE, Jesús Gamallo Aller, está a participar no 8º Cumio Europeo de Rexións e Cidades, que cada dous anos organiza o Comité Europeo das Rexións para debater dende unha perspectiva subestatal, os desafíos que afronta a UE. Nesta ocasión, a declaración política aprobada advirte de que “Europa se está transformando a unha velocidade sen precedentes debido á globalización, a revolución dixital, o clima e o cambio demográfico”. Para que a UE poida facer fronte a estes retos eficazmente, a declaración apela a un esforzo coordinado de todos os niveis de goberno, afirmando que “a UE necesita as súas rexións e cidades tanto como estas necesitan a Unión Europea”.

As indicacións xeográficas protexidas (IXP) de carne de vacún de Galicia creceu en 2018 por riba do 3% en certificación e comercialización de Ternera Gallega, acadando os 122 millóns de euros de valor económico en primeira venda. Esta IXP mantivo ademais as súas cifras de actividade no campo, con 8.199 explotacións e 132.868 tenreiros rexistrados. A IXP Vaca Galega / Boi Galego, conta xa con 683 explotacións, 21 industrias inscritas e 8.593 vacas e bois rexistrados. O pasado ano certificáronse un total de 334 canais que sumaron 138 toneladas de carne. A nosa comunidade ocupa o segundo lugar dentro de España en número de cabezas de gando tras Castela e León.

Galicia pechou o ano 2018 sendo a comunidade autónoma que paga máis rápido as súas facturas, cun período medio de pago de 16,9 días, o máis baixo de toda España segundo os datos oficiais publicados polo Ministerio de Facenda. O período medio de pago de Galicia mantívose 13 días por debaixo do límite que establece a normativa estatal, e a media autonómica situouse en 30,05 días, 13 máis que a media rexistrada na Comunidade galega. Os datos oficiais do Ministerio de Facenda inclúen desde o mes de abril unha nova metodoloxía de cálculo do período medio de pago a provedores que se aplica a todas as autonomías.

No 2018, as vendas internacionais da industria agroalimentaria representaron o 13,4% do total, sumando o valor de 3.065,6 millóns de euros, continuando, así, a súa evolución positiva, cun aumento do 1,8% con respecto ao ano 2017. O ano pasado un total de 1.384 empresas galegas do sector da alimentación venderon os seus produtos no exterior. Delas, case a metade, 663, exportan regularmente, é dicir, fixérono de forma consecutiva durante os últimos catro anos, o que supón un incremento do 1,1% con respecto a 2017. En termos globais, o ano pasado en Galicia, o número de empresas exportadoras e exportadoras regulares alcanzaron as 7.259 e 2.498, respectivamente.

Galicia pechou o mes de febreiro con 173.709 persoas no paro, o que supón con respecto a hai un ano 14.498 desempregados menos (-7,70%). É, deste xeito, a segunda Comunidade na que máis descende o paro superando a caída media do Estado (-5,22%) en case dous puntos e medio. O paro, así, continúa baixando, seis anos de xeito consecutivo nun mes de febreiro e a cifra sitúa á Comunidade en niveis de hai unha década. Con respecto ás afiliacións, continúan en aumento, con 18.822 cotizacións máis que hai un ano encadeando case cinco anos de subidas consecutivas, desde abril de 2014.

No evento, referente principal para a industria da alimentación iberoamericana e, no que participarán un total de 47 compañías españolas, Galicia contará cun pavillón propio dentro da área dedicada a España. A esta feira, na que se darán cita 1.900 expositores de máis de 30 países, prevese a visita de preto de 50.000 persoas vinculadas ao sector alimentario. A participación na Feira Expo Antad & Alimentaria pretende abrir oportunidades de negocio e alianzas para o tecido empresarial galego. Durante a feira, reforzarase a imaxe da marca Galicia e os produtos galegos con actividades e eventos como obradoiros de cociña ou catas de viños.

Galicia pechou con éxito hoxe unha emisión de 400 millóns de euros en bonos a longo prazo, cunha demanda que multiplicou por cinco a oferta. Esta é a primeira emisión de débeda que leva a cabo a Comunidade Autónoma desde 2014 e supón o inicio do seu retorno gradual aos mercados de débeda. A Consellería de Facenda vén de pechar a operación cun tipo de xuro moi beneficioso, do 1,45%, o mellor acadado por unha comunidade autónoma nestes últimos meses. A duración dos bonos é de dez anos e a operación realizouse coas entidades financeiras Abanca, BBVA, Barclays e Societe Generale.

Segundo as primeiras estimacións do Instituto Galego de Estatística sobre a evolución da economía galega no ano 2018, o dato de crecemento da Comunidade en 2018 foi do 2,8%, que está por riba da do Estado e da media da Eurozona, e que supuxo a creación de 19.000 empregos a tempo completo. Deste xeito, superáronse as previsións establecidas no Plan estratéxico para período 2015-2020 do 2,5% e cumpríronse as estimacións macroeconómicas do Goberno galego. O consumo, cun incremento do 2,2% con respecto ao ano anterior, a formación bruta de capital, cun 7% e as exportacións que avanzaron un 3,4%, son os principais responsables deste resultado.

Entre os programas que se porán en marcha este ano, destacan os centrados en incentivar a contratación, cinco iniciativas que inclúen, todas elas, ademais das axudas á contratación, apoios á cualificación a través dun bono formación de 2000 euros, que se pode incrementar ata os 4000 euros no caso de que a contratación que a empresa leve a cabo sexa indefinida. Os cinco programas de apoio á contratación e formación, nos que se investirán preto de 11 millóns de euros, van dirixidos aos cinco colectivos con máis dificultades para atopar un emprego, e que son prioritarios en materia laboral: autónomos, parados de longa duración, menores de 30 anos, mulleres e persoas con capacidades diferentes.

O presidente da Xunta, Alberto Núñez Feijóo, defendeu hoxe reforzar o Corredor ferroviario ao Noroeste cos investimentos necesarios para unha España equilibrada porque “unha España hemipléxica –aseverou- tería consecuencias irreparables a longo prazo”. Deste xeito, e durante a súa participación, xunto cos presidentes do Principado de Asturias e de Castela e León, nun almorzo informativo organizado por Nueva Economía Fórum, propuxo que se garanta na planificación do Corredor Atlántico o baipás de Monforte, a conexión ferroviaria do Porto Punta Langosteira e, sobre todo, a saída sur de Vigo que, na súa opinión, debe proxectarse xa, aínda que non se poida incorporar ao trazado do corredor ata 2023.