lunes, 7 de julio de 2025
A secretaria xeral de Emprego, Covadonga Toca, mantivo hoxe en Ourense unha xuntanza con empresarios na Asociación Provincial de Talleres de Reparación de Vehículos (Atave) para darlles a coñecer o mapa de apoios da Xunta en materia de emprego. O orzamento para 2019 nas áreas de emprego e de formación aumenta un 7%, ata acadar os 255,5 millóns de euros, para seguir impulsando e incrementando as oportunidades laborais dos galegos e galegas e para fixar as bases do emprego do futuro, tal e como engadiu Toca.
Entre os programas que se porán en marcha este ano, Toca destacou os centrados en incentivar a contratación, cinco iniciativas que inclúen, todas elas, ademais das axudas á contratación, apoios á cualificación a través dun bono formación de 2000 euros, que se pode incrementar ata os 4000 euros no caso de que a contratación que a empresa leve a cabo sexa indefinida. A secretaria xeral lembrou que en 2018, a Xunta investiu 182.000 euros nos bonos formación dos que se beneficiaron 134 traballadores. Este ano 2019 a previsión é conceder 160 bonos.
Os cinco programas de apoio á contratación e formación, nos que se investirán preto de 11 millóns de euros, van dirixidos aos cinco colectivos con máis dificultades para atopar un emprego e que son prioritarios para a Xunta en materia laboral: autónomos, parados de longa duración, menores de 30 anos, mulleres e persoas con capacidades diferentes.
A primeira das iniciativas, a dirixida aos autónomos, e, tal e como informou Toca, xa saíu publicada no Diario Oficial de Galicia (DOG). Son axudas para que os autónomos contraten a 240 traballadores indefinidos en 120 empresas cun orzamento de 1,35 millóns. O prazo de solicitude remata o próximo 30 de setembro. A Consellería de Economía, Emprego e Industria financia con 3000 euros a contratación do primeiro traballador cando se trate dunha persoa desempregada, que aumentará ata os 5000 euros para os parados de longa duración e persoas con capacidades diferentes ou en risco de exclusión social.
Para as contratacións do segundo e terceiro traballador, o autónomo recibirá unha contía de 5000 euros se a persoa é desempregada, que se incrementará ata os 7000 euros para os parados de longa duración e persoas con capacidades diferentes ou en risco de exclusión social. Esta contías poden incrementarse nun 25% para as mulleres, maiores de 45 anos, emigrantes retornados e persoas trans. Tamén se incrementa a axuda se a empresa está emprazada no rural.
Nos próximos meses convocaranse os catro programas restantes: Emprega Parados de Longa Duración, Emprega Xuventude, Emprega Muller e unha iniciativa específica para a contratación de persoas con capacidades diferentes ou en risco de exclusión social.
Apoio ao inicio de actividade
A secretaria xeral, ademais, referiuse a outras axudas en materia laboral e que tamén saíron xa publicadas no DOG como os incentivos para apoiar o inicio de actividade de 3800 autónomos cun investimento de máis de 10 millóns de euros. A través desta liña de apoios, que se pode solicitar ata o próximo 30 de setembro, apoiarase o emprego dos autónomos con 2000 euros, unha contía que se pode duplicar ata os 4000 euros para os menores de 30 anos, os parados de longa duración e as persoas con capacidades diferentes ou en risco de exclusión social. O obxectivo desta actuación é facilitar e axilizar a posta en marcha de novas iniciativas empresariais. Fináncianse as altas na Seguridade Social ou en mutualidade de colexio profesional que, cumprindo os requisitos da orde de axudas, se formalicen desde o 1 de outubro de 2018 ata o 30 de setembro de 2019, ambos inclusive. Este ano, ao igual que o exercicio pasado, non se esixirá un investimento inicial para recibir esta axuda.
Así mesmo, xa están abertas as axudas para o fomento e a consolidación do emprego nas pequenas empresas de nova creación que conta cun orzamento de 2,2 millóns de euros para apoiar a 350 traballadores e 400 empresas e cuxo prazo de solicitude remata o próximo 31 de xullo; e os incentivos para as empresas cualificadas como Iniciativas de Emprego de Base Tecnolóxica (IEBT), cun investimento de 400.000 euros para impulsar o traballo de 30 persoas e beneficiar a 15 empresas. Neste caso, as inscricións poden presentarse ata o próximo 30 de setembro.
EuroPCom, a Conferencia Europea de Comunicación Pública, é a maior reunión anual de expertos en comunicación pública de Europa organizada polo Comité Europeo das Rexións en colaboración coa Comisión Europea, o Parlamento Europeo, o Consello, o Banco Europeo de Investimentos, o Comité Económico e Social Europeo e a Organización para a Cooperación e o Desenvolvemento Económicos. O evento ofrece unha plataforma para explorar as últimas tendencias, iniciativas e ideas no ámbito da comunicación pública. O director xeral de Relacións Exteriores e coa Unión Europea, Jesús Gamallo, participou nesta Conferencia organizada polo Comité Europeo das Rexións, e celebrada baixo o lema 'Máis alá das palabras. Unha historia de confianza'.
O Diario Oficial de Galicia publica hoxe a declaración de Ben de Interese Cultural da Rapa das Bestas de Sabucedo por considerar acreditado o seu valor sobranceiro como patrimonio inmaterial do pobo galego, ao tratarse dunha das festas máis antigas de Galicia que conta, como mínimo, con tres séculos de historia. Este recoñecemento supón a aplicación de inmediato do réxime de tutela da Lei de Patrimonio Cultural e, polo tanto, o maior nivel de protección. Esta distinción, que se suma á de Festa de Interese Turístico Internacional acadada en 2007, chega tras o visto e prace a este decreto por parte do Consello da Xunta este pasado luns, 30 de xullo, e logo de completarse o expediente administrativo, no que constan os dous informes preceptivos dos órganos consultivos favorables.
