viernes, 6 de noviembre de 2026
Galicia pechou o ano 2018 sendo a comunidade autónoma que paga máis rápido as súas facturas, xa que acadou no mes de decembro un período medio de pago de 16,9 días, o máis baixo de toda España segundo os datos oficiais publicados hoxe polo Ministerio de Facenda.
Deste xeito, o período medio de pago de Galicia mantívose 13 días por debaixo do límite que establece a normativa estatal, que é de 30 días. Ademais, a media autonómica situouse en 30,05 días, 13 máis que a media rexistrada na Comunidade galega.
Os datos oficiais do Ministerio de Facenda inclúen desde o mes de abril unha nova metodoloxía de cálculo do período medio de pago a provedores que se aplica a todas as autonomías. Pese a este cambio, Galicia leva dez meses consecutivos sendo a comunidade que paga con máis axilidade as facturas aos seus provedores.
En canto á débeda comercial, a ratio de débeda/PIB de Galicia situouse no 0,29%, a terceira máis baixa de toda España e inferior á media autonómica, que foi do 0,41%. Ao peche do exercicio a débeda comercial do conxunto das comunidades autónomas situouse en 4.926 millóns de euros, 182,3 millóns de Galicia.
Os datos do Ministerio de Facenda ratifican que Galicia é a comunidade autónoma que mellor atende aos seus provedores, axilizando os pagos e evitando problemas de liquidez ás empresas que prestan servizo á Administración galega.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
