Noticias economia
As exportacións galegas rexistraron o ano pasado un novo récord, cun total de 22.196,7 millóns de euros, superando nun millón de euros o dato definitivo de exportacións do 2018. No tocante ao saldo comercial, Galicia rexistra unha balanza positiva en 2.382,5 millóns de euros, mentres que a nivel nacional se acumula un déficit de 31.979,6 millóns de euros. En termos absolutos, a balanza comercial galega é a cuarta mellor das comunidades autónomas. Así, en 2019 Galicia supera por segundo ano consecutivo a barreira dos 22.000 millóns de euros, co que a Comunidade está vivindo o mellor ciclo exportador da súa historia.
O vindeiro 12 de marzo, a Cidade da Cultura acollerá o Foro Empresarial AJE Galicia 2020, un encontro para debater e coñecer novas tendencias en innovación e investimento, enfocado a mellorar a produtividade das empresas galegas. O evento reunirá a empresarios e institucións de toda España, de todos os sectores, e está dirixido a mozos e mozas emprendedoras e universitarias con vocación de crear a súa propia empresa; así como empresarios e empresarias, e organismos relacionados co mundo corporativo. O evento contará con relatores como o coñecido empresario, asesor e coach, Emilio Duró ou a empresaria coruñesa Yaiza Canosa, CEO da startup logística GOI e elixida en 2017 como unha das 30 persoas menores de 30 anos con maior proxección profesional pola revista Forbes (30under30).
O presidente do Goberno galego, Alberto Núñez Feijóo, avanzou hoxe, na rolda de prensa do Consello, que a Xunta solicitará ao Executivo central que modifique a normativa nacional sobre prezos para evitar a venda a perdas no agro, así como á elaboración dunha lei de incentivos fiscais para os sectores agroalimentario e forestal. O titular da Xunta explicou que Galicia demandou novamente unha garantía de prezos xustos para o agro que faciliten que as actividades dos agricultores e dos gandeiros sexan rendibles.
O ministro de Agricultura, Pesca e Alimentación, Luis Planas, organizou unha reunión para avaliar cos representantes das diferentes autonomías a situación dos prezos dos produtos do agro. Nela, o conselleiro do Medio Rural, José González, demandou unha garantía de prezos xustos para o agro que faciliten a rendibilidade na actividade dos agricultores e dos gandeiros. Neste sentido, González lembrou que a normativa comunitaria e española sobre competencia impide fixar uns mínimos para os produtos agrícolas, pero si se pode actuar para que a cadea de valor constrúa o prezo dos produtos do sector primario a partir do custo de produción dos agricultores e gandeiros, evitando así as vendas a perdas.
Galicia volveu cumprir en 2019 os obxectivos de déficit e débeda fixados no orzamento e pagou aos provedores na metade de tempo que a media autonómica. Segundo o informe presentado pola Consellería de Facenda, sobre o avance do peche do exercicio 2019, Galicia de novo cumpriu o obxectivo de déficit previsto, que era do 0,1% e quedou no entorno do 0,09%, executando o orzamento aprobado polo Parlamento de Galicia, que incluíu como ingresos os preto de 200 millóns de euros da mensualidade do IVE do ano 2017. No que atinxe ao endebedamento, a comunidade volveu cumprir en 2019 o seu tope máximo autorizado e baixou a débeda.
A Xunta solicitoulle ao Goberno de España a creación dunha comisión de seguimento das obras do AVE que se reúna con periodicidade mensual. A conselleira de Infraestruturas e Mobilidade, Ethel Vázquez, remitiulle hoxe un escrito ao secretario de Estado de Transportes, Mobilidade e Axenda Urbana, Pedro Saura, demandando a creación dun foro sobre a alta velocidade ferroviaria similar ao establecido polo Executivo central con outras autonomías.O Goberno galego considera conveniente que a primeira xuntanza desa comisión de seguimento se celebre xa neste mes de febreiro, coa fin de achegarlle á cidadanía galega información oficial, clara, concreta e certeira sobre a evolución desta infraestrutura estratéxica, unha vez constatado o incumprimento do acordo político de rematar as obras a finais de 2019.
Galicia comeza 2020 con 7045 parados menos que hai un ano, o que supón unha baixada do -4,03% e un nivel de desemprego moi inferior ao rexistrado hai once anos. Por sétimo ano consecutivo redúcese o paro en Galicia nun mes de xaneiro. Estes datos sitúan Galicia como a segunda Comunidade que rexistra unha maior baixada de desemprego, superando a media española (-0,97%) en máis de tres puntos. O paro tamén baixou nas catro provincias galegas e nas 7 grandes cidades (agás A Coruña), así como en todos os sectores económicos e nos colectivos prioritarios para a Xunta: menores de 30 anos, parados de longa duración e mulleres.
As axudas do Bono de Alugueiro Social, que xestiona e concede o IGVS, poderán solicitarse ata o próximo 11 de decembro co fin de facilitar o acceso á vivenda en réxime de aluguer a aqueles colectivos que presentan maiores dificultades económicas. A convocatoria deste ano, que como principal novidade amplía o abano de posibles beneficiarios aos mozos que estiveran tutelados pola Xunta, unha vez saian do réxime de tutela, e a persoas privadas da súa vivenda habitual como consecuencia de procedementos xudiciais de execucións hipotecarias ou de acordos extraxudiciais, contará inicialmente cun orzamento dun millón de euros.
O Consello da Xunta autorizou á Asesoría Xurídica e a Consellería de Facenda a que inicien o procedemento para reclamar xudicialmente ao Goberno o pago dos 200 millóns de euros que debe a Galicia pola mensualidade do IVE do ano 2017, que é unha parte substancial dos 370 millóns de euros que aínda lle adebeda o Executivo a todos os galegos. Enviarase ao Executivo un requirimento previo, tal e como se establece na Lei, e ante o cal o Goberno terá un mes para responder. De non facelo ou facelo en sentido negativo, de maneira inmediata a Xunta presentará un recurso contencioso-administrativo.
A través da liña específica para proxectos individuais Galicia Exporta Empresas e da destinada a apoiar proxectos colectivos coordinados por agrupacións empresariais Galicia Exporta Organismos Intermedios, impúlsanse tanto actividades de difusión como a participación en eventos expositivos no exterior e accións de prospección internacional. Como novidade nesta convocatoria do primeiro dos programas, engádese a igualdade de xénero como criterio de desempate no caso de que as iniciativas presentadas teñan a mesma puntuación. O Galicia Exporta Organismos Intermedios tamén afonda na dixitalización, e así, entre outras iniciativas, apoiarase a creación de plataformas de comercio electrónico para mercados internacionais.
Subliña que, pese ao déficit tarifario millonario que encontrou o Goberno central en 2011 ,non podemos en ningún caso esquecer que é necesario un marco estable e razoable para poder seguir investindo no ámbito da enerxía.
Durante un encontro co ministro de Exteriores, Feijóo agradeceu o mantemento do Tax Leaxe na axenda comunitaria e urxiu á Unión Europea (UE) unha decisión favorable para que o sector naval galego teña certezas canto antes. Insistiu na necesidade de redobrar os esforzos das negociacións con Bruxelas sobre este modelo.
O Goberno galego mantivo un novo encontro co comité de empresa no que manifesta que o compromiso da Xunta para salvar a empresa segue intacto, e traslada aos traballadores de Alimentos Lácteos que é imprescindible aliñar todas as posturas para salvar o proxecto.
Ao abeiro do convenio asinado entre a Xunta e Peugeot Citroën, a compañía cederá vehículos de última xeración a 4 centros educativos que imparten estas ensinanzas. Ademais o alumnado de ciclos formativos poderá realizar prácticas nas instalacións da empresa, coa que tamén se cooperará para a formación de profesorado.
O titular de Economía e Industria da Xunta destaca a necesidade de inculcar a cultura emprendedora entre os estudantes. Conde defende a transferencia do coñecemento universitario ao mercado para que Galicia gañe competitividade e xere emprego, potenciando o traballo conxunto das empresas e os investigadores públicos
Destaca o investimento de 4,4 millóns de euros para as administracións locais que melloren os parques empresariais instalados nos seus termos municipais, o que supón duplicar o orzamento do exercicio anterior destinado a este fin. Investiranse 10,2 millóns de euros en obradoiros de emprego, que suporán a creación de 1.000 empregos.
O presidente do Banco Sabadell, Josep Oliu, presenta a Feijóo unha estratexia de crecemento en Galicia e trasládalle o compromiso co mantemento do nivel de emprego do Banco Gallego. Feijóo pide fluidez do crédito para familias e emprendedores.
Feijóo asegura que aproveitamos a oportunidade de Pemex ao confirmar a construción dos dous floteis e a base loxística no Porto da Coruña, e ao abrirse a vía para a renovación da súa flota menor e a entrada no capital dun estaleiro da ría de Vigo.
O titular da Xunta di que México pode ter máis barcos galegos e Galicia máis investimento mexicano, durante o encontro que mantivo co presidente Peña Nieto. Logo desta entrevista, Feijóo visitou Porto Progreso, considerado como a porta de entrada ao Golfo de México.
Inicia contactos co Goberno de México para estudar a posibilidade de exportar produtos lácteos galegos a este país e busca emprendedores que se comprometan con Galicia como socio prioritario. O director de LICONSA ten previsto visitar Galicia en breve.
