viernes, 6 de noviembre de 2026
Sobre este punto, Feijóo incidiu en que, se ben a normativa comunitaria e española sobre competencia impiden fixar uns mínimos para os produtos agrícolas, pódese actuar para que a cadea de valor constrúa o prezo dos produtos do sector primario a partir do custo de produción dos agricultores e gandeiros, evitando deste xeito, as vendas a perdas.
Así as cousas, e tendo en conta o escenario europeo, expuxo a necesidade de que o Goberno central apure tanto a transposición da directiva europea 633/2019 converténdoa de forma inmediata en lei nacional, como a modificación da lexislación nacional, coa constitución de grupos de traballo no que participen todas as comunidades.
Ademais o presidente destacou que, para paliar a situación que está vivindo o agro en España e tamén na nosa Comunidade, debe seguirse o modelo de Galicia: actuar desde o punto de vista fiscal rebaixando o imposto de sociedades, o imposto da renda ás persoas físicas e o imposto de bens inmobles (IBI) no ámbito rural. E non o propoñemos agora, propuxémolo hai tempo e o comunicamos ao Ministerio hai meses, dixo, lembrando que esta rebaixa fiscal no rural foi aprobada no Parlamento de Galicia e está en marcha desde o ano 2016.
Desde o ano 2016 Galicia é a única Comunidade de España con Impostos Cero no Rural, e os beneficiarios desta política fiscal sen impostos chegan a máis de 70.000 familias: exactamente 70.003 familias fixeron transaccións no rural sen impostos, aseverou, ao mesmo tempo que recordou que non se trata de suprimir o imposto da renda ou o de sociedades, pero si diminuílos en función de determinadas condicións para algunhas explotacións agrarias e forestais en España. Iso si que é traballar no ámbito de prezos e facer competitivo o sector agrario, gandeiro e forestal en España, concluíu.
Pola súa banda, o conselleiro do Medio Rural, José González, lembrou que onte mesmo lle trasladou ao ministro de Agricultura, Pesca e Alimentación, Luis Planas, as últimas propostas de Galicia sobre a mellora dos prezos no sector e da fiscalidade no agro. Neste sentido, destacou que deste xeito, Galicia toma a dianteira nesta materia e na defensa dunhas rendas dignas para o sector, pola vía da mellora tanto dos prezos como da tributación.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
