viernes, 6 de noviembre de 2026
O presidente do Goberno galego, Alberto Núñez Feijóo, destacou hoxe na rolda de prensa do Consello que Galicia volveu cumprir en 2019 os obxectivos de déficit e débeda fixados no orzamento e pagou aos provedores na metade de tempo que a media autonómica.
Logo de avaliar o informe presentado pola Consellería de Facenda, sobre o avance do peche do exercicio 2019, Feijóo trasladou a conclusión de que, un ano máis, Galicia cumpriu o tope de déficit autorizado e o tope de débeda autorizada, e fíxoo pagando sempre en prazo aos nosos provedores, pese aos retrasos e aos impagos do Goberno central e situándose entre as CC.AA. con maior capacidade investidora.
En primeiro lugar, no informe consta que Galicia de novo cumpriu o obxectivo de déficit previsto, que era do 0,1% e quedou no entorno do 0,09%, executando o orzamento aprobado polo Parlamento de Galicia, que incluíu como ingresos os preto de 200 millóns de euros da mensualidade do IVE do ano 2017.
Logo de recordar que o Goberno central non ingresou un terzo dos 334 millóns de euros das entregas a conta ata o 30 de decembro do ano pasado, o último día hábil do ano, Feijóo aseverou que, pese a iso, a Xunta cumpriu.
No que atinxe ao endebedamento, cómpre salientar que a comunidade tamén volveu cumprir en 2019 o seu tope máximo autorizado e baixou a débeda. Así, o presidente do Executivo galego que cos cálculos do avance do peche do exercicio, 2019 pechouse cunha ratio de débeda/PIB do entorno do 17,5%, sensiblemente por debaixo do tope autorizado do 17,9%. E con estas primeiras estimacións, destacou que o pasado ano será o primeiro en que non só baixe a ratio débeda/PIB, senón tamén o endebedamento absoluto.
Así mesmo, Feijóo explicou que a Administración galega presentou en 2019 un período de pago, de media, de 18,3 días, a metade que a media de comunidades, que superou os 37.
Por último, e en relación ao esforzo investidor, cómpre salientar que Galicia atópase entre as autonomías con maior esforzo investidor, dedicando o dobre de porcentaxe que a media a investimentos. Así, o peso do gasto de capital sobre o gasto non financeiro foi do 11,4%, fronte ao 5,8% de media.
O titular da Xunta concluíu aseverando ademais que o Goberno galego seguirá reclamando os 170 millóns de euros dos incentivos por ser unha comunidade cumpridora en todos os parámetros fiscais durante os exercicios 2017 e 2018.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
