Noticias economia
O presidente do Goberno galego, Alberto Núñez Feijóo, anunciou hoxe na súa intervención na Deputación Permanente novas iniciativas que a Xunta porá en marcha para facer fronte á situación xerada pola pandemia do coronavirus e que serán avaliadas no Consello, que se celebrará mañá venres. Así, nun primeiro termo, avanzou a publicación nos próximos días dunha nova orde para ampliar os contratos de 145 facultativos máis médicos, farmacéuticos, psicólogos e radiofísicos-, ademais de 22 enfermeiros. Este proceso sumarase á orde publicada onte mesmo no DOG e que permitirá ampliar desde o próximo 1 de abril os contratos de 160 médicos residentes e 31 enfermeiros especialistas residentes, que están no seu último ano de formación.
O conselleiro de Economía, Emprego e Industria, Francisco Conde, mantivo hoxe un encontro por videoconferencia con entidades do sector financeiro para avanzar na posta en marcha das medidas de apoio a empresas e autónomos aprobadas pola Xunta. Na xuntanza participaron representantes de varias entidades bancarias e das sociedades de garantía recíproca Afigal e Sogarpo. Con eles, Conde abordou polo miúdo as medidas de financiamento que o Goberno galego vai activar para inxectar de inmediato liquidez a empresas e autónomos que se están vendo afectados polo impacto do coronavirus no sector económico.
O presidente do Goberno galego, Alberto Núñez Feijóo, informou hoxe na rolda de prensa do Consello das novas medidas postas en marcha pola Xunta para a prevención e o seguimento do coronavirus. Estamos a falar de 380 millóns de euros: 51,5 millóns de investimento sanitario, 270 millóns en medidas económicas, 33 millóns en materia de política social e arredor de 25 millóns para os sectores turístico e cultural, detallou.Seguimos a traballar e a poñer en marcha novas medidas para loitar contra o virus e estar preparados para facerlle fronte no sistema sanitario, especialmente nos próximos días; para que Galicia non se paralice na medida do posible; e para apoiar a quen máis o precisa e que non sufra un dano aínda maior a consecuencia desta situación, dixo.
A posta en valor das terras abandonadas aptas para cultivos ou prados suporía para a economía galega a creación de máis de 15.000 empregos (entre directos e inducidos) baseados en actividade agrícola, gandeira e forestal. A futura Lei de recuperación e posta en valor da terra agraria ofrece diversas ferramentas de mobilización neste sentido, entre as que destacan os polígonos agroforestais, as aldeas modelo, as agrupacións de xestión forestal conxunta e as permutas de especial interese agrario. Todas elas teñen carácter voluntario e beneficiarán tanto aos propietarios como aos agricultores, gandeiros e silvicultores, ademais de aos novos emprendedores e investidores.
O conselleiro de Economía, Emprego e Industria, Francisco Conde, participou esta mañá en Madrid na mesa de traballo para impulsar unha transición enerxética xusta nas Pontes onde reclamou a reactivación inmediata da central térmica e que o Goberno se sume á unidade de acción de Galicia. Conde lamentou que a situación, tras a reunión, sexa igual á de hai cinco meses ao non achegar nin o Goberno nin a empresa ningunha proposta ou alternativa. Pediu que o Executivo do Estado se sume á postura que comparten traballadores, Concello das Pontes e Deputación da Coruña para adoptar canto antes as medidas necesarias que permitan a Endesa reactivar a planta mentres non se atopan biocombustibles alternativos.
A fábrica de Vigo do Grupo PSA é unha das principais plantas de produción da compañía e un dos piares da economía da cidade e de Galicia. Entre 2014 e 2019, o efecto tractor de PSA permitiu crear na comunidade 5.000 novos postos de traballo, ata alcanzar os 22.300 empregos directos no sector da automoción; e os modelos K9 e V20 supoñen unha importante cifra de negocio para o sector auxiliar galego, chegando aos 1.100 millóns de euros. Ademais, PSA participa en dúas iniciativas como a Business Factory Auto, que está a desenvolver a súa 4ª edición; e o Hub de Innovación Dixital, impulsado polo Cluster de Empresas da Automoción de Galicia.
Galicia pechou febreiro de 2020 con 7480 parados menos que hai un ano, o que supón unha baixada do -4,31% e un nivel de desemprego moi inferior ao rexistrado hai once anos, xa que en febreiro de 2009 había 206.570 parados fronte aos 166.229 actuais. Ademais, a caída de Galicia supera en tres puntos á media estatal, situándose como a segunda Comunidade na que máis descende o desemprego en termos absolutos e a terceira en relativos. Por sétimo ano consecutivo redúcese o paro en Galicia nun mes de febreiro e faino nas catro provincias galegas.
A economía galega repuntou no 4º trimestre do ano ao rexistrar un crecemento interanual do 1,8%, unha décima máis que o trimestre anterior, ao tempo que creou 14.903 postos de traballo a tempo completo asalariados, segundo os datos de contabilidade trimestral publicados polo Instituto Galego de Estatística (IGE). No último trimestre do ano, o Produto Interior Bruto (PIB) de Galicia medrou un 1,8% en taxa interanual, unha décima máis que no trimestre anterior. En canto á evolución sobre o terceiro trimestre, os datos do IGE mostran que a economía galega rexistrou un avance do 0,5% en taxa trimestral, tamén unha décima máis que no trimestre anterior.
O sector agroalimentario xera en Galicia un total de 103.521 postos de traballo, o que supón un 9,3% do traballo total, e achega un 6,9% do Produto Interior Bruto (PIB) da economía autonómica (4.126 millóns de euros), segundo un estudo sobre a actividade publicado hoxe polo Instituto Galego de Estatística (IGE) e elaborado a partir de datos de 2017. As actividades primarias son as que predominan, especialmente en termos de emprego, xa que o 69,4% dos postos de traballo do sector proveñen das mesmas. A rama con máis xeración de valor e con máis postos de traballo creados é a Agricultura, gandaría, caza e servizos relacionados con elas. Séguelle en importancia a Pesca e a Industria de procesamento e conservación de peixes, crustáceos e moluscos.
Os mozos galegos contarán cun novo Plan estratéxico de xuventude, con 125 medidas para os ámbitos do emprego, o rural, a creatividade, a formación, a participación e o Xacobeo 2021. Na súa elaboración tivéronse en conta as prioridades da mocidade, a través de encontros provinciais e de cuestionarios de valoración das políticas da Administración autonómica, que supuxeron contar coa opinión de máis dun milleiro de mozos. Entre as novas iniciativas que contempla o plan destaca a convocatoria, nas vindeiras semanas, dunha nova liña de axudas para a obtención do carné de conducir de tipo B e C , un dos principais requisitos para acceder a un posto de traballo.
Destaca que Galicia tivo o mellor mes de abril no que a exportacións se refire desde que hai rexistros, cun incremento do dobre da media nacional de exportacións.
A Xunta de Galicia anima aos empresarios galegos a que teñan en conta a alta demanda de produtos e servizos de calidade en China. En 2012, as exportacións galegas ao país asiático medraron un 25% por parte de 323 empresas.
O director da Agadic compareceu petición propia para explicar tanto as liñas programáticas como as actuacións concretas do organismo que incidirán nos sectores audiovisual, escénico e musical. Fixo unha diagnose realista da situación económica e dos principais problemas.
A Xunta segue a defender a arbitraxe como a mellor fórmula para que o 100% dos aforradores recuperen o 100% dos seus aforros. O IGC está a informar sobre o procedemento xudicial a seguir e as opcións de xustiza gratuíta para aqueles que poidan beneficiarse da mesma nos supostos da lexislación.
A modificación respecto ao último trimestre de 2012 débese a que Galicia foi a primeira comunidade en completar en 2013 o programa anual de débeda. Nos vindeiros trimestres Galicia reducirá a ratio de débeda e mellorará a súa posición comparativa co resto de comunidades.
Un total de 768 firmas expositoras, procedentes de 19 países estarán ubicadas en máis de 57.000 metros cadrados no Recinto Feiral de Silleda onde se crea un enorme espazo para o comercio do sector agrogandeiro, que pretende abrir unha ventá de oportunidades para moitas empresas galegas.
O presidente da Xunta asegurou no Parlamento de Galicia que a Xunta apoiará ao sector da minaría sempre que cumpra as leis e estudando caso por caso, avanzando tamén que non aceptará a mina de feldespato de Xinzo. Di que as portas están abertas aos proxectos que xeren emprego, sexan viables, sostibles e seguros.
A Xunta recibe a expertos latinoamericanos en cooperación transfronteiriza que buscan coñecer o labor da Eurorrexión. Amosarase como Galicia foi pioneira no espazo ibérico en incluír unha política de cooperación transfronteiriza entre as prioridades institucionais dos gobernos.
O presidente da Xunta di que esta decisión afectará á deducción do 20% do IRPF para os que invistan ou financien novas empresas, á reducción do 95% do imposto de sucesións e doazóns de diñeiro para emprender e á bonificación do 75% do imposto de patrimonio.
Galicia Calidade promociona no V Salón Vinis Terrae de Ourense os produtos amparados polo selo de garantía. Os viños das 9 adegas que contan coa marca estarán presentes no Tunel do Viño que inclúe unha degustación agroalimentaria de produtos con este selo.
