viernes, 6 de noviembre de 2026
O presidente do Goberno galego, Alberto Núñez Feijóo, constatou esta mañá que a Xunta e o Grupo PSA reforzarán a súa colaboración cos vehículos eléctricos e híbridos como prioridade. Así se desprende da xuntanza que tivo lugar hoxe, en París, entre a compañía, presidida por Carlos Tavares, e o Executivo autonómico.
Galicia quere seguir traballando con PSA e quere seguir sendo un lugar especial para o grupo, dixo o titular da Xunta, facendo fincapé no interese da Comunidade en estar presente no impulso da electrificación dos vehículos industriais, nas decisións innovadoras sobre o coche autónomo, así como na fabricación de baterías.
Feijóo aproveitou o encontro para valorar a aposta e o compromiso do Grupo PSA coa fábrica de Vigo, unha das principais plantas de produción da compañía e un dos piares da economía da cidade e de Galicia, como amosan os seus datos. Non en van, entre 2014 e 2019, o efecto tractor de PSA permitiu crear na comunidade 5.000 novos postos de traballo, ata alcanzar os 22.300 empregos directos no sector da automoción; e os modelos K9 e V20 supoñen unha importante cifra de negocio para o sector auxiliar galego, chegando aos 1.100 millóns de euros.
E estamos a conseguir un récord de produción de vehículos, xa que 1 de cada 5 automóbiles que se fabrican en España, proceden da Comunidade, engadiu, subliñando que segundo os datos da factoría, a previsión é que a produción en Balaídos chegue aos 600.000 vehículos ao ano, récord histórico de produción desde que se fundou a fábrica en Vigo.
Feijóo incidiu tamén no compromiso de PSA Vigo coa innovación, a través da súa participación en dúas iniciativas como a Business Factory Auto, que está a desenvolver a súa 4ª edición; e o Hub de Innovación Dixital, impulsado polo Cluster de Empresas da Automoción de Galicia. Así como co desenvolvemento de novos produtos, a través do traballo no ámbito da I+D+i e co apoio á formación.
En definitiva, nesta visita testemuñamos que este grupo está a cumprir con Galicia e que estamos no mellor momento da automoción na comunidade, con 5.000 empregos máis; con máis de 22.300 empregos no sector e cunha facturación récord no que ás empresas de compoñentes se refire, abundou.
Nesta liña, cómpre recordar que o sector da automoción supón o 13% do emprego industrial de Galicia; factura un total de 8.650 millóns -o 13,5% do PIB de Galicia-; supón un 14,13% da produción estatal; e as súas exportacións alcanzan os 5.700 millóns de euros, o 25% das exportacións de Galicia.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
