Actualidad de Sociedad

Incorpóranse a adrenoleucodistrofia ligada ao cromosoma X (X-ALD), a mucopolisacaridiose tipo I (MPS I) e a enfermidade de almacenamento de glicóxeno tipo II (Pompe) para poder diagnosticalas e comezar os tratamentos antes de que os síntomas sexan clinicamente evidentes. En particular, a adrenoleucodistrofia ligada ao cromosoma X (X-ALD), cunha prevalencia de 1 caso por cada 17.000 nacementos, pode provocar déficits neuropsiquiátricos e insuficiencia suprarrenal. A mucopolisacaridiose tipo I (MPS I), cuxa prevalencia se estima en 1 caso por cada 50.000 nacementos, pode provocar discapacidade intelectual grave e, sen tratamento, os pacientes falecen antes da primeira década de vida.

O presidente da Xunta, Alfonso Rueda, informou de que o Consello aprobou o Plan galego de reprodución humana asistida 2024-2028, que vai permitir que Galicia sexa a comunidade que ofrece a carteira deste tipo de servizos máis ampla de España. Este Plan é dun dos compromisos” do Goberno autonómico para esta lexislatura, co que se busca ampliar o número de beneficiarios dos servizos de reprodución asistida na sanidade pública. Entre as principais novidades está ampliar progresivamente a idade máxima de acceso a estas técnicas desde o límite actual dos 40 anos ata cumprir os 45 anos e incluír ás mulleres que xa teñan un fillo.

O mercado operará mediante créditos certificables que poden ser vendidos a través dunha plataforma de comercialización que servirá de nexo entre os axentes promotores dos proxectos e os compensadores. Estes últimos -organizacións públicas e privadas, ou incluso cidadáns- son os que adquiran ou utilicen créditos de carbono, ben sexa como persoas intermediarias ou ben como axentes finais co fin de compensar as súas emisións. O obxectivo é que tanto o tecido empresarial como os cidadáns poidan contribuír á loita contra o cambio climático mediante o financiamento de proxectos sostibles impulsados por gandeiros ou silvicultores.

Inaugurouse hoxe na Cidade da Cultura 'Tattoo. Arte baixo a pel', a maior exposición internacional sobre tatuaxe desenvolvida ata o momento. A mostra ábrese ao público no Gaiás logo de ser visitada por máis de dous millóns de persoas no seu amplo percorrido por museos e institucións culturais de Francia, Canadá, Estados Unidos, Taiwán, Rusia e os centros da Fundación “la Caixa” en España. 'Tattoo. Arte baixo a pel' presenta 240 pezas históricas e contemporáneas procedentes dunha vintena de países. Atopamos obxectos rituais e decorativos, fotografías, debuxos, pinturas, utensilios de tatuar tradicionais e 26 modelos hiperrealistas de silicona tatuados por algúns dos mellores artistas actuais da tatuaxe.

O Servizo Galego de Saúde realizou no primeiro semestre deste ano 2024 un total de 3.500 cirurxías prioritarias máis que no mesmo período do ano 2019, o anterior á pandemia da covid 19. Así o destacou a secretaria xeral técnica da Consellería de Sanidade, Natalia Lobato, na súa intervención na Comisión 5ª de Sanidade do Parlamento de Galicia. Explicou que o Servizo Galego de Saúde realiza as súas intervencións sanitarias atendendo a criterios clínicos e priorizando aos pacientes en función da enfermidade ou gravidade da súa patoloxía, levando a cabo unha xestión das listas de espera por prioridades e orientada aos resultados en saúde.

Co título de ‘Miradas complementarias. Unha análise multidisciplinar do conflito palestino-israelí en Oriente Próximo’, desenvolveranse na Facultade de Filosofía o mércores 30 de outubro a partir das 17.00 horas unha xornada na que se fará un achegamento á cuestión desde distintos puntos de vista, que inclúen a filosofía, a política, a historia ou a antropoloxía. A entrada a esta xornada, en cuxa organización colaboran a Facultade de Filosofía da USC e a Fundación Araguaney, é libre ata completar a capacidade do espazo; tamén se poderá seguir en liña.

A Enquisa estrutural a fogares, coñecemento e uso do idioma galego publicada hoxe polo Instituto Galego de Estatística reflicte que 7 de cada 10 persoas se comunican en lingua galega. Así o explicou hoxe o secretario xeral da Lingua durante a presentación das últimas novidades do portal Neofalantes.gal, a plataforma divulgativa e educativa posta en marcha en colaboración coa Universidade de Santiago de Compostela para analizar o proceso de incorporación do uso do galego por parte das persoas que tiveron outro idioma como primeira lingua.

A Consellería de Sanidade iniciou hoxe a vacinación infantil fronte á gripe, unha campaña que se ofrece a 72.561 nenas e nenos de 6 a 59 meses de idade. Desta forma, a Xunta cita por sms, de forma proactiva, as familias para que acudan á vacinación organizada nos centros de saúde de referencia de toda Galicia. Como novidade, nenas e nenos de 24 a 59 meses recibirán este ano por primeira vez a vacina intranasal, coa que se pretende mellorar a adherencia á campaña ao ser de máis fácil administración. Nesta franxa de 2 a 5 anos a poboación diana é duns 49.480 nenos e nenas.

Foi presentado o Festival Mundial do Ilusionismo Galicia Ilusiona, que percorre por terceira vez toda Galicia con actuacións nas sete grandes cidades galegas. O Festival Mundial do Ilusionismo “Galicia Ilusiona” inclúe as sete grandes urbes galegas para converter a Galicia na capital mundial do ilusionismo. Así, o espectáculo xa pasou nos primeiros días de outuburo por A Coruña, Ourense e Pontevedra. A vindeira fin de semana estará en Santiago de Compostela (días 11 e 12) e Ferrol (13 de outubro). Antes de pechar en Vigo estará tamén en Lugo (18 de outubro). Galicia Ilusiona contará con artistas de sona internacional coma o mago Murphy, Lore Lavand, Jerome Murat ou Ki Moon do.

Galicia acaba de comezar o outono cun mes de setembro moi frío e que foi tamén o máis chuvioso no que levamos de século. De feito, as precipitacións rexistradas no conxunto do territorio superaron nun 62% os valores que habitualmente se recollen nesta época do ano. Segundo o avance do último informe climatolóxico elaborado por MeteoGalicia, a chuvia media acumulada durante o mes pasado foi de 143 litros por metro cadrado, un rexistro que reflicte que as chuvias que se recolleron no conxunto da Comunidade superaron os valores climáticos normais para setembro. En canto á temperatura media, os valores dos termómetros estiveron, en xeral, moi por debaixo do agardado e a anomalía media para este mes situouse en -1 grao centígrado.