lunes, 14 de septiembre de 2026
A conselleira de Vivenda e Planificación de Infraestruturas, María M. Allegue, inaugurou as xornadas nas que se abordarán as claves da Axenda Territorial de Galicia para as vindeiras décadas.
M. Allegue, acompañada da directora xeral de Urbanismo, Encarnación Rivas, do director da Axencia Galega de Infraestruturas, Francisco Menéndez, e do director xeral de Pesca, Acuicultura e Innovación Tecnolóxica, Antonio Basanta, interveu nas xornadas Cara a unha Axenda Territorial de Galicia. Integración urbana e rural.
As xornadas, celebradas na sede da Fundación RIA, presidida por David Chipperfield, desenvolveranse os vindeiros catro días e contarán coas intervencións de expertos do urbanismo, da mobilidade, da vivenda ou da cohesión social. Nas distintas mesas reuniranse experiencias de éxito nacionais e internacionais e tamén locais.
Nestes encontros terá lugar o intercambio de experiencias sobre asuntos como a singularidade territorial galega, conxugando o urbano e o rural; o equilibrio entre a contorna construída e o natural; o sistema de circularidade; a investigación e formación; a gobernanza ou a planificación vinculante da política estratéxica e a realidade.
A conselleira remarcou que estes coloquios permitirán consensuar os posicionamentos, tamén sobre o proceso de cogobernanza dos actores públicos e privados ligados a o territorio.
Subliñou que a Xunta aposta pola escoita aos axentes implicados na ordenación e protección do territorio, co fin de concretar os desafíos e poder acertar na toma de decisións, tanto políticas coma de xestión.
Trátase da segunda fase dun programa de diálogo con varios sectores que a Xunta comezou en 2022 e que este ano avanza para concretar estratexias para o desenvolvemento e a protección do territorio galego nas próximas décadas. Neste sentido, agradeceu a colaboración e o apoio da Fundación RIA e do Colexio de Arquitectos de Galicia (COAG) neste procedemento.
A responsable de Vivenda concluíu destacando a importancia de favorecer o desenvolvemento equilibrado e sustentable do territorio, contribuír a elevar a calidade de vida e a cohesión social da poboación e protexer e potenciar o patrimonio.
A novena edición do WOS Festival x SON Estrella Galicia reunirá 26 proxectos de música electrónica e experimental contemporánea, con propostas que transitan pola composición electroacústica, a música de club, a improvisación, a performance audiovisual e diferentes formatos híbridos. A programación destaca ademais pola súa dimensión internacional e polo carácter inédito de boa parte das propostas. Así, 13 dos 26 proxectos da programación principal chegarán a Santiago sendo estreas en España. Entre eles figura a presentación mundial do novo concerto audiovisual de Blood of Aza.
A reposición dálle continuidade á aposta do Centro Dramático Galego por recuperar títulos do seu repertorio que manteñen a demanda do público máis alá da súa primeira exhibición. No caso de 'A serie clopen', as 33 funcións ofrecidas no Salón Teatro durante a súa estrea en 2025 reuniron arredor de 5.500 espectadores, antes de iniciar unha serie de representacións por outros espazos de Galicia e de Portugal. O regreso aos escenarios prodúcese despois do recoñecemento acadado pola produción nos Premios de Teatro María Casares, pois obtivo dous galardóns: Natalia Pajarito, como mellor actriz protagonista, e Marta Alonso Tejada, pola dirección de movemento.
