Noticias economia
A comunidade rematou o ano co 100 % do orzamento executado, cun superávit do 0,25 %, reducindo a débeda en 234 millóns de euros e rebaixando a ratio débeda/PIB ata o 14,5 %. Galicia pechou o exercicio cun superávit de 202 millóns de euros. Un saldo positivo motivado por unha liquidación do SFA superior á inicialmente prevista, que permitiu a recuperación da concesión de catro autovías, cun aforro de 342 millóns de euros nos exercicios futuros. Esta operación ten carácter financeiro e, polo tanto, non ten impacto no cálculo do saldo. A débeda por habitante sitúase na comunidade nos 4.395 euros fronte aos 6.870 euros da media de comunidades.
Ademais, Galicia lidera un ano máis o esforzo investidor, cun 16,4% do gasto de capital sobre o gasto non financeiro, case o dobre da media.
A débeda pública de Galicia representa só 3,55 % do total da débeda do conxunto das comunidades, o mellor dato de toda a serie histórica, que comeza no ano 1994. Ademais, Galicia é a Comunidade Autónoma que máis reduciu a súa débeda ao peche do exercicio 2024, 234 millóns de euros menos que a finais de 2023. Deste xeito, a débeda de Galicia sitúase no 14,5 % do PIB, fronte ao 21,1 % da media autonómica. O secretario xeral Técnico e do Tesouro da Consellería de Facenda e Administración Pública compareceu hoxe a petición propia na Comisión 3ª do Parlamento para dar conta do endebedamento da Comunidade Autónoma de Galicia ao peche do exercicio de 2024.
A conselleira de Economía e Industria, María Jesús Lorenzana, salientou hoxe a importancia de que exista un diálogo fluído entre Alcoa e o comité de empresa nun ano, dixo, que vai ser 'crucial' para a compañía, posto que sairá da súa condición de empresa en crise e poderá ter acceso, polo tanto, a axudas públicas e outras vías de financiamento. Segundo apuntou, para iso, o prazo que manexa a propia Alcoa é o último trimestre de 2025 cando, engadiu, ao superar esa condición 'vai poder abrir todo un campo de vías tanto de financiamento como de apoios públicos'. 'Cremos que este ano é crucial', sinalou Lorenzana, para que 'xa poida comezar a funcionar no mercado económico con normalidade'.
O presidente autonómico, Alfonso Rueda, anunciou a aprobación por parte do Consello da Xunta do Plan director da automoción para o período 2025-2027, que 'estará dotado de 230 millóns de euros' para impulsar un sector 'que está a vivir a súa propia revolución industrial coa chegada do vehículo eléctrico'. Esta industria foi declarada estratéxica xunto coa metalmecánica, a naval, o sector forestal-madeira, a industria das TIC, a loxística industrial, a industria da alimentación, o sector téxtil e confección e a industria da construción. O Plan director da automoción é o resultado dun proceso participativo e colaborativo de interlocución con todo o sector.
Alfonso Rueda destacou que o Goberno autonómico traballa no deseño da nova Estratexia de internacionalización da empresa galega 2026-2030, a folla de ruta para seguir potenciando a saída ao exterior das empresas galegas e que inclúe medidas para que o tecido produtivo afronte mellor os retos do futuro máis inmediato. Rueda salientou a posible implantación de aranceis por parte de Estados Unidos ao produtos doutros países. Nesta liña lembrou que, na actualidade, hai 'un millar de empresas galegas que exportan aos EEUU, das que 350 o fan de forma regular'.
A economía galega medrou un 2,9% no cuarto trimestre de 2024 en relación ao mesmo período do ano anterior, como se desprende da información publicada polo Instituto Galego de Estatística. En canto á evolución intertrimestral, de setembro a decembro de 2024 o PIB autonómico aumentou un 0,8%, mentres que o ano se pechou cun crecemento do 2,8%. Os datos de contabilidade trimestral do IGE mostran que o emprego en termos de postos de traballo equivalentes a tempo completo- medrou no cuarto trimestre un 1,0%.
O titular do Executivo galego, Alfonso Rueda, sinalou que o reparto da débeda autonómica entre todos os españois suporá que cada galego deba pagar 220 euros máis. Ademais, sinalou que a débeda mutualizada a Galicia 'non desaparece', súmase á doutras Comunidades Autónomas e increméntase a que 'pasa a ter cada galego'. Durante a sesión de control no Pleno do Parlamento de Galicia, o presidente da Xunta sinalou que a mutualización dos 4.000 millóns de débeda autonómica non implica a transferencia directa deses recursos e que pasen a estar a disposición da Xunta. Con esta medida, parte da débeda das autonomías pasaría a estar asumida pola Administración Xeral do Estado, pero as comunidades non contarían con novos recursos e unicamente aforrarían o pago de parte dos xuros.
Ata o de agora, o teito de renda para unha unidade familiar para o acceso á unha VPP situábase en 2,5 veces o Indicador Público de Renda de Efectos Múltiples (Iprem), límite que pasará a ser de 3 veces o Iprem. Con respecto ás VPA de réxime especial, o límite máximo do Iprem increméntase tamén en medio punto, pasando de 3 a 3,5; e pasando ademais do 4,5 ata 5 veces o Iprem nas vivendas de réxime xeral. Mantense o tramo de ingresos ponderados para o acceso ás VPA de réxime concertado, en ata 6,5 veces o Iprem. Ata o de agora, para que unha parella cun fillo poda adquirir unha VPP ou unha VPA de réxime especial, o Iprem fixaba os ingresos máximos anuais brutos en ata 26.250 euros. Coa modificación do tope, e a modificación dos tramos de ingreso, esa mesma unidade familiar para a adquisición da mesma vivenda, acadará os 31.500 euros anuais brutos.
O presidente da Xunta, Alfonso Rueda, sinalou hoxe que Galicia deixa de ingresar 127 millóns de euros cada mes pola inacción do Goberno central na actualización das entregas a conta. Tal e como destacou Rueda, esta é unha das conclusións do informe sobre as repercusións na Tesourería da Comunidade do retraso da actualización do importe das entregas a conta do Sistema de Financiamento Autonómico (SAF), que o conselleiro de Facenda e Administración Pública, Miguel Corgos, presentou hoxe no Consello de Goberno. Para o titular do Goberno galego, o próximo Consello de Política Fiscal e Financieira vai ser unha oportunidade perdida se non se fala do financiamento autonómico, unha cuestión prioritaria.
A repotenciación dos 25 parques eólicos máis antigos de Galicia, por superar os 25 anos de antigüidade, permitirá a retirada de máis de 800 aeroxeradores da paisaxe galega, que quedan reducidos a unha media de 120. A día de hoxe, os cinco parques eólicos que hai en Galicia xa repotenciados están na provincia da Coruña: en Zas, Corme, Cabo Vilán, Malpica e entre Mañón e Ortigueira (Serra da Panda II). Á espera de coñecer os datos do informe anual de Rede Eléctrica, Galicia é a terceira Comunidade Autónoma con maior produción eléctrica a partir da forza do vento (9.086 GWh). A eólica foi a tecnoloxía renovable que máis GWh achegou durante 2023 ao mix enerxético autonómico, ata o 38,1 %.
Cooperativas e Sociedades Laborais representan o 5% do PIB galego, podendo chegar ao 7% ao sumar outro tipo de entidades. Así o constata o Informe sobre a Economía Social en Galicia 2019, presentado este venres na Facultade de Ciencias Económicas e Empresariais da USC e que ten como obxectivo cuantificar a importancia que na Comunidade Autónoma ten todo o conxunto de familias que compoñen a Economía Social. No ano 2019, tal e como evidencia o informe, creáronse 56 novas cooperativas en Galicia, o que supuxo un crecemento do 4,1%.
A Xunta de Galicia facilitará que toda a poboación galega teña acceso a servizos financeiros no seu concello, de modo que dispoñan dun caixeiro automático no seu municipio e poidan acceder tamén a servizos de asistencia financeira e de formación en banca electrónica. A FEGAMP actuará como intermediaria entre a Administración galega e as entidades locais e trasladará a todos os concellos toda a información.
A Facultade de Ciencias Económicas e Empresariais da Universidade de Santiago de Compostela, e a Asociación de Economía Crítica organizan, integramente en liña os días 4 e 5 de febreiro, as Xornadas de Economía Crítica (JEC), un espazo de encontro aberto que conta xa con tres décadas de traxectoria. Nesta ocasión, as xornadas desenvólvense baixo o lema Emerxencias, Transicións e Desigualdades Socioeconómicas.
Galicia pechou o mes de novembro sendo a segunda comunidade autónoma que paga máis rápido as súas facturas cun período medio de pago de 18,90 días, só por detrás de Murcia, segundo os datos oficiais publicados hoxe polo Ministerio de Facenda. Ao peche do mes de novembro, o período medio de pago de Galicia situouse en 18,90 días.
Unha investigación sobre o papel de Galicia como núcleo e periferia na división global de actividades extractivas, e unha análise sobre os últimos 30 anos do sector agrario e agroalimentario, son os traballos recoñecidos co Premio Valentín Paz Andrade de investigación en economía de Galicia na modalidade dirixida a artigos científicos. No apartado de teses de doutoramento recoñeceuse un traballo sobre moto-mecanización da agricultura en Galicia ata o ano 2000.
A directora xeral de Comercio e Consumo, Sol Vázquez, participou mediante videoconferencia na presentación da nova edición dos Días Azuis do Comercio Galego, campaña que se celebrará ata o 30 de novembro co obxectivo de impulsar as vendas do comercio de proximidade e poñer en valor o importante papel económico e social do sector no actual contexto.
Este martes arrancou a través do Campus Remoto da UVigo o ciclo de conferencias Empresa familiar e sostibilidade, organizado pola Cátedra de Empresa Familiar da Universidade de Vigo coa colaboración da Asociación Galega de Empresa Familiar. Na sesión, representantes tanto do eido académico como empresarial afondaron en como afrontan as empresas familiares galegas a aposta pola economía circular reducindo o consumo de materias primas e a xeración de residuos finais.
Galicia pechou o mes de agosto sendo a segunda comunidade autónoma que paga máis rápido as súas facturas cun período medio de pago de 14,46 días, só por detrás de Murcia, segundo os datos oficiais publicados hoxe polo Ministerio de Facenda. En agosto, o período medio de pago de Galicia situouse en 14,46 días, 20 días inferior ao do conxunto das comunidades autónomas que foi de 34,90 días; e por debaixo do límite de 30 días que establece a normativa estatal.
Galicia Calidade vén de incorporar ao selo autonómico produtos das empresas alimentarias Grupo Leche Río (Lugo), Conservas del Noroeste (Vilaboa) e as adegas Gran Bazán (Vilanova de Arousa) e Finca Millara (Pantón), logo de superaren os controis de calidade realizados pola entidade pública. Con estas novas adhesións o selo de garantía suma os produtos e servizos de máis de 135 empresas galegas.
O 43% da man de obra agrícola mundial son mulleres; as mulleres rurais, unha cuarta parte da poboación mundial, traballan como agricultoras, asalariadas e empresarias. A Asociación Galega de Cooperativas Agroalimentarias ten como unha das súas metas a consecución da igualdade de xénero no contorno cooperativo do sector agroalimentario e un paso adiante neste senso supúxoo o nacemento, o pasado ano, de Nós, As Mulleres.
