Actualidad de Economía

O presidente da Xunta, Alfonso Rueda, anunciou hoxe que o Consello deu luz verde ao proxecto de Lei de Orzamentos da Comunidade Autónoma para 2025, 'os presupostos máis altos da historia de Galicia' que aumentan o investimento en infraestruturas e no reforzo da actividade empresarial preto dun 5 % (4,7 %), co obxectivo de impulsar o crecemento futuro de Galicia. O incremento é case o dobre do que medra o Orzamento galego para o vindeiro ano: 2,6%. Deste xeito, tal e como resaltou Rueda, 'Galicia aprobará as súas contas, un ano máis, en tempo e forma' e 'será unha das primeiras comunidades' en facelo coa previsión de que podan entrar en vigor' o 1 de xaneiro de 2025'.

A Xunta de Galicia xa executou o 100% dos fondos europeos recibidos para promover proxectos estratéxicos para o turismo vencellados ao Camiño de Santiago no marco do Plan nacional de sustentabilidade turística en destinos Xacobeo 2021. Un programa dotado de preto de 8,3 millóns de euros e que se inclúe no Plan Xacobeo NextGeneration deseñado polo Executivo autonómico. En concreto, o Plan nacional incluía o deseño por parte da Comunidade autónoma de proxectos tractores para o turismo, para o que a Xunta elaborou unha liña de axudas que impulsasen a posta en valor de elementos patrimoniais senlleiros vinculados ao Camiño de Santiago para dotalos de usos turísticos.

As intensas interrelacións existentes entre as inevitables transicións ecolóxica -en gran medida enerxética- e dixital determinan e condicionan o sector industrial galego. Así o considera o Instituto de Estudos e Desenvolvemento de Galicia da USC (Idega), que decidiu centrar na transición industrial o informe especial deste ano, elaborado no marco de A Economía Galega. Informe. Para o persoal experto do instituto universitario, a transición na industria debe abordarse 'nos contextos do cambio climático, que en parte a motiva, das obrigas adquiridas de descarbonización e, tamén, da crecente conflitividade en distintos puntos do planeta, cun cambio da xeoestratexia global e das relacións de interdependencia a nivel internacional'.

O Goberno galego concedeu no período 2021-2024 un total de 2.374 axudas, por importe de case 9,6 millóns de euros, dirixidas a concellos e particulares co obxectivo de corrixir impactos paisaxísticos na comunidade. Estas achegas (para mellorar o estado de inmobles particulares e de edificios, equipamentos e outras instalacións municipais), mobilizaron un investimento total de 14 millóns de euros. A Consellería de Medio Ambiente e Cambio Climático destaca que a demanda deste tipo de axudas é crecente, o que permitiu que desde o ano 2021 chegaran a 283 dos 313 municipios galegos, o que supón máis do 90% do total.

O mercado laboral de Galicia continúa na súa senda de crecemento e acada, con 120.992 persoas, a cifra de paro máis baixa nun mes de setembro de toda a serie histórica (desde 1996). Ademais, a comunidade galega rexistra 1.085.846 persoas afiliadas, a cifra máis alta nun mes de setembro desde o ano 2008 e que aumenta en 14734 persoas en relación co mesmo mes do ano pasado. Na evolución anual tamén cae o paro nas catro provincias galegas, nas sete grandes cidades, en todos os sectores de actividade e tamén en colectivos prioritarios nas políticas activas de emprego da Xunta como as mulleres, os menores de 30 anos e os parados de longa duración.

RDG Comercializadora Galega de Enerxía venderá o 100% da enerxía a consumidores galegos, tanto particulares como empresas e industrias, sempre a un prezo máis barato que o prezo de mercado, que se poderán beneficiar dun desconto medio do 50% sobre o prezo do mercado no caso da veciñanza que vive próxima a infraestruturas de xeración renovable. No caso dos particulares, os primeiros beneficiarios destas condicións estarán nun radio próximo a onde estea instalado, por exemplo, un parque eólico, ou mesmo en concellos limítrofes. No que respecta ás empresas e industrias, o obxectivo é democratizar o acceso a un prezo eléctrico máis competitivo, para o cal a comercializadora ofrecerá contratos de compravenda de enerxía a longo prazo (PPA) a todo tipo de empresas.

O obxectivo destes galardóns é recoñecer o labor dos profesionais do sector comercial e contribuír á súa difusión como panca para o desenvolvemento económico e social das vilas e cidades galegas. Os establecementos interesados en optar aos premios poderán presentar as súas candidaturas ata o próximo 28 de outubro. Poden resultar recoñecidos en cinco categorías: Premio Comercio 2024, dotado con 5.000 euros; Premio Comercio Traxectoria 2024, ao que lle corresponden 3.000 euros; Premio Comercio Emprende 2024, distinguido con outros 3.000 euros; Premio Comercio Dinamización 2024, cunha contía de 5.000 euros e e Premio Comercio Consumo Responsable, con 3.000 euros.

A Xunta de Galicia ten mobilizado o 83% dos máis de 130M€ de fondos Next Generation que xestiona o goberno autonómico no eido turístico. Nos últimos anos estívose a axilizar e avanzar na mobilización destes fondos coa intención de aproveitar a oportunidade que supón esta inxección económica para mellorar, renovar e completar a oferta turística galega da man da sostibilidade. Entre as accións realizadas a través de plans e liñas de axuda están as destinadas a implantar medidas de eficiencia enerxética nos establecementos turísticos cun investimento de 10M€ -a maior liña de axudas en orzamento posta en marcha cos Next Generation- que se suma aos 3M€ dunha convocatoria anterior.

A Rede Galega de Dinamización da Relación con Empresas ten como obxectivo promover un achegamento entre a Formación Profesional e as empresas, atendendo ás necesidades de persoal dos diferentes sectores produtivos e favorecendo a mellora da competitividade e o desenvolvemento do tecido produtivo. Esta rede actúa como un punto de unión entre o empresariado e os centros de FP, establecendo unha canle de comunicación directa entre administracións, centros educativos e empresas. Neste curso, 41 centros de FP integrarán esta rede. A maior parte deles (18) son da provincia de A Coruña, mentres que hai 11 en Pontevedra, oito en Ourense e catro en Lugo.

Os días 20 e 21 de setembro, 42 novas iniciativas empresariais darán a coñecer os seus produtos e servizos na décimo primeira edición do encontro do emprendemento Pont-Up Store, que terá novamente como sede central a carpa que se instalará na praza de España, onde se desenvolverán tamén boa parte das máis de 25 actividades que integran o seu programa. Impulsado pola Universidade de Vigo e organizado pola Asociación para o Emprendemento e a Innovación Pont-Up Store, co Concello de Pontevedra como patrocinador principal e o apoio de Deputación e Xunta de Galicia, esta iniciativa converterá a cidade na “capital do emprendemento”, como sinalou a vicerreitora do campus, Eva María Lantarón, na presentación do programa de actividades.