sábado, 8 de agosto de 2026
A concelleira de Promoción Económica, Anabel Gulías; o vicepresidente primeiro da Deputación de Pontevedra, Rafael Domínguez; o secretario xeral de Emprego e Relacións Laborais da Xunta de Galicia, Pablo Fernández, e o director do Pont-Up Store, Pedro Figueroa, participaron xunto a Lantarón na presentación dun encontro que busca concentrar na cidade todo o ecosistema emprendedor de Galicia, como sinalou o seu responsable. Impulsado hai once anos polo grupo de investigación que Figueroa dirixiu na UVigo ata a súa xubilación, nesta edición a Asociación para o Emprendemento e a Innovación Pont-Up Store toma o relevo deste grupo á fronte da organización, mais coa UVigo como entidade impulsora, como lembrou Figueroa, tras a sinatura dun convenio de colaboración entre a institución académica e a asociación. Para nós a formación en emprendemento é algo fundamental, subliñou a vicerreitora, que destacou tamén a aposta da organización por seguir innovando, así como que este encontro é o resultado da colaboración entre diferentes institucións.
Protagonismo para o emprendemento universitario
Como lembrou Lantarón, unha das novidades desta edición é o acto de entrega dos premios a teses de doutoramento e traballos de fin de grao e mestrado centrados en temáticas relacionadas co emprendemento, que a Universidade de Vigo convocaba por primeira vez neste 2024. Financiados con 20.000 euros procedentes da UE-Next Generation UE, trátase duns galardóns dirixidos a recoñecer traballos académicos que propoñan o desenvolvemento de novos produtos e servizos que teñan un potencial nicho de mercado ou que estean orientados a xerar un proxecto que poida contribuír á creación dunha iniciativa empresarial.
Estes galardóns entregaranse o venres 20, xornada na que tamén terá lugar o Demo-Day do programa Incuvi da UVigo. Nesta actividade, o estudantado seleccionado na última edición dos Premios Incuvi Emprende e das Axudas Incuvi Avanza e Incuvi Consolida dará a coñecer os proxectos que foron desenvolvendo nos últimos meses.
Un escaparate para 42 iniciativas empresariais
Seleccionadas de entre máis de 140 candidaturas, 42 novas iniciativas empresariais presentarán os seus produtos e servizos nas tres modalidades de participación do Pont-Up Store. Por unha banda, a carpa contará con 33 espazos para os emprendedores e emprendedoras, aos que se suman aqueles e aquelas que organizarán actividades demostrativas neste espazo. Outras seis iniciativas participarán noutra das novidades desta edición, o Pont-Up Venture, un evento centrado en proxectos de base tecnolóxica, no que as e os participantes defenderán as súas ideas de negocio ante un xurado integrado por profesionais de entidades de financiamento de startups, como explicou Figueroa.
Cun 74% de iniciativas empresariais lideradas por mulleres e unha importante presenza de iniciativas procedentes no rural galego, entre os seleccionados e seleccionadas destacan nesta edición os proxectos relacionados co mundo da saúde, o ocio e o deporte, sinalou o director deste espazo. A estas súmanse outras propostas centradas na alimentación, a moda ou a sostibilidade, así como a presenza nun dos stands da asociación CES UVigo, que dará a coñecer o traballo realizado por unha vintena estudantes para desenvolver o barco solar co que este verán competían na Energy Boat Challenge.
Múltiples actividades
Tanto a carpa do Pont-Up Store como a sede da Vicerreitoría acollerán ao longo destas dúas xornadas un conxunto de actividades complementarias, como sesións formativas sobre ciberseguridade, intelixencia artificial e novas tendencias de márketing. Da man da Xunta de Galicia, promoverase tamén unha mesa redonda sobre axudas a emprendedores e a presentación dun xogo que busca promover o emprendemento entre o alumnado de secundaria. O encontro servirá tamén como escenario para a posta en funcionamento de Feending, unha aplicación que permite ás empresas localizar e contactar con emprendementos afíns. Así mesmo, o programa acolle tamén as presentacións dos proxectos Voces Ocultas, no que persoas con diversidade funcional forman un equipo de creación escénico musical, e Hub Olympe Emprende, que trata de potenciar o emprendemento colaborativo feminino, apuntou Figueroa.
A loita contra os incendios forestais suma un novo aliado tecnolóxico ao servizo de toda a sociedade. A aplicación móbil ALume, deseñada para facilitar que calquera persoa poida dar a alarma sobre un foco de lume de forma inmediata e precisa, xa se atopa plenamente operativa e dispoñible para a súa descarga de balde nas plataformas Android e iOS. O obxectivo principal desta ferramenta é potenciar a detección temperá dos incendios forestais. Nunha emerxencia no monte, os primeiros minutos son decisivos para evitar que un foco inicial se converta nun gran incendio; por iso, ALume nace para acurtar os tempos de aviso e facilitar ao servizo de extinción datos exactos antes de despregar os medios sobre o terreo. Cabe sinalar que a aplicación leva xa 7.000 descargas e 200 notificacións que axudaron ao operativo.
Un dos grandes atractivos desta undécima edición será a estrea de dez novos espectáculos, todos eles impulsados por compañías galegas, un dato que evidencia o dinamismo creativo do sector dos monicreques na Comunidade. A programación abrirase coa nova versión de A festa dos títeres, presentada por Viravolta, Vai de Roda e Títeres Alakrán, para continuar coa estrea de Treco-lerias, de Trécola Producións, e A rosa de papel, adaptación ao teatro de monicreques do texto de Valle-Inclán realizada por Alakrán.
