sábado, 2 de agosto de 2025
O director de Turismo de Galicia, Xosé Merelles, abriu hoxe as xornadas técnicas de Seguimento dos Plans de Sostibilidade Turística en Destino de Galicia nas que anunciou que a Xunta de Galicia ten mobilizado o 83% dos máis de 130M€ de fondos Next Generation que xestiona o goberno autonómico no eido turístico. Como explicou, nos últimos anos estívose a axilizar e avanzar na mobilización destes fondos "coa intención de aproveitar a oportunidade que supón esta inxección económica para mellorar, renovar e completar a oferta turística galega da man da sostibilidade".
Neste sentido, no acto -no que estivo acompañado pola directora xeral de Políticas Turísticas da Secretaría de Estado de Turismo, Ana Muñoz- Xosé Merelles fixo balance das medidas realizadas a través de plans e liñas de axuda, algunhas delas vixentes como as que aínda se poden solicitar ata o 14 de novembro para implantar medidas de eficiencia enerxética nos establecementos turísticos cun investimento de 10M€ -a maior liña de axudas en orzamento posta en marcha cos Next Generation- que se suma aos 3M€ dunha convocatoria anterior.
O director de Turismo de Galicia referiuse tamén á folla de ruta marcada pola Xunta cos fondos Next Generation relacionada co Camiño de Santiago, con iniciativas como o Plan Xacobeo Next Generation, que está a permitir dinamizar e diversificar a ruta xacobea, ampliar a súa capacidade aloxativa ou mellorar o seu patrimonio. Fixo mención, en concreto, á posta en valor de 12 Bens de Interese Cultural na ruta xacobea, dos que están en marcha a maior parte dos proxectos como a rehabilitación da fortaleza de Monterrei, obras de acondicionamento e iluminación en Mondoñedo, a restauración paisaxística do Parque do Pasatempo en Betanzos ou a posta en valor da casa natal de Valle Inclán, entre outros.
Tamén fixo mención a outras accións ao abeiro deste Plan como a sinalización da ruta cicloturística Eurovelo ou a liña de axudas deseñada pola Xunta de Galicia por máis de 5M€ para dotar de usos turísticos e rehabilitar distintos recursos patrimoniais da ruta xacobea que permitirá, entre outras cuestións, dotar ao Mosteiro de Oia dun hotel e restaurante, así como aos faros grande e pequeno de Cabo Silleiro. Recordou tamén a aposta da Xunta por empregar os fondos europeos para mellorar as instalacións náuticas vinculadas á Ruta Traslatio e para un ambicioso proxecto en marcha que permitirá realizar unha cartografía dixital de todos os Camiños de Santiago.
Diversificación da oferta
Fixo mención tamén, aos diferentes Plans Territoriais de Sostibildiade Turística ao redor de temáticas como o litoral, a enogastronomía e dos recursos termais e cascos históricos, que engloban á súa vez distintos plans de destinos dos que se están a beneficiar numerosos concellos galegos.
"Ademais destes plans territoriais, desde a Xunta de Galicia deseñamos distintas actuacións de cohesión en destino que se traduciron en ambiciosas liñas de axuda para beneficiar a concellos e tamén ás empresas que, ademais, están a dar os seus froitos á hora de diversificar a nosa oferta e facela cada vez máis sostible". Referiuse, en concreto, ás liñas de axuda para a rehabilitación de recursos emblemáticos do litoral, ás destinadas ao embelecemento e actualización das adegas ou as que se deseñarán proximamente para modernizar e mellorar as instalacións termais galegas.
O Instituto Nacional de Estatistica (INE) fixo públicos os datos sobre a ocupación nos primeiros seis meses do ano que indican que 2.967.407 viaxeiros visitaron Galicia facendo un total de 4.961.113 noites nos establecementos galegos. Estas cifras son as máis elevadas dos últimos once anos e tradúcense nun incremento en viaxeiros do 4,5% e do 3,8% en volume de noites. O mercado internacional supón neste semestre o 39,6% dos viaxeiros que visitaron a comunidade, rexistrando un incremento do 5,5% con respecto ao mesmo período de 2024. Concretamente, no mes de xuño, o incremento de viaxeiros foi do 6,7% acadando 814.138 visitantes e do 7% nas noites, superando o 1,4M. En canto a mercados de procedencia destes visitantes destaca o 57,6% do turismo nacional -interno e doutras Comunidades españolas- e o 42,4% do internacional.
O Instituto da Lingua Galega da USC (ILG) acaba de publicar, en colaboración coa Fundación Barrié e USC Editora, o Atlas Lingüístico Galego VIII. Léxico. O ser humano (III). Trátase do oitavo volume do Atlas Lingüístico Galego (ALGa), obra de investigación dialectolóxica amplamente recoñecida no eido dos estudos europeos 'pola rigorosidade dos seus datos e a excelencia das súas visualizacións cartográficas', explican. O novo tomo, froito do traballo dos profesores Rosario Álvarez, Francisco Dubert e Xulio Sousa, está constituído por 280 mapas que dan conta das variedades léxicas no dominio do galego para 259 conceptos vinculados á educación, a música, os xogos, as actividades de lecer, a relixión, as festas relixiosas e profanas, os seres míticos, as características psicolóxicas do ser humano e a roupa e o seu coidado.
