Buscador
Noticias
O titular do Goberno galego, Alberto Núñez Feijóo, avanzou hoxe, tras a reunión do Consello da Xunta, os asuntos prioritarios para Galicia que abordará co presidente do Goberno central, Pedro Sánchez, entre os que destacou os relacionados coa covid, o reparto dos fondos habilitados para as comunidades, a política industrial ou as infraestruturas. Hoxe aproveitamos o Consello para facer un balance dos temas que imos trasladarlle, con carácter xeral, ao presidente do Goberno, a maioría deles centrados no ámbito sanitario, pero tamén económicos ou de infraestruturas, precisou.
O titular do Goberno galego, Alberto Núñez Feijóo, amosou hoxe o seu optimismo ante a receptividade do presidente do Executivo central, Pedro Sánchez, aos proxectos galegos que optan aos fondos europeos Next Generation. Durante a xuntanza mantida hoxe, no Palacio da Moncloa, Feijóo trasladou todo o traballo feito pola Comunidade, con especial fincapé nos proxectos tractores que xa se coñecen, relacionados coa construción dunha planta de produción de fibras téxtiles; coa posta en marcha dunha planta de economía circular para a xestión de residuos orgánicos; co impulso do polo aeroespacial de Galicia; co proxecto da automoción galega; e coa fabricación de vacinas nos laboratorios Zendal.
O Comité Educativo vén de certificar que a práctica totalidade dos centros educativos están preparados para o ensino virtual cos seus horarios-espello deseñados, aulas virtuais operativas, e case todo o profesorado formado. Así se desprende dos datos de seguimento da implantación do Plan de Ensino Virtual elaborado co obxectivo de estar preparados de xeito preventivo en caso de que a situación epidemiolóxica requirira pasar á atención telemática, unha posibilidade que a día de hoxe está descartada logo de que o Comité Clínico avalara a seguridade dos centros escolares.
Estas contas públicas son as máis altas da historia da Xunta e acadan os 11.563 millóns de euros, aos que hai que engadir 101 millóns no capítulo VIII de instrumentos financeiros. Reforzan o gasto social que ascende a 8.540 millóns de euros, e inclúen a cifra récord de 2.592 millóns destinados a investimento produtivo. Ademais, non suben os impostos nin ás familias nin ás empresas e consolidan as rebaixas fiscais aprobadas nos últimos anos. Deste xeito, máis de 115.000 familias beneficiaranse de novo das rebaixas de impostos aprobadas pola Xunta desde 2016.
Galicia vén de acadar un novo fito na redución do abandono educativo temperá, que cae ao mínimo desde que existen rexistros, un 12% de media no ano 2020. Isto supón reducir en máis de medio punto o dato co que se pechou 2019 (12,6%) e confirma a progresiva diminución desta taxa, en máis dun 50% respecto do dato rexistrado de media no 2009 (25,8). Este logro é froito do esforzo de todos os axentes implicados no sistema educativo galego, no incremento da súa calidade e en facelo atractivo para a permanencia do alumnado. En calquera caso, o noso sistema educativo cumpriu xa o obxectivo marcado para España pola UE para 2020, fixado nun 15%.
O festival infantil de curtametraxes Pequefilmes, promovido pola Xunta de Galicia para fomentar a creatividade e o gusto polo audiovisual entre os públicos máis novos, continuará o seu desenvolvemento a través da rede. Entre o sábado 30 de xaneiro e o luns 1 de febreiro, o público poderá ver desde as súas casas a escolma de curtametraxes do festival organizada en catro sesións a través da plataforma tv.festhome.com. En cumprimento das medidas sanitarias de contención da pandemia da covid-19, a Cidade da Cultura suspende así as proxeccións presenciais pero continúa a desenvolverse exclusivamente en liña.
A intensidade da terceira vaga da COVID-19 e as demoras no proceso de vacinación, están provocando un novo axuste á baixa na maioría das previsións de crecemento para 2021. Esta é unha das principais reflexións que recolle A Economía Galega. Informe 2019-2020, documento elaborado polo Instituto de Estudos e Desenvolvemento de Galicia (IDEGA) da USC e que acaba de ver a luz coordinado polo profesor da USC Alberto Meixide. O PIB galego medrou un 1,8% en 2019, dúas décimas menos que no conxunto de España, pero cinco décimas máis que na Eurozona. Desde 2015 ata 2019 a taxa de crecemento do PIB, malia que positiva, vai sendo cada ano menor á do ano anterior e coa peculiaridade de que a taxa galega sempre (excepto en 2015) foi inferior á española.
A Dirección Xeral de Saúde Pública da Consellería de Sanidade informa que, na última actualización, o número de casos activos de coronavirus en Galicia é de 21.293, deles 5.679 son da área da Coruña, 1.954 da de Lugo, 2.980 da de Ourense, 2.022 da de Pontevedra, 3.680 da área de Vigo, 3.309 da de Santiago, e 1.669 da de Ferrol. Do total de pacientes positivos, 178 están en UCI, 1.093 en unidades de hospitalización e 20.022 no domicilio. Polo de agora, en Galicia hai un total de 68.237 persoas curadas, rexistrándose 1.659 falecementos. O número de PCR realizadas é de 1.357.642. O número de doses de vacina contra a covid-19 administradas é de 73.201. Dentro do número total de casos, 827 corresponden a centros residenciais (542 a usuarios e 285 a profesionais).
O director do Igape, Fernando Guldrís, destacou hoxe en Santiago de Compostela a recuperación que se está a percibir nas exportacións galegas desde que a aparición da covid-19 en España provocou unha relevante caída das vendas no exterior. Así, os resultados no período de xaneiro a novembro de 2020 confirman a mellora na última parte do ano con respecto á primeira etapa da pandemia e que, aínda que as exportacións seguen a ser inferiores que no mesmo período de 2019 nun 7,1% a nivel estatal a caída é do -10,9%, a diferenza vaise reducindo desde o descenso do 24,5% rexistrado entre xaneiro e maio.
O Centro Singular de Investigación en Tecnoloxías Intelixentes da USC (CiTIUS) participa como socio no proxecto Multispectral Intelligent Vision System with Embedded Low-Power Neural Computing (MISEL), un novo consorcio europeo que aspira a permitir que as decisións tomadas polos sistemas intelixentes poidan realizarse sobre os propios dispositivos, sen necesidade de complexos sistemas externos de procesamento ou computación na nube.
