Buscador
Noticias
A Universidade de Santiago celebrou este venres no Salón Nobre do Colexio de Fonseca a súa cerimonia de apertura do curso 2024-2025 para o que o reitor Antonio López marcou como grandes retos o desenvolvemento e aplicación do establecido na LOSU, a revisión da oferta e da normativa de titulacións e a posta en marcha de grandes infraestruturas.
O Centro Cultural Marcos Valcárcel da Deputación de Ourense acolleu este venres a presentación do proxecto Rentur (Rendibilidade social nas decisións de investimento do turismo post-pandémico: clave para o desenvolvemento sostible en destinos de interior). Nel, un equipo da Universidade de Vigo leva a cabo o deseño e desenvolvemento dunha ferramenta innovadora para a avaliación da rendibilidade social de proxectos e produtos turísticos.
Este ano cómprese unha década da posta en marcha do programa Iacobus, iniciativa pioneira na Eurorrexión Galicia-Norte de Portugal que fomenta a cooperación e intercambio de persoal docente, investigador e de administración e servizos do ámbito da educación superior galega e portuguesa. Co gallo desta conmemoración, o campus de Ourense acollerá o mércores 18 de setembro a celebración do I Congreso do Programa Iacobus.
A sétima edición do Ciclo Metropolitano pola Igualdade na Música e nas Artes Elas Son Artistas retoma as artes escénicas tras clausurar o pasado 30 de agosto a exposición de María Maquieira na Coruña. No mes de setembro e no inicio de outubro poderanse ver unha obra de teatro en Betanzos, un espectáculo de humor en Culleredo e un concerto no Garufa Club.
O vindeiro 18 de setembro, a CEO será o punto de referencia do emprendemento galego coa celebración de Ultreia Ourense, un evento que pretende dinamizar o ecosistema emprendedor das startups da nosa rexión. Esta iniciativa forma parte de Ultreia Galicia, un ciclo de eventos que percorrerá as catro provincias galegas ao longo do mes de setembro, co obxectivo de promover a innovación e o desenvolvemento empresarial. Ourense será a primeira parada deste proxecto.
Este sábado Expourense abrirá as súas portas para unha xornada repleta do mellor pop rock alternativo. Un festival que en tan só tres anos, logrou posicionarse como un referente da escena musical nacional, e este 2024 non será diferente, cun cartel que promete emocións fortes grazas á presenza de artistas como Jake Bugg, Miles Kane e Yard Act, que actuarán por primeira vez en Galicia, xunto a grandes nomes como Teenage Fanclub, Los Enemigos e Caballo Prieto Azabache.
Ofrecer un punto de encontro para reflexionar e intercambiar coñecementos sobre aspectos significativos relacionados coa auga, dedicando especial atención á xestión empresarial e turística de recursos hídricos e termais. Con este obxectivo a UVigo celebrará do 25 ao 27 de setembro o V Congreso Internacional da Auga, que nesta ocasión leva por título A auga como recurso sostible: ciencia, empresa e benestar.
'Variedade temática e axeitada inserción de tramas nas que o detectivesco e o histórico se dan a man cos relatos de natureza máis telúrica', así describiu o xurado do IX Concurso Balbino de Relatos a obra O meigallo dos soños, da autoría de Juan José Lamelas Caneiro e natural do Concello de Ourense, que se alzou como gañadora desta novena edición.
Aproveitando a tempada estival, o pasado 22 de agosto o Observatorio Astronómico de Forcarei (OAF) foi o escenario da primeira xuntanza de astrofísic@s galeg@s, tanto residentes en Galicia como na diáspora. O evento foi acollido pola Fundación Ceo, Ciencia e Cultura (FC3), representada polo seu presidente Enrique Alonso Blanco, e promovido polos astrofísicos galegos Ana Ulla Miguel, da UVigo, e Carlos Viscasillas Vázquez, da Universidade de Vilnius e do Observatorio Astrofísico de Arcetri.
Foi en 1991, con case todo por crear nunha recén nacida UVigo, cando se iniciaron os trámites para a construción do Centro de Apoio Científico-Tecnolóxico á Investigación da Universidade, CACTI, pero non foi ata 1994 cando o proxecto se converteu en realidade. Dende entón pasaron 30 anos e neste tempo aquel proxecto, 'pioneiro no Sistema Universitario Galego', converteuse nun centro de referencia dotado dunha moi alta infraestrutura de investigación.
