miércoles, 5 de noviembre de 2025
Organizado pola Confederación Empresarial de Ourense (CEO), co apoio da Xunta de Galicia e a colaboración da Deputación de Ourense, Ultreia Ourense reunirá a emprendedores, investidores, mentores e profesionais de diversos sectores para fomentar a colaboración, o intercambio de ideas e o crecemento das iniciativas provinciais.
A xornada dará comezo ás 09:30 horas coa inauguración oficial na sede da Confederación Empresarial de Ourense. O acto contará coa presenza do Conselleiro de Emprego, Comercio e Emigración, José González; a vicepresidenta da Deputación de Ourense, Marta Nóvoa Iglesias, e a presidenta da Confederación Empresarial de Ourense, Marisol Novoa.
Tras a inauguración, ás 10:00 horas, terá lugar a primeira conferencia a cargo de Domènec Biosca, un referente no ámbito do turismo, que ofrecerá unha visión inspiradora sobre as oportunidades e desafíos actuais para as empresas.
Ao longo do día, celebrarase o Campus Startups, un espazo onde proxectos emprendedores terán a oportunidade de presentar as súas ideas a un xurado especializado. As sesións de pitching permitirán que os emprendedores compartan as súas propostas, co obxectivo de ser seleccionados para participar no evento xeral de Ultreia Galicia. Así mesmo, tamén se presentarán casos de éxito destacados, como o de Redegal, Formato Verde, Piel Natura e Bodegas Valdavia.
De forma simultánea, no Centro Cultural Marcos Valcárcel, terá lugar Retos e solucións para un territorio intelixente, en formato de mesas sectoriais nas que participarán emprendedores e empresarios de referencia.
A xornada pechará coa clausura oficial ás 19:15 horas, na sede da Confederación Empresarial de Ourense.
O cinema arxentino volve ser protagonista da programación da Filmoteca de Galicia, que este mes recibirá as cineastas María Aparicio e Lucía Seles con motivo das retrospectivas que lles dedica. Tamén visitará a sede da cinemateca da Xunta na Coruña o director do Buenos Aires Festival Internacional de Cine Independiente, Javier Porta Fouz, para presentar unha copia restaurada de Nueve reinas, ademais de coñecidos nomes do noso audiovisual nas novas entregas da sección Off Galicia, do ciclo Espello Video Cine e da sesión inaugural do 20º aniversario do programa educativo Cinema en Curso. A nova carteleira mensual inclúe, así mesmo, varias proxeccións do Cormorán Film Fest, as últimas de Centenario Maurice Pialat e as películas que cada ano selecciona a Asociación Amigos da Ópera coincidindo coa súa Temporada Lírica, entre outras citas.
O presidente da Xunta, Alfonso Rueda, informou de que o Consello da Xunta aprobou hoxe a sinatura do convenio do nivel acordado para 2025 entre a Consellería de Política Social e Igualdade e o Instituto de Maiores e Servizos Sociais (Imserso) destinado ao sistema de atención á dependencia das comunidades autónomas e que, no caso de Galicia, ascende a 105 millóns de euros sufragados entre o Estado e a Xunta, só tres máis que os asignados o exercicio pasado. Tal e como informou Rueda, Galicia recibirá algo máis de 52 millóns de euros, grazas a que a Xunta cumpre con éxito os obxectivos recollidos neste acordo: diminución da lista de agarda, mellora na calidade dos servizos, etc.
