Noticias tecnologia
A Xunta e a compañía Indra deron comezo ás probas de voo finais do Targus, o avión opcionalmente pilotado (OPV) civil máis avanzado desenvolto ata a data en España no marco do Polo Aeroespacial de Galicia. A aeronave está preparada para dar apoio en misións de busca e rescate, extinción de incendios, protección medioambiental e do territorio e control de usos do solo, entre outras aplicacións. A directora da Axencia Galega de Innovación, Patricia Argerey, acudiu ao Centro de Investigación Aerotransportada de Rozas, en Lugo, para comprobar os traballos que se están realizando co dron. Os pasados meses de xuño e xullo, o Targus xa completou unha primeira serie de probas nas que demostrou a súa capacidade para ser pilotado en remoto desde terra e voar de forma autónoma.
A Xunta de Galicia puxo en marcha, recentemente, o sistema PassCOVID, unha canle de contacto telemático coa cidadanía para facilitar a xestión da pandemia. Esta ferramenta informática en forma de app para dispositivos móbiles, ofrece información actualizada sobre a situación da crise sanitaria en todo o territorio e a nivel local, con avisos, recomendacións e alertas das medidas que a Xunta de Galicia está a activar para conter a pandemia orixinada polo coronavirus. As persoas que descarguen PassCOVID poden optar por facelo como usuarios identificados, empregando o sistema de claves concertadas Chave 365, ou ben levalo a cabo de xeito anónimo.
A Asociación Galega de Empresas de Software Libre e a Axencia para a Modernización Tecnolóxica de Galicia, lanzan a terceira edición do programa 'GIRL STEM: derrubando estereotipos', enmarcado no Plan de Promoción do Talento Dixital, que busca a reducir a fenda de xénero que existe entre mulleres e homes nos estudos nos campos STEM (Ciencia, Tecnoloxía, Enxeñería e Matemáticas), nas que o alumnado feminino representa un 29% do total de persoas matriculadas. Este ano o programa se transforma nunha acción dixital e pedagóxica para adaptarse ás circunstancias actuais, pero tamén para avanzar cara dinámicas máis eficaces que acheguen recursos cos que traballar de forma transversal nas aulas galegas.
Un total de 85 proxectos aplicables ao sector aeronáutico e dos vehículos non tripulados optan a formar parte da terceira edición da Business Factory Aero (BFAero), impulsada pola Xunta dentro do polo aeroespacial de Galicia, tras pecharse o prazo de presentación de solicitudes. Así, a aceleradora bate o seu récord de participación e practicamente duplica as cifras das dúas anteriores convocatorias, nas que se inscribiran 54 e 40 proxectos seleccionables, respectivamente.
A aplicación PassCOVID está xa dispoñible desde hoxe para os dispositivos con sistema operativo iOS e en proceso de publicación para os móbiles con sistema operativo Android, coa previsión de que estea accesible para a súa descarga a principios de semana. De descarga voluntaria, a aplicación pode empregala calquera persoa que que se atope en Galicia, sexa residente ou transeúnte. Conectada directamente co Servizo Galego de Saúde, PassCOVID é un instrumento de apoio á xestión da pandemia e unha canle de contacto telemática cos cidadáns.
Tivo lugar o peche da xornada virtual Oportunidades do sector aeronáutico: Business Factory Aero organizada pola aceleradora do sector aeroespacial Business Factory Aero (BFAero) en colaboración coa Escola Técnica Superior de Enxeñaría Aeronáutica e do Espazo da Universidade Politécnica de Madrid. A directora da Axencia Galega de Innovación, (Gain), Patricia Argerey, animou aos participantes a presentar os seus proxectos innovadores á terceira edición da BFAero, que pecha o vindeiro 22 de outubro, co obxectivo de converter Galicia nun referente neste ámbito e atraer talento e fomentar o emprendemento nesta cadea de valor con gran potencial de crecemento. Actualmente estanse a desenvolver doce proxectos procedentes de distintos tipos de entidades (centros tecnolóxicos, universidades, así como empresas que xeraron unha spin-out).
O reitor da Universidade da Coruña, Julio Abalde, e o presidente do Clúster TIC de Galicia, Antonio Rodríguez del Corral, presentaron nunha rolda de prensa na que participaron o Delegado Territorial da Xunta de Galicia na Coruña, Gonzalo Trenor, e a alcaldesa da cidade, Inés Rey, as bases da licitación do plan director da Cidade das TIC e do proxecto construtivo do Centro de Servizos Avanzados, o primeiro dos edificios que se porán en marcha. O reitor presentou ademais a páxina web específica do proxecto, que ofrece toda a información da Cidade das TIC e do seu desenvolvemento.
A directora da Axencia Galega de Innovación (Gain), Patricia Argerey, participou nas demostracións que a empresa Boeing realizou no seu laboratorio de simulación de continxencias de voo situado nas instalacións do Centro de Investigación Aeroportada de Rozas (CIAR) -en Castro de Rei, Lugo- de cada un dos sistemas desenvoltos no marco do contrato de Compra Pública Pre-comercial Galician SkyWay. Un programa de I+D que desenvolve coa colaboración de diferentes empresas e centros de investigación, cunha alta complexidade tecnolóxica, que busca solucións avanzadas para a seguridade do tráfico aéreo non tripulado en espazos compartidos con aeronaves tradicionais.
O 88,1% dos fogares galegos ten un servizo de Internet contratado, segundo se recolle no estudo A Sociedade da Información nos fogares galegos. Edición 2019. Esta porcentaxe supón un incremento dun 11,9% respecto ao ano 2016. No mesmo período, Galicia presenta un ascenso superior ao observado a nivel europeo (5,9%) e moi semellante ao crecemento da media estatal (11,6%). Cómpre destacar como a convivencia con nenos eleva, considerablemente, a porcentaxe de contratación de Internet. O 99% dos fogares con nenos e nenas en idade escolar obrigatoria teñen Internet contratado mentres que nos fogares sen menores de 6 a 16 anos a porcentaxe descende ata o 84,7%.
O vicepresidente económico e conselleiro de Economía, Empresa e Innovación, Francisco Conde, visitou hoxe o Polo Aeroespacial de Galicia onde se está a acometer a primeira fase de construción do parque tecnolóxico e industrial, que alcanzará unha superficie de 31.000m² e terá capacidade para albergar unha quincena de naves. Acompañado por representantes do Instituto de Técnica Aeroespacial (Inta), o vicepresidente económico puido comprobar a marcha desta primeira fase, na cal se está a traballar sobre unha área inicial de 3.000m² onde Babcock xa está a piques de rematar a construción do seu hangar e Indra fará outro.
A Universidade de Vigo e o Centro Tecnolóxico de Automoción de Galicia (CTAG) asinaron este martes un acordo de colaboración que permitirá a posta en marcha no campus dun servizo de vehículo autónomo e conectado que non só facilitará o transporte de persoas entre os diferentes edificios, senón que tamén servirá como plataforma de proba para diversos casos de uso relacionados coa ciberseguridade no ámbito do vehículo conectado.
O grupo de Visión Artificial e Recoñecemento de Patróns (VARPA) da Facultade de Informática da Universidade da Coruña será o coordinador do paquete de traballo de Intelixencia Artificial relacionado cos casos de uso en contorna real en diversos sectores no proxecto europeo ACHILLES. Esta iniciativa europea está composta por un consorcio de 16 organizacións punteiras para desenvolver un proxecto pioneiro dedicado a remodelar o futuro da Intelixencia Artificial (IA) facéndoa máis ética, explicable, robusta e segura.
O encontro Peregrinando: traxectorias internacionais nas matemáticas e na física reunirá o 20 de decembro en Compostela oito especialistas das dúas disciplinas que ou ben están a realizar a súa carreira investigadora no estranxeiro ou que o fixeron nalgún momento, para dar a coñecer as perspectivas de desenvolvemento profesional que existen fóra. Organizado polo Centro de Investigación e Tecnoloxía Matemática de Galicia e no que participa a USC e o Instituto Galego de Física de Altas Enerxías, a xornada desenvolverase no Auditorio FEUGA.
A competición europea organizada no CITIC esta semana rematou coa entrega de premios ás mellores solucións tecnolóxicas para a inclusión de persoas con discapacidade. O primeiro premio foi para o equipo Muscle Guardians, que presentou unha innovadora aplicación personalizada para previr a atrofia muscular, adaptando os exercicios ás características individuais do usuario.
O proxecto RURALtXA!, unha iniciativa de cooperación vasco-galega que busca impulsar a bioeconomía das zonas rurais, leva identificadas e avaliadas xa unhas 23.000 hectáreas de hábitats de interese comunitario de pastos, queirogais e turbeiras. Nestas zonas, está a traballarse con máis de 250 persoas comuneiras en Galicia e 130 en Euskadi, que continúan desenvolvendo actividades tradicionais asociadas a estes hábitats.
Os modelos matemáticos son unha ferramenta básica e moi poderosa para estudar diferentes fenómenos, en particular para comprender e manipular sistemas biolóxicos complexos. Neste sentido, tal e como explica o investigador da UVigo e vencellado ao CITMAga, Alejandro Fernández Villaverde, 'nas ciencias exactas só se considera un fenómeno comprendido por completo cando se pode construír un modelo matemático que o describa'.
A exposición Cantantes Líricas Galegas dos séculos XIX e XX. De Galicia aos teatros de Europa, América e África, que ata o pasado 16 de novembro puido visitarse no Salón artesoado do Colexio de Fonseca, emprende agora unha viaxe virtual. A exposición presencial nútrese agora da realidade virtual para estender o seu alcance posibilitando unha visita inmersiva grazas á colaboración co CESGA. Ao novo formato, que reproduce boa parte dos materiais da exposición, accédese dende un navegador web.
As enfermidades autoinmunes afectan na actualidade entre o 3 e o 5% da poboación mundial e están aumentando de maneira drástica, probablemente como resultado de cambios na nosa exposición a factores ambientais. Padecer unha enfermidade autoinmune implica que o noso sistema inmunolóxico ataca por erro, cando se atopa co noso propio ARN, as células sas dos nosos órganos e tecidos.
O Parque Tecnolóxico de Galicia (Tecnópole) en Ourense acolleu este martes o lanzamento dun novo proxecto destinado a potenciar a industria resineira galega e mellorar a competitividade do sector. A iniciativa será desenvolvida polo Grupo Operativo Resfo (Resina, Fortalezas e Oportunidades de Mercado) e nel participa un equipo da Universidade de Vigo.
O Instituto Galego de Física de Altas Enerxías (IGFAE), centro mixto da Universidade de Santiago de Compostela e a Xunta de Galicia, desenvolve do 23 ao 29 de novembro de 2024 a sétima edición da Semana da Ciencia. Nesta ocasión, o programa xirará arredor da coñecida como Revolución de Novembro de 1974, da cal se cumpre medio século en 2024.
