domingo, 8 de noviembre de 2026
Agora, a aeronave comeza a voar co seu sistema de misión completo, que se compón dun sofisticado radar e cámaras electroópticas e infravermellas xiro-estabilizadas que recollen e envían datos á estación de control en terra en tempo real.
Indra cumpre así co principal compromiso adquirido dentro da Civil UAVs Initiative, que é o desenvolvemento dunha aeronave pioneira que abriría o camiño ao resto da industria. As probas que se están realizando en Rozas lévanse a cabo cun dron de 1,25 toneladas de peso e 11 metros de envergadura, que está voando en espazo aéreo non segregado como se fose unha aeronave máis. É a primeira vez que un UAV obtén permiso para realizar uns voos coma estes, o que representa un fito para a industria aeronáutica do país.
Todas as probas se están levando a cabo baixo as condicións de voo aprobadas pola Axencia Europea para Seguridade Aérea (EASA) e co permiso de voo emitido pola Axencia Estatal da Seguridade Aérea (AESA) que autoriza a súa experimentación. Ademais, realízanse baixo un protocolo especial de comunicación establecido co control aéreo do aeroporto de Santiago de Compostela.
O Targus realiza todas as probas desta campaña cun piloto a bordo que se encarga de levar a cabo a maniobra de despegue e aterraxe e de ceder á estación de control en terra o mando da aeronave unha vez no aire. Esta estratexia de desenvolver un dron que dá a opción de levar un piloto en cabina permitiu avanzar no proxecto a gran velocidade.
Tamén supón unha gran vantaxe operativa para os futuros usuarios, que poderán sobrevoar zonas urbanas ou aterrar en aeroportos sen restricións de forma tripulada e voar sen piloto ao chegar á zona de operacións. Este dobre uso reforza o atractivo comercial e as capacidades do Targus.
En paralelo, Indra concluíu o desenvolvemento do seu Centro de Misión e Procesado de Datos, un avanzado sistema de información que proporciona utilidades de persistencia, dispoñibilidade, concentración, post-procesado e valorización comercial dos datos capturados por sistemas non tripulados, tanto aéreos como mariños e terrestres.
O sistema desenvolto permite a incorporación dos datos capturados por calquera sistema non tripulado, garante a posibilidade de enriquecer o dato mediante algoritmos de post-procesado proporcionados por calquera entidade que os desenvolvera, está orientado ao modelo de negocio dos seus usuarios, e permite participar na obtención da información grazas a unha sala de seguimento das misións que concentra nun único entorno operacional todo o coñecemento situacional que podería ser de interese para a execución das operacións.
Impulsado pola Xunta, o Polo Aeroespacial de Galicia está mobilizando 165 millóns de euros, e fixo posible que máis de 50 empresas e centros de coñecemento e preto de 500 persoas traballen no desenvolvemento de máis de 35 proxectos. Actualmente, a Xunta está traballando na definición dun novo período de actuacións entre 2021 e 2025, dando resposta aos novos retos e creando novos instrumentos de colaboración público-privada para impulsar o tecido industrial e de coñecemento galego no sector aeroespacial.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
