Actualidad de Pesca

A secretaria xeral técnica da Consellería do Mar, Isabel Concheiro, participou nos últimos días nunha reunión telemática da Conferencia de Rexións Periféricas e Marítimas (CRPM) con varias entidades europeas e co presidente da Comisión de Pesca do Parlamento Europeo, Pierre Karleskind, na que explicou as necesidades dos sectores marítimo-pesqueiro e da acuicultura de Galicia e as medidas adoptadas neste eido fronte á crise do coronavirus. Na súa intervención Isabel Concheiro advertiu da necesidade de articular unha cantidade económica maior dentro do futuro Fondo Europeo Marítimo e de Pesca 2021-2027 con posibilidade de adianto coa finalidade de facer fronte ás axudas necesarias para garantir a dinamización e a competitividade do sector nesta nova sociedade e mercado derivada da alerta sanitaria da covid-19.

O Centro Tecnolóxico do Mar-Fundación Cetmar e os seus socios no proxecto europeo ClimeFish presentarán a próxima semana os resultados do traballo realizado durante catro anos para facilitar a adaptación ao cambio climático nos ámbitos da pesca e da acuicultura en Europa. Será durante a celebración do Foro Internacional 2020 sobre os Efectos do Cambio Climático na Pesca e na Acuicultura, un encontro que organiza o consorcio ClimeFish os días 25 e 26 de febreiro na sede da Organización das Nacións Unidas para a Alimentación e a Agricultura (FAO). O ente participará no evento, que supón o peche deste proxecto europeo, cunha sesión de interacción e o diálogo entre os distintos actores.

Reuniuse hoxe o pleno do Consello Galego de Pesca no que, entre outros asuntos, se analizaron co sector as posibilidades de pesca acordadas para o 2020 nas negociacións do Consello de Ministros de Pesca da Unión Europea celebrado en decembro do ano pasado en Bruxelas. Nesta xuntanza púxose de relevo que a negociación efectuada neste Consello de Ministros permitiu mellorar en máis dun 16% a proposta inicial da Comisión Europea. Galicia participou neste encontro como representante das comunidades autónomas españolas con varios informes socioeconómicos para defender que a xestión dos recursos debe basearse no equilibrio entre os aspectos medioambiental, social e económico.

A nova Lei de Pesca Continental, que substitúe á de 1992, contempla a creación das Escolas de río, co fin de implicar e educar aos máis pequenos na conservación dos ecosistemas acuáticos continentais, e nas que os mozos de idade igual ou inferior a 14 anos poderán practicar pesca sen necesidade de licencia sempre que estean acompañados por un adulto con licencia. Para fomentar a pesca sustentable, poranse en marcha medidas como actividades de promoción e divulgación de xeito preferente por parte de entidades colaboradoras de pesca; programas de formación específica dentro da Estratexia galega de educación ambiental; ou a limitación desta modalidade como a única permitida no caso dos escenarios deportivos, sociais e de formación.

Galicia defende a necesidade de contar con plans de continxencia que inclúan a concesión de axudas á frota afectada por unha posible paralización da actividade en caso dun divorcio abrupto e que se estude a posibilidade de destinar a parte do Fondo Europeo Marítimo e de Pesca (FEMP) non empregada en anos pasados a achegas para minorar o impacto do brexit. Trátase dunha medida que xa foi trasladada á Comisión Europea e que se defendeu recentemente nunha sesión extraordinaria sobre o brexit e a pesca celebrada no marco da asemblea xeral da Comisión do Arco Atlántico en Portugal e que dá continuidade ao traballo realizado nos últimos meses neste sentido.

Celebrouse a sesión extraordinaria sobre o brexit e a pesca celebrada no marco da asemblea xeral da Comisión do Arco Atlántico en Porto, onde Galicia presentou as súas aportacións á Declaración política aprobada neste encontro. Unha das fundamentais é a petición de que a Comisión Europea analice a posibilidade de destinar a parte do Fondo Europeo Marítimo e de Pesca non empregada en anos previos a axudas para minorar o impacto do brexit. A segunda das aportacións é a petición de que a Unión Europea e o Reino Unido traballen conxuntamente para protexer e desenvolver a cooperación existente entre as rexións da UE e as zonas atlánticas do Reino Unido, os territorios británicos de ultramar e terceiros países.

Esta edición do Business2Sea conta con preto de seiscentas persoas inscritas e ofrecerá entre hoxe e o vindeiro mércores un programa diversificado que incluirá conferencias, seminarios e talleres dedicados ás temáticas do evento, un programa de encontros de negocio e sesións de presentacións breves (pitches) organizadas no programa Curtas de Mar. O encontro conta ademais cunha compoñente expositiva e con actividades de divulgación e animación sobre cultura marítima e está dedicado a facilitar a interacción entre persoas e organizacións e a promover proxectos e negocios nos diferentes sectores da economía do mar.

Inaugurouse hoxe na sede da Fundación Galicia Europa unha nova reunión do Grupo Operativo Brexit da Comisión do Arco Atlántico (CAA). A décima cita deste grupo de traballo serviu para avaliar o estado actual do Brexit tras a prórroga concedida polo Consello Europeo ao Parlamento británico ata o 31 de xaneiro de 2020, así como para analizar o seu futuro impacto nas rexións atlánticas, concretamente, no sector pesqueiro. Durante a reunión tamén se debateron e definiron as mensaxes en materia de pesca que o grupo de traballo adoptará sobre o Brexit durante a próxima asemblea xeral da Comisión do Arco Atlántico que terá lugar en Porto o 14 de novembro.

O Business2Sea é un evento internacional dedicado a facilitar a interacción entre persoas e organizacións e a promover proxectos e negocios nos diferentes sectores da economía do mar, aberto á participación de todo tipo de organizacións. De feito, todos os axentes que teñan o mar e os seus recursos como elementos centrais da súa actividade teñen cabida nesta nova edición do evento. O Centro Tecnolóxico do Mar e o organismo luso Fórum Oceano organizan conxuntamente por segundo ano este encontro, que na edición de 2019 se celebrará no Centro de Congresos Alfândega do Porto (Portugal).

A conselleira do Mar, Rosa Quintana, trasladou hoxe ao ministro de Agricultura, Pesca e Alimentación en funcións, Luis Planas, a necesidade de seguir traballando ante a Unión Europea para facilitar o acceso das entidades asociativas do sector, como as confrarías de pescadores, ás axudas do Fondo Europeo Marítimo e de Pesca (FEMP). Neste sentido, Galicia defendeu dentro da delegación española que participou no Consello de Ministros de Pesca da Unión Europea a necesidade da coordinación deste regulamento do fondo con outras normativas europeas como a de control, xa que é o que marcará os criterios de concesións das axudas.