Buscador
Noticias
A plataforma dixital facilita unha avaliación do impacto do posible novo contexto comercial ás empresas galegas en dous niveis, o da súa preparación actual ante o Brexit e o da súa dependencia comercial co país anglosaxón. A partir destes parámetros, a ferramenta analiza cada peme en cinco dimensións clave: estratexia e modelo de negocio, fiscalidade e aduanas, marco legal, organización e persoas, e marco financeiro. Ademais de proporcionar recomendacións específicas sobre cuestións clave en función da situación de cada peme, este instrumento de apoio ao tecido empresarial galego amosa unha análise comparativa con respecto a outras empresas, así como indicacións globais para cada un dos sectores estratéxicos de Galicia.
O actor John Malkovich visita estes días Galicia para participar no ciclo 'Vai e vem. Carta blanca a Chema Prado', que o Centro Galego de Artes da Imaxe (CGAI) lle dedica na Coruña ao exdirector da Filmoteca Española para renderlle tributo ao que foi un dos seus principais valedores desde a súa creación hai 27 anos. Malkovich desprazouse ata Galicia para compartir esta homenaxe, dentro da que se proxectou o thriller 'Pasos de baile' que o estadounidense dirixiu en 2012, con Javier Bardem como protagonista. A película foi seleccionada polo propio Chema Prado, a quen o CGAI lle deu carta libre para deseñar unha escolma dunha vintena de títulos, que poderán verse ata mediados de maio.
A Semana Santa galega vai gañando ano a ano en atractivo, como se pode comprobar no feito de que este ano se celebrará co maior número de festividades deste tipo declaradas de interese turístico. A nosa Comunidade conta con dúas festas recoñecidas coa máxima distinción que poden acadar no eido turístico. As de Ferrol e Viveiro son de Interese Turístico Internacional e seis máis son de Interese Turístico de Galicia: Betanzos, Cangas, o Santísimo Cristo de Fisterra, Mondoñedo, Paradela e Santiago de Compostela. A Semana Santa da capital galega estrearase este mesmo ano co recoñecemento de Interese Turístico de Galicia, tras telo acadado o pasado ano. Tamén outras localidades avanzan neste proceso, como é o caso da Semana Santa de Lugo.
A automoción galega pechou o ano 2018 con balance, cunha conta de resultados que afianza as expectativas do sector de cara á unha maior produtividade, innovación e mercado exterior. Este sector, que conforman 130 empresas integradas no Clúster de Empresas da Automoción (CEAGA), dá emprego a máis de 22.000 persoas, e representa unha cuarta parte das exportacións galegas. A planta de PSA en Vigo sigue sendo unha das máis produtivas de España, das máis innovadoras do grupo e sigue avanzando no coche do futuro. Sigue crecendo tamén a canteira de empresas que conforman toda a industria auxiliar, de xeito que este sector continúa sendo decisivo no ránking exportador da Comunidade.
O Centro Dramático Galego (CDG) compartirá co público a celebración do Día Mundial do Teatro o vindeiro mércores 27 de marzo cunha xornada de portas abertas na súa sede de Santiago. Como en anos anteriores, o programa de visitas guiadas Que se agocha tras o pano? ofreceralles aos asistentes un percorrido polas instalacións do Salón Teatro, ao tempo que lles permitirá coñecer a historia deste edifico da zona histórica compostelá e se achegar ao traballo cotiá do oficio teatral. Este ano o fío condutor das visitas será a cita O teatro é un país en si mesmo, un gran territorio que abarca o mundo enteiro, de Carlos Celdrán, dramaturgo e director teatral cubano.
A Deputación da Coruña presentaron aos alcaldes, concelleiros e técnicos da provincia o programa PEL-Concello Dixital, co que o goberno provincial pretende impulsar a transformación dixital dos pequenos concellos coruñeses en 2019. A Deputación vén de aprobar a inclusión no Plan de Emprego Local (PEL) dunha nova liña denominada PEL-Concello Dixital, cun orzamento de 693.209 euros, que permitirá a contratación de técnicos especialistas que darán soporte in situ e acelerarán a implantación da e-administración nos concellos coruñeses de menos de 20.000 habitantes. A través desta iniciativa preténdese crear emprego e axudar a mellorar a formación e cualificación dos empregados municipais.
Este récord de certificacións sitúa á Comunidade galega como a segunda neste tipo de distincións e a primeira da España Verde. Un éxito que se traduce na chegada de 4,8 millóns de visitantes no ano 2018, no incremento da estadía media e tamén no gasto; e que se verifica, así mesmo, no Camiño de Santiago que superou os 320.000 peregrinos en 2018 e se diversifica polos diferentes itinerarios. O sector aposta pola desestacionalización, como reflicten os datos publicados polo INE sobre aloxamento hoteleiro, que indican que 6 de cada 10 turistas que chegan a Galicia fano fóra do verán. Así, no mes de febreiro vendéronse na Comunidade máis de 330.000 noites, un 2% máis que en febreiro do pasado ano.
O Museo do Pobo Galego presentou hoxe a programación completa da súa XIV Mostra Internacional de Cinema Etnográfico (MICE), que se desenvolverá en diferentes espazos de Santiago de Compostela entre os vindeiros días 25 e 31 de marzo. As gravacións domésticas, as fronteiras e a relación do son e a música coa etnografía son as tres liñas temáticas que vertebran a carteleira deste ano, no que o cinema feito por mulleres volverá ter un peso importante. Como en anos anteriores, o encontro dedicaralle unha parte importante da súa programación a filmes dirixidos por mulleres, que neste caso supoñen arredor da metade dos títulos incluídos tanto na sección oficial como fóra de concurso, cunha escolma coordinada por Margarita Ledo e Marta Pérez Pereiro.
A oferta turística de Galicia preséntase na capital de Irlanda no marco da mesa de traballo Irish Travel Industry Trade Show, no que están representados os principais operadores deste país. O departamento de Cultura e Turismo da Xunta difundirá entre os empresarios turísticos irlandeses a oferta relacionada coa natureza, a cultura, as cidades e a gastronomía, así como o Camiño de Santiago nun dos países que máis peregrinos achega ano tras ano, segundo os datos da Oficina do Peregrino. Turismo de Galicia ten a oportunidade de contactar con grandes operadores irlandeses para presentarlles os produtos que máis se adaptan ao gusto dos cidadáns de Irlanda e así incorporar a oferta galega aos viaxes organizados que parten da illa.
O Goberno autonómico vén de activar o Plan de financiamento empresarial de Galicia para 2019 co obxectivo de que ningún proxecto viable se quede sen desenvolver por falta de financiamento, especialmente no caso das pequenas e medianas empresas de carácter industrial. A través deste plan, que contará cun orzamento de 100M, facilitarase financiamento para 800 proxectos de emprendedores, microempresas e pemes. Ademais prevese mobilizar o montante de preto de 300M a través de instrumentos financeiros que contribúen á creación de empresas, crecemento das pemes da industria e tamén ao apoio ás actividades de innovación.
