martes, 22 de septiembre de 2026
O conselleiro de Cultura e Turismo, Román Rodríguez, mantivo hoxe un encontro co cineasta John Malkovich, que estes días visita Galicia para participar no ciclo Vai e vem. Carta blanca a Chema Prado, que o Centro Galego de Artes da Imaxe (CGAI) lle dedica na Coruña ao exdirector da Filmoteca Española para renderlle tributo ao que foi un dos seus principais valedores desde a súa creación hai 27 anos.
Malkovich desprazouse ata Galicia para compartir esta homenaxe, dentro da que hoxe se proxectou o thriller Pasos de baile que o estadounidense dirixiu en 2012, con Javier Bardem como protagonista. A película foi seleccionada polo propio Chema Prado, a quen o CGAI lle deu carta libre para deseñar unha escolma dunha vintena de títulos, que poderán verse ata mediados de maio e que, dalgún xeito, marcaron a súa traxectoria profesional e vital.
O conselleiro lembrou durante a súa intervención que Prado é toda unha referencia no eido da programación cinematográfica en España. En 1975 uniuse ao equipo de Filmoteca Española, onde comezou a elixir os filmes que entrarían na carteleira da cinemateca do Estado e entre 1989 e 2016 foi o seu director, o que permitiu a modernización da institución.
Así mesmo, o titular de Cultura agradeceu a presenza de John Malkovich a quen describiu como un dos grandes actores de Hollywood, pero tamén un intérprete internacional e versátil que te a capacidade de adaptarse a todo tipo de papeis.
O Consello da Xunta analizou na súa reunión de hoxe un informe da Consellería do Medio Rural sobre o anteproxecto de Lei de loita contra os incendios forestais de Galicia (LLCIF), antes da súa remisión para consulta ao Consello Forestal de Galicia, cuxa reunión está prevista para mañá martes. A futura normativa prioriza reforzar a protección da poboación e a xestión integral do territorio. O presidente do Goberno autonómico, Alfonso Rueda, lembrou que actual lexislación sobre incendios forestais 'ten case 20 anos' e 'cómpre actualizarla e adaptala aos novos tipos de lumes así como aos avances que houbo tanto na loita como na prevención de incendios'.
Galicia é a rexión que máis solicitudes presentou en Europa para participar en proxectos interrexionais de I+D+i. Así o indican os datos da Vanguard Initiative, alianza europea da que a nosa Comunidade forma parte, xunto a outras rexións, para estimular o crecemento europeo da I+D+i a través da colaboración entre territorios de distintos países e a especialización intelixente. Precisamente a Xunta vén de publicar a convocatoria VInnovate Galicia, unha liña de axudas para organismos de investigación e empresas que presenten proxectos con outras rexións. Para poder candidatar á convocatoria VInnovate Galicia da Xunta, cuxo prazo de presentación de propostas está aberto desde hoxe ata o 19 de outubro, os posibles participantes teñen que presentarse antes á fase europea.
