martes, 22 de septiembre de 2026
A directora de Turismo de Galicia, Nava Castro, salientou hoxe o cada vez máis importante atractivo da Semana Santa galega que este ano se celebrará co maior número de festividades deste tipo declaradas de interese turístico. Así o manifestou no transcurso dun encontro-coloquio organizado pola Xunta de Confrarías da Semana Santa de Santiago de Compostela no que se deron cita representantes de varias celebracións con esta distinción en Galicia.
Durante a súa intervención, Nava Castro recordou que a nosa Comunidade conta con dúas festas recoñecidas coa máxima distinción que poden acadar no eido turístico. As de Ferrol e Viveiro son de Interese Turístico Internacional e seis máis son de Interese Turístico de Galicia: Betanzos, Cangas, o Santísimo Cristo de Fisterra, Mondoñedo, Paradela e Santiago de Compostela.
Neste sentido, salientou a importancia da Semana Santa da capital galega, que se estreará este mesmo ano co recoñecemento de Interese Turístico de Galicia, tras telo acadado o pasado ano. Tamén outras localidades avanzan neste proceso, como é o caso da Semana Santa de Lugo, á que o Consello de Turismo deu o visto bo, como paso previo para ser elevado a Consello da Xunta, órgano responsable da declaración definitiva.
Nava Castro salientou o esforzo e traballo das diferentes confrarías galegas por saber facer que tradicións como estas convivan perfectamente co pasado, co presente e tamén co futuro, ao tempo que se converten en importantes atractivos para os viaxeiros, indicou.
Ademais do encontro-coloquio, a iniciativa da Xunta de Confrarías de Santiago de Compostela inclúe tamén unha exposición en San Domingos de Bonaval durante esta fin de semana, onde se expoñen hábitos, estandartes e diversos obxectos de confrarías. Proporciónase tamén información de interese, datos e peculiaridades sobre as mesmas. A entrada é de balde e está aberta hoxe de 10,00 a 18,00 e mañá de 10,00 a 14,00 horas.
O Consello da Xunta analizou na súa reunión de hoxe un informe da Consellería do Medio Rural sobre o anteproxecto de Lei de loita contra os incendios forestais de Galicia (LLCIF), antes da súa remisión para consulta ao Consello Forestal de Galicia, cuxa reunión está prevista para mañá martes. A futura normativa prioriza reforzar a protección da poboación e a xestión integral do territorio. O presidente do Goberno autonómico, Alfonso Rueda, lembrou que actual lexislación sobre incendios forestais 'ten case 20 anos' e 'cómpre actualizarla e adaptala aos novos tipos de lumes así como aos avances que houbo tanto na loita como na prevención de incendios'.
Galicia é a rexión que máis solicitudes presentou en Europa para participar en proxectos interrexionais de I+D+i. Así o indican os datos da Vanguard Initiative, alianza europea da que a nosa Comunidade forma parte, xunto a outras rexións, para estimular o crecemento europeo da I+D+i a través da colaboración entre territorios de distintos países e a especialización intelixente. Precisamente a Xunta vén de publicar a convocatoria VInnovate Galicia, unha liña de axudas para organismos de investigación e empresas que presenten proxectos con outras rexións. Para poder candidatar á convocatoria VInnovate Galicia da Xunta, cuxo prazo de presentación de propostas está aberto desde hoxe ata o 19 de outubro, os posibles participantes teñen que presentarse antes á fase europea.
